Lunghiselela Rungula Ra Wena Ra February
1 Hi February, hi fambisa yin’wana ya tibuku leti landzelaka ta matluka ya 192 hi nxavo lowu hungutiweke wa R1,00: Xana Vutomi Lebyi Byo Va Na Sweswi Ntsena? kumbe Ntiyiso Lowu Yisaka eVuton’wini Lebyi Nga Heriki. Yin’wana ni yin’wana ya tibuku leti letinene yi nga tirhisiwa eku nyikeleni ka mahungu lamanene hi tindlela to tala. A swi kanakanisi leswaku u ta swi kuma swi tirha ku dyondza ni ku tirhisa xin’we kumbe hinkwaswo swiringanyeto leswi landzelaka.
2 Misava—Kaya Ra Munhu Leri Nga Heriki: Loko u lava ku sungula bulo ni vanhu lava khumbekaka hi misava ni hi mbangu wa yona, ringeta xihloko lexi nge “Misava Yi Ta Tshama Hi Laha Ku Nga Heriki Tanihi Kaya Ra Vanhu.” Nhloko-mhaka leyi ya cinceka lerova yi nga koka nyingiso wa vanhu va le ndyangwini, varhandzi va ntumbuluko ni vativi va mbangu. Tsalwa ro ri tirhisa i Eklesiasta 1:4. Nhloko-mhaka leyi ni tsalwa leri swa hlamuseriwa eka buku leyi nge Ntiyiso, tluka 101, tindzima 13-15.
3 Endzhaku ko ti tivisa, u nga ha ku:
◼ “Ndzi endza swa xinkarhana leswaku ndzi ta bula hi mhaka leyi khumbaka vo tala va hina swinene. Misava i kaya ra hina, naswona handle ko kanakana na n’wina ma khumbeka hi ndlela leyi yi onhiwaka ha yona. Vativi va sayense ni vativi va mbangu va tshamela ku tsundzuxa leswaku loko nthyakiso wu ya emahlweni, a swi nge koteki ku tshama emisaveni. Xana u vona ntlhantlho wo karhi emhakeni leyi? [Yimela n’wini wa muti a hlamula loko a swi tsakela.] Hi ku komisa, ndzi tsakela ku ku komba leswi Bibele yi swi vulaka ehenhleni ka vumundzuku bya misava eka Eklesiasta 1:4.” Hlaya ndzimana, u tlhela u kombisa tinhlamuselo eka tindzimana 13-15 eka tluka 101 ra buku leyi nge Ntiyiso.
4 Vuhomboloki Byi Ta Susiwa: Leswaku u tsakisa vanhu lava karhatekaka hi vugevenga, vukari ni nyimpi, u nga ha vulavula na vona hi xihloko lexi “Vuhomboloki Byi Ta Susiwa Leswaku Lava Rhandzaka Xikwembu Va Ta Tsakela Vutomi Ni Ku Rhula.” Psalma 37:9-11 yi humesa yinhla leyi, naswona yi hlamuseriwa ebukwini leyi nge Ntiyiso, tluka 105, ndzimana 10.
5 Hi ku landzela xingheniso xa ntolovelo, u nga ku:
◼ “Xana u anakanya leswaku wu ta ta nkarhi lowu hi nga ta ka hi nga langutani ni vugevenga ni vukari? [Yimela nhlamulo ya n’wini wa muti.] Bibele yi vulavula hi ntlhantlho wo helela laha eka Psalma 37:9-11.” Hlaya ndzimana u tlhela u pfula eka tluka 105 ebukwini leyi nge Ntiyiso ivi u hlaya ndzimana 10.
6 Ntshembo Wa Ku Pfuxiwa: Tanihi leswi enkarhini wo karhi munhu a lahlekeriweke hi murhandziwa wa yena la feke, swi nga n’wi chavelela ku sungula mbulavurisano hi nhloko-mhaka leyi nge “Vulawuri Bya Mfumo Byi Ta Kondletela Vutomi Eka Varhandziwa Lava Feke Ehansi Ka Swiyimo Swa Paradeyisi.” U nga ha tirhisa Yohane 5:28, 29 kumbe Mintirho 24:15 kutani u kombisa tinhlamuselo leti nga emhakeni ni matsalwa lama kumekaka ebukwini leyi nge Ntiyiso, tluka 107-9, tindzimana 14-16.
7 U nga ha sungula bulo ra wena hi xingheniso xa vunharhu eka tluka 14 ra buku leyi nge “Reasoning” ivi u ku:
◼ “Nkarhi na nkarhi vo tala va hina hi ehleketa hi varhandziwa lava hi lahlekeleke hi rifu. Kambe xana u anakanya leswaku hi nga ha va vona nakambe? [Nyika n’wini wa muti nkarhi wo ti phofula.] Vo tala lava hi vulavulaka na vona va hlamala hi ku twa leswi Rito ra Xikwembu ri swi tshembiseke ni leswaku ntshembo lowu wu ta kumiwa kwala misaveni. Xiya xitshembiso xa Bibele eka . . . ” Tirhisa Yohane 5:28, 29 kumbe Mintirho 24:15, ivi u nghenisa tinhlamuselo leti nga eka tindzimana 14-16 eka matluka 107-9 ya buku leyi nge Ntiyiso kumbe nhlamuselo leyi nga eka 108.
8 Lunghiselela ivi u tirhisa rin’we kumbe hinkwawo marungula lawa n’hweti leyi. A swi nge nonon’hwi ku kuma mintshaho leyi faneleke ni tinhlamuselo eka tibuku tin’wana ni tin’wana leti u ti tirhisaka. Loko ku kombisiwa ku tsakela kutsongo, nyikela xiphephana lexi vulavulaka hi mhaka leyi yelanaka.