Tirhisa Xingheniso Lexi Tirhaka Lexi Pfumelelanaka Ni Swiyimo — Watchtower LAYIBURARI YA LE KA WEB SITE

Tirhisa Xingheniso Lexi Tirhaka Lexi Pfumelelanaka Ni Swiyimo

Loko hi rhandza vanhu hi mbilu hinkwayo, hi ta ringeta ku tiva swilaveko swa vona kutani hi va komba ndlela leyi ha yona Mfumo wu nga ta tlhantlha swiphiqo hinkwaswo leswi va langutaneke na swona. (Filp. 2:4) Xingheniso lexi pfumelelanaka ni swiyimo lexi vahuweleri vo tala va vonaka xi tirha, hi lexa ku kombela n’wini wa muti leswaku a hlamusela swo karhi hi swifaniso swa Paradeyisi leswi nga etibukwini ta hina, swa timhaka to kota leti longoloxiweke eka kholomu leyi nga exineneni xa tluka leri. U nga ha endla tano u tirhisa xin’wana xa swingheniso leswi landzelaka:

◼ “Xana u ehleketa leswaku vanhu va ta kala va tiphina hi swiyimo swo kota leswi u swi vonaka laha?”

◼ “Hinkwerhu ka hina hi nga tsakela leswaku vana va hina va hanya endhawini yo fana ni leyi kombisiweke laha. Xana u ehleketa leswaku ku laveka yini leswaku hi kota ku hanya endhawini yo fana ni leyi?”

◼ “Lexi i xikombiso xa leswi misava leyintshwa yi nga ta va xiswona loko ku rhandza ka Xikwembu se ku endliwa emisaveni hilaha ku endlekaka hakona etilweni. Xana ku na leswi u swi vonaka leswi nga tolovelekangiki namuntlha?”

◼ “Xana u nga tsakela ku hanya endhawini leyi kombisiweke exifanisweni lexi? [Yimela nhlamulo.] Xana u ehleketa leswaku leswi swi nga endleka eminkarhini leyi hi hanyaka eka yona?”

Yingiserisisa nhlamulo ya munhu yoloye, kutani u n’wi vutisa xivutiso xin’we kumbe swimbirhi hi ndlela ya musa, leswaku a ta vulavula hi ku ntshunxeka. Loko van’wana va hlamule leswaku a va nge tsakeli ku hanya endhawini yo fana ni leyi nga exifanisweni xexo kumbe va vula leswaku a va tshembi leswaku swi ta koteka, u nga hatliseli ku gimeta hileswaku a va tsakeli. Kumisisa hi vutlhari leswaku i yini lexi va endlaka va titwa hi ndlela yoleyo. Tinhlamulo ta vona ti nga ha paluxa ndlela leyi va titwaka ha yona hi swiphiqo leswi vanhu va langutanaka na swona leswi vonakaka onge a swi nge tlhantlheki.—Ezek. 9:4.

Loko u swi kumile leswi munhu yoloye a karhatekaka ha swona, endla xingheniso xa wena xi pfumelelana na swona. Kandziyisa rungula ra Mfumo leri vulavulaka hi swiphiqo swa yena hi ku kongoma. Hlaya tsalwa rin’we kumbe mambirhi lama vulavulaka hi mhaka leyi n’wi karhataka. (Vona swiringanyeto leswi nga eka kholomu leyi nga exineneni.) N’wi kombe leswi Rito ra Xikwembu ri swi vulaka leswaku a ta titwela hi ta yena. Loko a tsakela, n’wi nyike buku kutani u endla malunghiselelo yo tlhela u vuya. Endla leswaku a ya a tsakela swinene.

[Bokisi leri nga eka tluka 6]

Swikombiso Swa Swifaniso Swa Paradeyisi

Buku leyi nge Mudyondzisi: matluka 251-4

Buku leyi nge Vutivi: matluka 4-5, 188-9

Broxara leyi nge Leswi Xi Swi Langu- teleke: matluka 11, 13

Buku leyi nge Ku Rhula Ka Ntiyiso: tluka 98

Buku leyi nge Gandzela Xikwembu: matluka 92-3

[Bokisi leri nga eka tluka 6]

Swilo Leswi Karhataka Vanhu Gome

Pisalema 34:8;

Esaya 65:17-19

Ku kayivela ka swakudya ni ku sika