Ku Sungula Bulo Loko U Tlhelela
1 Leswaku u humelela eku sunguleni ka bulo ni munhu loyi a kombiseke ku tsakela eka riendzo ro sungula, ringeta ku aka ehenhla ka leswi swi simekiweke eka xiendlakalo lexiya xo sungula. Xikongomelo i ku pfuna munhu yoloye leswaku a twisisa ntikelo wa rungula swin’we ni buku leyi a siyeriweke yona enkarhini lowu hundzeke.
2 Tinyike nkarhi wo lunghiselela ku endla riendzo ro vuyela. Hlawula tinhlamuselo leti pfuxaka ku tsakela leti nga ebukwini leyi u yi kombisaka. Tirhisa vutlhari eku pimeni ka rungula leri u nga ta ri hlanganisa ni nkarhi lowu u nga ta tshama wona. Hakanyingi bulo ro koma ra yinhla yin’we kumbe timbirhi ri lulamile handle ka loko ku tsakela loku nga tolovelekangiki ku kombisiwa. Xiya tinhloko-mhaka leti landzelaka:
3 I swiyimo swihi swa nkarhi lowu taka, leswi hi nga langutelaka leswaku swi tisiwa emisaveni, loko yi ta va kaya ra munhu hi laha ku nga heriki? Bulo leri ri sekeriwe eka Psalma 46:8, 9 na 37:9-11, hi laha ti hlamuseriwaka ha kona ebukwini leyi nge Ntiyiso eka matluka 103 na 105.
Bulo ri nga sunguriwa hi ku:
◼ “Loko ndzi endzile enkarhini lowu hundzeke, hi bule hi ndlela leyi Xikwembu xi kunguhateke ha yona, leswaku misava yi va kona hi laha ku nga heriki. Kambe ndzi ku siyele xivutiso leswaku u ta anakanya ha xona: I swiyimo swihi leswi fanelaka swi va kona? Ndza tsaka leswi ndzi vuyeke leswaku ndzi ta ku nyika nhlamulo ya Bibele hi ku komisa.”
4 Leswi hi faneleke ku swi endla leswaku hi tsakela vutomi ehansi ka Mfumo wa Xikwembu. Nhloko-mhaka leyi yi nga ndlandlamuxiwa hi ku tirhisa Yohane 17:3 na Sofonia 2:3, hi laha ti hlamuseriweke ha kona ebukwini leyi nge Ntiyiso eka tluka 10.
Loko u sungula, u nga ha ku:
◼ “Ndzi tsakele ku bula na wena hi xitshembiso xa Xikwembu xo herisa vuhomboloki. [Kombela munhu yoloye ku ta ni buku ya yena leyi nge Ntiyiso.] Xivutiso lexi fanelaka ku khumba un’wana ni un’wana wa hina hi lexi nge, I yini lexi hi nga xi endlaka leswaku hi va kona, leswaku hi ta tokota ku hundzuka loku? Xiya leswi Yesu a swi vuleke eka Yohane 17:3 hi laha yi tshahiweke ha kona ebukwini ya wena eka tluka 10.”
5 I swilaveko swihi leswi nga ta anerisiwa emisaveni ya Paradeyisi? U nga tirhisa Psalma 67:6, 7 na 96:11-13 kumbe Esaya 11:2-5 na 32:1, 2. Tinhlamuselo leti faneleke ta nyikeriwa ebukwini leyi nge Ntiyiso eka matluka 111-12 na 103-5 hi ku landzelelana ka wona.
Marito ya wena yo sungula ma nga ha va lama nge:
◼ “Loko ndzi ri laha enkarhini lowu hundzeke [nyikela siku ra kona], hi bule hi xitshembiso xa Xikwembu xo pfuxa varhandziwa lava feke emisaveni ya Paradeyisi hi ku tirhisa N’wana wa xona. Hi yihi mikateko yin’wana leyi nga ta tsakeriwa hi vona? Buku ya wena yi swi kombisa hi ku landza Matsalwa leswaku yin’wana ya yona yi ta va yihi.” Exisekelweni xa tindzimana leti nga laha henhla, hlaya tsalwa rin’we kumbe mambirhi eBibeleni, ivi u nyikela tinhlamuselo leti humaka ebukwini leyi, kumbexana eka tindzimana 10, 22-3, eka matluka 105-12.
6 Vanhu vo tala va kombise ku tsakela rungula ra Mfumo leri hi ri chumayelaka. Vo tala va amukele tibuku ta hina. Minkarhi yin’wana, hi xiye ku tlangeriwa ka bulo ra hina ro sungula ra Matsalwa. Hikwalaho, endla maendzo yo vuyela eka hinkwavo lava kombiseke ku tsakela, kutani u ringeta ku va dyondzisa ntiyiso.—Mat. 10:11; 28:19, 20; Yoh. 21:17; Nhlav. 22:17.