Xi Hlayise

Swingheniso Leswi Nga Tirhisiwaka eNsin’wini

Tirhisa swingheniso leswi, leswi nga ta ku pfula mahlo loko u lunghiselela swingheniso leswi vulavulaka hi nkandziyiso lowu fambisiwaka n’hweti yoleyo.

Tshinela Eka Yehovha

“Vanhu vo tala lava pfumelaka eka Xikwembu va tsakela ku va ni vuxaka lebyikulu na xona. Xana a wu swi tiva leswaku Xikwembu xi hi byela leswaku hi tshinela eka xona? [Hlaya Yakobo 4:8.] Buku leyi yi endleriwe ku pfuna vanhu va tirhisa Bibele ya vona leswaku va tshinela eka Xikwembu.” Hlaya ndzimana 1 eka tluka 16.

“Namuntlha vuhomboloki byi ya byi andza. Swi hilaha swi hlamuseriweke hakona laha. [Hlaya Eklesiasta 8:9b.] Vo tala va tivutisa leswaku, xana Xikwembu xa khathala hi mhaka leyi? [Hlaya swiga swimbirhi swo sungula swa ndzimana 4 eka tluka 119.] Ndzima leyi yi hlamusela xivangelo xa ku va Xikwembu xi tshike vuhomboloki byi ya emahlweni.”

Tshamani Mi Rindzile!

“Vanhu vo tala va karhateka hi swiphiqo leswikulu ni swiendlakalo leswi tsemaka nhlana leswi nga kona namuntlha. [Endla xikombiso hi xiphiqo lexi tolovelekeke endhawini yoleyo.] Xana a wu swi tiva leswaku swilo leswi i xin’wana xa swikombiso leswi kombaka leswaku ku nga ri khale misava leyi yi ta fumiwa hi mfumo wa Xikwembu? [Yimela nhlamulo. Kutani u hlaya tsalwa leri faneleke, ro kota Matewu 24:3, 7, 8; Luka 21:7, 10, 11; kumbe 2 Timotiya 3:1-5.] Broxara leyi yi hlamusela leswaku ha yini munhu a fanele ku tshama a ri karhi a lava ku tiva leswi minkarhi ya hina yi vulaka swona.”

“Namuntlha vo tala va kayakayisiwa hi swiendlakalo leswi tsemaka nhlana kumbe hi ku lahlekeriwa hi swilo swa vona swa risima. Van’wana va tivutisa leswaku ha yini Xikwembu xi nga ngheneleli xi sivela swilo swo tano. Bibele ya hi tiyisekisa leswaku ku nga ri khale Xikwembu xi ta nghenelela xi wisisa vanhu emaxangwini ya vona. [Hlaya Nhlavutelo 14:6, 7.] Xiya leswi vuavanyisi bya Xikwembu byi nga ta vula swona eka vanhu. [Hlaya 2 Petro 3:10, 13.] Broxara leyi yi hlamusela swo tala hi mhaka leyi ya nkoka.”

Vutivi Lebyi Yisaka eVuton’wini Lebyi Nga Heriki

“Loko wo rhambiwa ku ya tshama endhawini yo xonga ku fana ni leyi, xana u nga pfumela? [N’wi kombe xifaniso lexi nga eka matluka 4 na 5, kutani u yimela nhlamulo.] Xiya leswi Rito ra Xikwembu ri vulaka leswaku hi xona xilotlelo xo tiphina hi vutomi bya muxaka lowu hilaha ku nga heriki. [Hlaya Yohane 17:3.] Buku leyi yi ta ku pfuna leswaku u va ni vutivi lebyi yisaka evuton’wini lebyi nga heriki.” Hlela ku tlhela u vuya mi ta bula hi tindzimana ta ntlhanu to sungula ta ndzima 1.

Pfula exifanisweni lexi nga eka matluka 188-9, kutani u vutisa loyi u vulavulaka na yena xivutiso lexi nga exifanisweni xexo, u ku: “Xana u ni ntshembo wa ku hanya eParadeyisini, laha vutivi bya Xikwembu byi nga ta tata misava hinkwayo? [Yimela nhlamulo. Kutani u hlaya Esaya 11:9.] Buku leyi yi ta ku pfuna leswaku u dyondza leswi Bibele yi swi vulaka hi Paradeyisi ni leswi hi nga swi endlaka leswaku hi kota ku hanya eka yona.” Hlela leswaku enkarhini lowu taka mi ta bula hi tindzimana 11-16 ta ndzima 1.

Dyondza Eka Mudyondzisi Lonkulu

“Xana u ehleketa leswaku misava a yi ta va ndhawu leyinene loko vanhu a va hanya hi ku ya hi leswi vuriweke laha? [Hlaya Matewu 7:12a. Kutani u yimela nhlamulo.] Buku leyi yi na tidyondzo to tala ta mudyondzisi lonkulu eka hinkwavo.” Hlamusela swifaniso swa ndzima 17 ni tinhlamuselo ta swona.

“Vatswari vo tala namuntlha va ringeta ku dyondzisa vana va vona mahanyelo lamanene. Xana u ehleketa leswaku sweswo i swa nkoka? [Yimela nhlamulo. Kutani u hlaya Swivuriso 22:6.] Laha vatswari va khutaziwa leswaku va sungula ku letela vana va vona ku sukela evutsongwanini. Buku leyi yi tsaleriwe ku pfuna vatswari leswaku va letela vana va vona.” N’wi kombe swifaniso leswi nga eka ndzima 15 kumbe 18 ni tinhlamuselo ta swona.

“Minkarhi yo tala vatswari va hlamarisiwa hi swivutiso leswi vutisiwaka hi vana va vona. Swin’wana swa swivutiso swa kona swa tika ku swi hlamula, a swi tano ke? [Yimela nhlamulo. Kutani u hlaya Vaefesa 6:4.] Buku leyi yi nga pfuna vatswari leswaku va kota ku hlamula swivutiso swa vana va vona.” Hlamusela swifaniso swi nga ri swingani swa tindzima 11 na 12 kumbe 34 ku ya ka 36.

Ku Lavisisa Ka Vanhu Xikwembu

“Leswi namuntlha ku nga ni vukhongeri byo tala byo hambana-hambana, xana u tshama u tivutisa leswaku hi nga swi tivisa ku yini leswaku hi byihi lebyi Xikwembu xi byi amukelaka?” Endzhaku ka loko munhu wa kona a hlamurile, pfula tluka 377. Hlamusela yinhla 7, kutani u vutisa munhu yoloye loko a pfumela leswaku vukhongeri bya ntiyiso byi fanele byi endla vanhu va tinxaka hinkwato va va ni vun’we. Hlaya rin’we ra matsalwa lama kombisiweke, kutani loko nkarhi wu pfumela, mi bula hi tinhla tin’wana leti nga kona kwalaho. Loko hakunene a tsakela, n’wi nyike buku. U nga si famba, n’wi vutise leswi, “Xana vukhongeri bya ntiyiso byi fanele byi ma khumba njhani mahanyelo ya munhu?” Hlela ku tlhela u vuya u ta hlamula xivutiso xexo.

Loko munhu wa kona a vula leswaku u nghena kereke yo karhi, u nga ha ku: “Swa tsakisa ku hlangana ni vanhu va tikereke to hambana-hambana. Vanhu va lavisisa Xikwembu hi tindlela leti nga faniki. [Loko swi fanerile hlaya Mintirho 17:26, 27.] Hakanyingi, vanhu va nghena kereke leyi ngheniwaka hi vatswari va vona. [Hlaya ndzimana 12 eka tluka 8.] Ku twa hi ta tikereke tin’wana swi ta hi pfula mahlo. Buku leyi yi hlamusela mikhuva ni tidyondzo ta vukhongeri lebyikulu bya misava leyi.” N’wi kombe rungula leri hlamuselaka swo karhi hi vukhongeri bya yena, eka matluka lama landzelaka: Vusikh (100-1); Vuhindu (116-17); Vubudha (141); Vutao (164-6); Vuconfucius (177); Vushinto (190-5); Xiyuda (220-1); ni Vumoslem (289).

Nhlavutelo—Ku Chaputa Ka Yona Loku Hlamarisaka Ku Tshinele!

“Swi nga ha endleka u ti twile ta [boxa mahungu lama haxiweke]. Loko vanhu va fa swi nga rindzeriwanga, vo tala va tivutisa leswaku va nga yi chavelela njhani mindyangu leyi loveriweke. U ri yini hi mhaka leyi?” Yimela nhlamulo. Kutani u pfula eka tluka 299, u n’wi komba xifaniso xa ku pfuxiwa ka vanhu. Yana emahlweni u ku: “Vanhu vo tala va hlamala loko va twa leswaku ku ta pfuxiwa lavo lulama ni lava nga lulamangiki emisaveni leyi nga Paradeyisi. [Hlaya Mintirho 24:15 hilaha yi tshahiweke hakona ebukwini eka ndzimana 9, eka tluka 297, kutani u hlamusela leswi nga eka ndzimana 10.] Buku leyi yi hlamusela vuxokoxoko byin’wana byo tsakisa hi ta xikongomelo xa Xikwembu mayelana ni vumundzuku.”

Bibele—I Rito Ra Xikwembu Kumbe I Ra Munhu?

“Hi hanya eminkarhini leyi vunyingi bya vanhu byi langutanaka ni swiphiqo. Vo tala va ya eka vatsundzuxi vo hambana-hambana va ya lava mpfuno. Van’wana va lava mpfuno eka vakambisisi va miehleketo. Xana wena u ehleketa leswaku hi nga yi kuma kwihi ndzayo leyi nga hi pfunaka hakunene? [Yimela nhlamulo.] Bibele yi hlamusela mhaka ya nkoka leyi hinkwerhu ka hina hi faneleke hi yi twisisa. [Hlaya 2 Timotiya 3:16. Kutani u pfula eka tluka 187, u hlaya ndzimana 9.] Buku leyi yi ta ku pfuna leswaku u twisisa ndlela leyi ku landzela leswi Bibele yi swi vulaka swi pfunaka ha yona minkarhi hinkwayo.”

Nghwazi Leyi Tshameke Yi Hanya

“Loko ku fika nkarhi lowu wa Khisimusi, vanhu vo tala va anakanya hi Yesu. Hambiswiritano, leswi emisaveni hinkwayo ku humelelaka swilo swo tala swo biha, van’wana va nga ha tivutisa loko hakunene Yesu a ri na mhaka na hina. Xana wena u ri yini hi mhaka leyi?” Yimela nhlamulo. Pfula eka ndzima 24, kutani u hlamusela hi ku komisa xivangelo xa ku ta ka Yesu emisaveni. Ivi u hlaya Yohane 15:13, u kandziyisa leswi Yesu a va rhandzisaka xiswona vanhu.

“Loko munhu a vulavula hi Yesu Kreste, vo tala va n’wi tsundzuka loko a ha ri n’wana kumbe a ri eku xanisekeni naswona a ri ekusuhi ni ku fa. Hakanyingi va swi ba hi makatla swilo swo hlamarisa leswi a swi vuleke ni leswi a swi endleke loko a ha ri emisaveni. Leswi a swi endleke swi khumba vanhu hinkwavo lava tshameke va hanya emisaveni leyi ni lava hanyaka eka yona sweswi. Hi yona mhaka swi nga swa nkoka ku dyondza swo tala hilaha hi nga kotaka hakona hi swilo leswinene leswi a hi endleleke swona.” Hlaya Yohane 17:3. Pfula eka tluka ro sungula ra xingheniso xa buku, ivi u hlaya ndzimana ya vumune.

I Yini Leswi Xikwembu Xi Swi Languteleke Eka Hina?

“Xana u ehleketa leswaku Xikwembu xi hi endlele leswaku hi hanya emaxangwini yo fana ni lawa hi langutanaka na wona namuntlha? [Yimela nhlamulo. Kutani u hlaya Matewu 6:10.] Xana u tshama u tivutisa leswaku Mfumo wa Xikwembu i yini hakunene?” Pfula eka dyondzo 6, ivi u hlaya swivutiso leswi nga eku sunguleni ka dyondzo yoleyo. U nga sungula ku bula hi dyondzo yoleyo kumbe u hlela leswaku mi ta bula ha yona loko u vuya.

“Hambileswi vanhu va manguva lawa va endlaka nhluvuko, mavabyi ni rifu swa ha ya emahlweni swi kayakayisa vanhu ni ku va vangela nhlomulo. Xana wa swi tiva leswi Yesu a nga ta swi endlela lava vabyaka, vadyuhari ni vafi?” Yimela nhlamulo. Loko munhu wa kona a lava ku tiva nhlamulo ya kona, pfula eka dyondzo 5, kutani u hlaya swivutiso swa tindzimana 5 na 6. Bula na yena hi tindzimana teto, kumbe u hlela leswaku mi ta bula ha tona loko u vuya.

Gandzela Xikwembu Xi Ri Xin’we Xa Ntiyiso

“U ehleketa leswaku hi kwihi laha hi nga yaka kona loko hi lava mpfuno wo langutana ni mintshikilelo evuton’wini? [Yimela nhlamulo. Kutani u hlaya Varhoma 15:4.] Wa swi vona leswaku Matsalwa lama huhuteriweke ma hi nyika ndzetelo, nchavelelo ni ntshembo, leswi nga hi tiyisaka leswaku hi kota ku tiyisela swiyimo swo tika. Buku leyi yi ni swiringanyeto leswi pfunaka swa ndlela leyi hi nga vuyeriwaka ha yona loko hi hlaya Bibele.” Kandziyisa tinhla ta mune leti nga eka tluka 30.

“Ku sukela loko Yesu a ha ri laha misaveni vanhu vo tala va khongelele Mfumo wa Xikwembu leswaku wu ta. U tshame u tivutisa leswaku ku ta ka Mfumo ku ta vula yini eka vanhu? [Yimela nhlamulo. Kutani u hlaya Daniyele 2:44.] Buku leyi yi hlamusela leswaku Mfumo wa Xikwembu i yini ni leswi wu nga ta swi endla. Yi hlamusela ni ndlela leyi hi nga vuyeriwaka ha yona loko ku fuma wona hi ku lulama.” N’wi kombe xifaniso lexi nga eka matluka 92-3.