Ku Hlangavetana Ni Swilaveko Swa Ntshovelo Hi Ntsako
1 Ina, lowu i nkarhi wa ntshovelo. Sweswi hi le makun’wini ya mafambiselo lawa ya swilo, naswona hi laha Yesu a vuleke ha kona eka xin’wana xa swifaniso swakwe, “Ku tshovela i ku hela ka minkarhi.” (Mat. 13:39) Eka Yohane 5:17, Yesu u te: “Ku fikela sweswi, Tata wa mina a nga si tshika ku tirha, kutani na mina, tanihi yena, ndza tirha.” Eka ntirho lowu wo tshovela, vanhu va Yehova va khomekile ku nga ri hi ku chumayela mahungu lamanene ya Mfumo ntsena kambe hi ku lunghiselela tindhawu ta vugandzeri. Sweswi Tiholo ta Mfumo ti laveka ku tlula rini na rini. Lexi nkhensekaka, Yehova u susumetele malandza ya yena lama tshembekaka ku nyikela hi vutshila bya vona eku akeni ka Tiholo ta Mfumo. A va tirhi hi matimba ntsena, kambe va tlhela va kombisa moya wa ntsako.
2 Sweswi swilo swi hi laha a swi ri ha kona emasikwini ya Nehemiya loko Vaisrayele va khomekile hi ku aka rirhangu ra Yerusalema. Nehemia 4:6 yi vula leswaku “tiko [a ri] khoma ntirho lowu hi mbilu.” Xana xihundla xa xiyimo lexinene xa mbilu a ku ri xihi? Endzhaku xa boxiwa eka Nehemia 8:10: “Hikuva ku tsaka ka Yehova i matimba ya n’wina.” Hakunene hi na xivangelo lexi heleleke xo va vatirhi lava tsakeke. Hi katekisiwa hi Yehova. Hi na moya wa Yehova, naswona ntsako i xiphemu xa mihandzu ya moya wolowo.—Vagal. 5:22.
3 Tikomiti to Aka ta Swifundza: Swiviko swa nsimu ya misava hinkwayo swi kombisa leswaku ‘masimu ya vupfele ku tshoveriwa.’ (Yoh. 4:35) Hi ku tsundzuka xilaveko lexi, hi 1984 Sosayiti yi sungule ku hlawula Tikomiti to Aka ta Swifundza leswaku ti pfuna mabandlha hi mintirho yo aka Tiholo ta Mfumo, hambi i miako leyintshwa kumbe leyi pfuxetiwaka. Vakulu lava vekiweke leswaku va tirha eka tikomiti i vavanuna va moya lava hi ntolovelo va nga ni ntokoto lowu xiyekaka hi tlhelo ro aka ni ra bindzu. Xitsundzuxo xa vona xi tikombe xi pfuna, ngopfu-ngopfu loko ku ri ni moya wa ntirhisano exikarhi ka vona na vamakwerhu lava tirhaka eka komiti ya kwalaho yo aka.
4 Mabandlha manharhu lama kumeke mpfuno wa vatinyiketeri lava tirhaka ni Komiti yo Aka ya Xifundza endzhaku ma tsalele komiti, ma phofula ku tlangela. Hi vutlhari ma te: “Hi kombela leswaku mi hundzisela rirhandzu ni minkhenso ya hina eka vavasati, vana ni mabandlha ya ka n’wina. Hi ku tlangela swinene ku tinyiketela loku va ku endlaka eku mi pfumeleleni leswaku mi tirha ni vanhu van’wana va Yehova lavo tala swonghasi.”
5 Komiti yin’wana ya xifundza yi te: “Hi kume ntirhisano lowunene eka komiti ya kwalaho yo aka. Hi hambeta hi xiya . . . leswaku leyi hi yin’wana ya timhaka leti vuyerisaka swinene ta ntirho lowu hi nga na wona, vuxaka lebyi kulaka ni komiti ya kwalaho yo aka.” Komiti yo aka ya kwalaho leyi yimelaka mabandlha mambirhi ya ha ku tsala yi ku: “Lunghiselelo leri ri tisa mikateko leyi hlamarisaka ebandlheni. Mi nge hi boxa yin’wana ya yona: ku lunghiselela vukongomisi bya ntirho wa vutshila hi ku tirhisa komiti yo aka, ku hlela madzana ya vamakwerhu va moya ni lava nga ni vutshila leswaku va pfuna, ku endla leswaku ntirho wa xihatla wu koteka, leswi nga tsanisiki bandlha hi tlhelo ra moya kambe swi tiyisaka ku rhandzana ka vamakwerhu, swi nyikela vumbhoni lebyinene eka vanhu, naswona ehenhla ka hinkwaswo, swi nyikela ndhawu leyo saseka yo gandzelela Yehova eka yona.”
6 Tihlanganiseni Ni Komiti Yo Aka Ya Xifundza Ka Ha Ri Na Nkarhi: Loko mabandlha ma kunguhata ku endla ntirho wo pfuxeta kumbe wo aka, vakulu va kwalaho va fanele ku tihlanganisa ni mutshami wa xitulu wa komiti ya xifundza loko ntirho wu sungula. Tikomiti to Aka ta Swifundza ti nyikiwe vukongomisi hi Sosayiti, naswona vamakwerhu lava va ni ntokoto lowukulu lowu nga ta pfuna ku papalata swirimbani loko ku xaviwa ndhawu ni ku kunguhata ntirho wo aka. Loko va tshama va ri karhi va tivisiwa kahle hi mintirho hinkwayo leyi endliwaka endhawini leyi va averiweke yona, komiti ya xifundza yi nga endla xiyimiso xa vatinyiketeri leswaku mintirho hinkwayo yi hetiwa handle ko tirhisa vatirhi lava nga ni vutshila ku tlula mpimo. Komiti yin’wana ni yin’wana yo Aka ya Xifundza yi hlayisa nxaxamelo wa vatirhi ni ku endla xiyimiso xa vatinyiketeri endhawini leyi yi averiweke ku tirha eka yona.
7 Swiletelo leswi lunghiseleriweke tikomiti ta swifundza swi katsa timhaka leti faneleke ku kambisisiwa kahle ku nga si kumiwa ndhawu, tanihi milawu ya tihuvo ta xifundza, masipala ni mafambiselo ya muti lama lawulaka swiyimo swo hambana-hambana leswi khumbaka ntirho wa Holo ya Mfumo. Mabandlha ma nga pfuneka swinene eka switsundzuxo swa vakulu lava vekiweke ku tirha eka Komiti yo Aka ya Xifundza hi ku tihlanganisa na vona emasungulweni, ku nga si xaviwa ndhawu yo karhi.—Swiv. 15:22.
8 Vakulu va nga ha tihlanganisa ni Komiti yo Aka ya Xifundza hi ku tirhisa mulanguteri wa xifundza. U na vito, adirese ni nomboro ya riqingho ya mutshami wa xitulu wa komiti leyi averiweke ku pfuna hi ku aka Holo ta Mfumo endhawini ya bandlha ro karhi.
9 Ku Xava Hi Vutlhari: Hi ntolovelo, mabandlha ma xave swo aka hi swona hi vutlhari. Sosayiti a yi na wona nongonoko wa tiko wo xava swo aka. Hambi swi ri tano, nkarhi na nkarhi, vamaki van’wana va endlela mabandlha minxavo leyi hlawulekeke hi ku kongoma. Loko leswi swi humelela, Sosayiti yi ta rhumela xitiviso hi ta vaxavisi lava eka Tikomiti to Aka ta Swifundza. Emhakeni leyi Sosayiti na komiti ya xifundza a yi bumabumeli kumbe ku amukela vaxavisi. Leswi ko va ku hundzisela rungula eka mabandlha ya kwalaho leswaku swo aka ni minxavo leyi nyikeriwaka swi tiviwa ni leswaku swi ringanisiwa ni swin’wana.
10 Vakulu va kwalaho va fanele ku vona leswaku swo aka swi kumiwa hi ku tirhisa ku ringanisa ka vukhetha ka minxavo. Komiti ya xifundza yi nga pfuna hi ku endla nxaxamelo wa swilo leswi faneleke ku xaviwa, ku katsa ni swilo swo khavisa endzeni. Kumbexana komiti yin’wana ni yin’wana yi tiva vatinyiketeri lava nga ni ntokoto eswivandleni leswi, lava a va ta nyikela mpfuno wa vona hi ku tsaka emabandlheni hi ku hlanganisa nxaxamelo wa swo aka leswi faneleke ku xaviwa. Vamakwerhu van’wana lava nga ni vutivi etimhakeni ta bindzu va nga tirhisiwa ku kuma minxavo leyi antswaka ya swo aka. Va fanele ku tihlanganisa ni vaxavisi vo hambana-hambana leswaku va kuma nxavo lowu antswaka loko hi hala tlhelo va languta ntikelo lowu faneleke. Hambi leswi minkarhi yin’wana ku nyikeriwaka tinyiko ta switirho swo aka kumbe swo pfuneta hi “nxavo wa le hansi,” vakulu va fanele ku kambisisa hi vukheta tanihi leswi minkarhi yin’wana ku nga katsiwaka ni minxavo leyi nga riki erivaleni. Tanihi leswi ku tirhisiwaka mali leyi nyikeriweke, ntirhisano wa bandlha ni Komiti yo Aka ya Xifundza swi ta pfuna ku tiyisekisa leswaku mali leyi yi tirhisiwa hi vutlhari.
11 Mi Nga Khavisi Tiholo Ta Mfumo Ku Tlula Mpimo: Hambi loko bandlha ri nga ha vaka ri hlengelete mali leyi ringaneke lerova yi katsa ni swilo leswi engetelekeke handle ko lava mali yo lombisa, ku fanele ku anakanyeriwa ku tirhisa swikhavisi leswi faneleke ni muako lowu ringaniseriweke. Leswi swi endla leswaku ku va ni mali leyi engetelekeke leyi tirhisiwaka eka mintirho yin’wana ya swa le tilweni. (om tl. 61; 2 Vakor. 8:14) Tanihi leswi vatirhi vo tala va tinyiketeleke eka ntirho wa vona wo aka Tiholo ta Mfumo, va nga ha titwa va tikerisiwa loko va komberiwa ku aka kumbe ku simeka swikhavisi leswi lavaka ntirho lowukulu. Hambi leswi mpfumawulo lowunene wu lavekaka, mafambiselo lama rharhanganeke ni swivumbeko leswi engetelekeke hi ntolovelo swi dya mali kumbe a swi bohi. Vuxiyaxiya lebyikulu byi fanele ku nyikeriwa eka timhaka to tano swi nga si nghenisiwa emuakweni. Komiti yo Aka ya Xifundza yi nga nyikela xitsundzuxo xa nkoka hi ku pfuna ku endla swiboho leswi tiyeke malunghana ni ku khavisa.
12 Mabandlha yo tala ma ake Tiholo letintshwa ta Mfumo hi ku tirhisa mali leyi lombiweke eka lava hlanganyelaka ni bandlha ra kwalaho. Minkarhi yin’wana Holo ya Mfumo yi xavisiwile, naswona mali leyi kumiweke yi anerile ku hakelela minxavo ya ku aka muako lowuntshwa, lowukulu. Hambi swi ri tano, mabandlha man’wana ma fanele ku kuma mpfuno lowu engetelekeke wa swa timali. Ma nga tihlanganisa na Sosayiti leswaku va ta tiva loko mali yo lombisa yi nga kumiwa, hi ku landzela vuleteri lebyi nyikiweke vakulu eka papila ra December 23, 1991. Va nga si lomba mali eka Sosayiti, vakulu va fanele va kambisisa ebandlheni ku vona leswaku (1) i mali muni leyi nga ta nyikeriwa eku sunguleni ku pfuneta eka minxavo ya ndhawu ni ya ku aka, (2) i mali muni leyi nga lombiwaka eka lava va hlanganyelaka ni (ma-)bandlha leri katsekaka, ni (3) leswaku i mali muni leyi nga ta nyikeriwa n’hweti na n’hweti leswaku ku pfariwa mali leyi tirhiseriweke emintirhweni ya bandlha ni ku hakela mali yihi na yihi yo lomba leyi kumiwaka eka Sosayiti. A ku fanelanga ku kombisiwa mavito eka swiphephana leswi tisiwaka loko ku endliwa nkambisiso lowu. I swa nkoka leswaku hinkwavo va nyikela ntsengo lowu pakanisaka, va kambisisa swinene eka timhaka ta vona ta minyikelo ni mali yo lomba, tanihi leswi vakulu va nga ta tirhisa mintsengo leyi ku endla swiboho leswi tiyeke hi ku yimela bandlha.
13 Loko ntirho wo aka Holo ya Mfumo wu hetiwile, minkarhi yin’wana ku va ni mali leyi saleke. Loko mali yo lomba yi kumiwe eka Sosayiti, mali yihi na yihi leyi saleke yi fanele ku tlheriseriwa eka Sosayiti hi ku hatlisa. Kutani Sosayiti yi nga avela mali leyi eka van’wana lava nga ni xilaveko. Mali leyi saleke a yi fanelanga ku tshama ni bandlha, naswona a yi fanelanga ku lombiwa mabandlha man’wana hi (ma-)bandlha leri katsekaka.
14 Mafambiselo Ya Ku Ringanyeta Minxavo Ni Tiakhawunti: Ku nga si sunguriwa ntirho wo aka Holo ya Mfumo, minxavo yo aka yi fanele ku ringanyetiwa hi vukheta xikombelo lexi tiyeke xa mali yo lomba xi nga si rhumeriwa. Leswi swi sivela ku tikerisa vahuweleri hi xiyimiso lexi tikaka swinene xo tlherisela mali. Nakambe, swi endla leswaku ku sala mali eka Nkwama wa Sosayiti wa Tiholo ta Mfumo leswaku yi nyikiwa mabandlha man’wana lama nga ni xilaveko lexikulu xo antswisa Holo ya Mfumo. (Vafil. 4:5) Tanihi leswi lava va tirhaka na komiti ya xifundza va nga ni ntokoto lowukulu emhakeni leyi, mindzinganyeto yo tano yi fanele ku va leyi pakanisaka. Hambi leswi minxavo leyi nga si voniwaka yi nga ha vangelaka ku tlula minxavo leyi ringanyetiweke, mindzinganyeto leyi pakanisaka yi nga endliwa hi ku kunguhata lokunene ni minkambisiso ya swilo swa minxavo leyikulu, xisweswo ku papalatiwa xilaveko xo katsa mali yo tala ya nsirhelelo eka mindzinganyeto ya minxavo.
15 Ntirho wo aka Holo ya Mfumo wu katsa ku tirhisiwa ka ntsengo lowukulu wa mali hi bandlha. Vakulu va fanele va vona leswaku mali yi tameriwa hi ndlela yo tshembeka. Tirhekhodo leti pakanisaka ta tiakhawunti ti fanele ku hlayisiwa, naswona swiviko leswi twisisekaka swi fanele ku nyikiwa (ma-)bandlha leri katsekaka n’hweti na n’hweti. Mulanguteri la ungamelaka u fanele ku vona leswaku mali yo aka ni tiakhawunti hinkwato leti fambisanaka na yona swa kambisisiwa endzhaku ka tin’hweti tin’wana ni tin’wana tinharhu leti tiakhawunti ta bandlha ta nkarhi na nkarhi ti kambisiwaka ha tona. Bandlha ri fanele ku amukela ntirho endzhaku ka ku tsundzuxiwa hi xitalo hi ta vuxokoxoko ni minxavo leyi ringanyetiweke. (km 8/84 tl. 2) Endzhaku ka kwalaho, ku amukeriwa ka ku hakela mali hinkwayo ku fanele ku endliwa hi ndlela leyi faneleke ku nga si hakeriwa mali. Loko ntirho wu herile, ku fanele ku va ni akhawunti leyi twisisekaka ya mali hinkwayo leyi tirhisiweke. Laha Tikomiti to Aka ta Swifundza ti nga tameriki tiakhawunti, kopi ya nkatsakanyo lowu yi fanele ku kombisiwa Komiti yo Aka ya Xifundza, tanihi leswi, leswi swi nga ta pfuna vamakwerhu lava ku hlayisa ku pakanisa eka mindzinganyeto ya vona loko va pfuna mabandlha man’wana lama kunguhataka ntirho wo aka.
16 Leswi Hetisisiweke: Sweswi ku na Tikomiti to Aka ta Swifundza ta 24 leti nga ehansi ka vulawuri bya rhavi ra Afrika Dzonga. Ti vika leswaku lembe na lembe kwalomu ka Tiholo ta Mfumo ta 24 ta akiwa naswona ku endliwa mintirho yin’wana yo pfuxeta. Tikomiti to Aka ta Swifundza nakambe a ti ri karhi ti pfuna Sosayiti hi mintirho emakaya ya varhumiwa, vuhlayiselo bya nhundzu bya le Durban ni vuhlayiselo bya Holo ya Tinhlengeletano ya le Eikenhof. Byebyo i vumbhoni bya vun’we ni moya wa ku tiyimisela lowu kombisiweke hi lava va rhandzaka Yehova ni vamakwavo.—Yoh. 13:34, 35.
17 Swi Xiyiwa Hi Van’wana: Muapostola Pawulo u te: “Hi hundzukile xihlamariso emisaveni hinkwayo, emahlweni ka tintsumi ne mahlweni ka vanhu.” (1 Vakor. 4:9) Namuntlha Vakriste va vonaka, naswona leswi swi tano ngopfu-ngopfu hi nkarhi wa ku aka Tiholo ta Mfumo. Ntirho lowu endliwaka ni moya wa ntsako wa vatirhi wa xiyeka. Hikwalaho, maphepha-hungu ma kandziyisa tinhloko-mhaka-nkulu to tanihi leti nge “Timbhoni Ta Yehova: Ntirho Wa Tona Wu Komisiwile,” “Hi Moya Wa Ntiyiso Wo Pfuna,” na “Va Wisa Hi Siku Ra Vunharhu.”
18 Vun’we bya vatirhi vo tirhandzela hi minkarhi hinkwayo byi hlamarise vahlaleri. Eka vaakelani va le dzongeni ka le Joni a swi vonaka onge “vavasati ni vana” a va aka Holo leyintshwa ya Mfumo emutini wa vona. A va kanakana leswaku Timbhoni ti ta wu heta ntirho wa tona. Kambe hi ku hatlisa va cince mianakanyo ya vona loko va vona Holo ya Mfumo leyo saseka yi yima hi nkarhi wo koma swinene.
19 Phepha-hungu ra le Natala ri vule leswi landzelaka hi ntirho lowu a wu endliwa hi bandlha ra kwalaho: ‘I Holo ya Mfumo leyo saseka ya switina leswi khavisiweke handle ka nxavo! Ina, hambi wa swi pfumela kumbe e-e, ku tirha hi matimba ni ku tinyiketela loku nga hava vutianakanyi ka bandlha ra Toti ra Timbhoni ta Yehova ku kombisiwile hi mahelo-vhiki ya 10 loko va tiakela holo leyintshwa leswaku va hlangavetana ni ku andza ka vona loku kulaka hi xihatla.’
20 Bandlha ra le Ulundi ri phofule ku tlangela ka rona eka Komiti yo Aka ya Xifundza, ri ku: “Hi nga ka hi nga swi koti ku swi tsala epapileni leswi hi titwisaka xiswona malunghana ni leswi mi hi endleleke swona. . . . Hi swi xiye kahle leswaku mintlawa ni vaseketeri va yona a va aka Holo, hayi ya Bandlha ra Ulundi ntsena. Kambe ngopfu-ngopfu a va yi akela Yehova. Ntikelo ni vutshila bya holo leyi yo saseka swinene ku nga vuriwa leswaku swi vangiwe hi nsusumeto wolowo.”
21 Xirho xa vatsari va mahungu xi te: “Rhoma a ri akiwanga hi siku rin’we, hi laha xivulavulelo xa khale xi vulaka ha kona, kambe bandlha ra laha ra Timbhoni ta Yehova ra ha ku bakanyela mianakanyo yoleyo ekule hi ku yimisa Holo ya tona ya Mfumo leyintshwa.” Mutsari un’wana u hlanganise ntirho wo aka Holo ya kwalaho ya Mfumo ivi a ku: “Leswi swi nga ha vonaka tanihi nchumu lowu u twaka ha wona ntsena, kambe swi humelerile kwala. . . . Leswi vo tala va swi langutaka tanihi leswi ku nga singita hakunene, Timbhoni ta Yehova ti swi languta tanihi leswi tolovolekeke. . . . Hambi leswi va nga laviki ku tikukumuxa hi ku humelela ka vona, moya wa vona ni ntirhisano swi siya xikombiso leswaku vo tala va xi landzela.”
22 Le Texas, U.S.A., munhu loyi a nga riki Mbhoni u tsalele phepha-hungu rin’wana endzhaku ko hlalela wun’wana wa miako leyi endliweke hi ku hatlisa: “Ndzi hlalele hi ku hlamala loko muako lowu wu yima ndzi wu langute hi mahlo. Vanhu a va ri eka wona hinkwawo, endzeni ni le handle. . . . A ku ri hava ku holova, ku rhukana kumbe swileriso. Loko u ri ekule a swi vonaka onge voko leri nga vonakiki a ri kongomisa un’wana ni un’wana. Kumbexana swi tano. Leswi ndzi swi voneke swa ha ndzi hlamarisa.” U gimete papila ra yena hi ku: “Loko va ta ekaya ra wena, a va teli ku ku karhata. Va lava ntsena ku avelana rirhandzu ni ntsako wa vona ni munhu un’wana ni un’wana. Kumbexana hi fanele ku va yingisela. Ndza swi tiva leswaku ndzi ta endla tano. Hikuva leswi ndzi swi voneke eka mahelo-vhiki lama hundzeke a swi fana ni ku voninga loku vangamaka emisaveni leyi nga ni xinyama, naswona namuntlha, vamakwerhu, hi lava kun’wana ka ku vonaka koloko ni rirhandzu rero.”
23 Mpfuno Wa Rirhandzu Wa Vatinyiketeri: Magidi ya vatinyiketeri, ku katsa ni vatirhi va vutshila lava pfunaka eku akeni ka Tiholo ta Mfumo, ma bumabumeriwa hakunene. Ku endla ka vona leswi handle ko kuma mali ya ndziho wa matshalatshala ya vona i vumbhoni bya moya wa Yehova lowu tirhaka hi ku tirhisa vona. (Mintirho 20:35; 1 Yoh. 4:12, 13, 21) Vatirhi lava va tsakeke va hetisisa swo tala swonghasi endhawini leyi ku akiwaka eka yona.
24 Vatirhi vo tala lava thwaseke va nyikela hi nkarhi ni vutshila bya vona leswaku va pfuneta hi ku xava ndhawu, pulani ya miako, ku aka ni vumaki, ku khavisa, ku lunghisa rivala, ku antswisa ndhawu, ku xava, ntirho wa swakudya, ku lawula mimovha, vuhlayiseki na swin’wana. Vamakwerhu va nyikela switirho swa vona leswaku swi tirhisiwa eka mintirho leyi. Leswi swi fanele swi tsakisa Yehova, Tata wa hina swonghasi, loko a va vona va tirhisa swilo ni vuswikoti bya vona hi ndlela yo tano ya rirhandzu!—Ringanisa 1 Vatesalonika 2:6-9 na 2 Vatesalonika 3:8b.
25 Ku Laveka Vatinyiketeri Lava Engetelekeke: Tikomiti to Aka ta Xifundza ti vika leswaku ku laveka vatinyiketeri lava engetelekeke. Lowu i ntirho wa nkoka eku seketeleni ka swilaveko swa Mfumo. (1 Vakor. 15:58) Ku laveka vatirhi va vutshila, kun’we ni vamakwerhu van’wana lava vupfeke lava nga ni timfanelo ta moya hambi loko va nga ri na vutshila eka mintirho yo aka. Loko u faneleka hi ndlela yoleyo, xana u nga endla mindzulamiso yo karhi leswaku u ta kota ku tinyiketela? (Esa. 6:8) Hi xikombiso, vakulu van’wana kumbe malandza ya vutirheli va nga ha swi kota ku pfuna hi ku aka Tiholo ta Mfumo hi mahelo-vhiki man’we n’hweti yin’wana ni yin’wana kumbe timbirhi. Va nga ha kuma vuleteri leswaku va byarha vutihlamuleri lebyi engetelekeke, ngopfu-ngopfu eka tindzawulo leti nga riki to aka. Leswi a swi ta nyikela mpfuno eka vamakwerhu lava tirhaka hi matimba lava langutelaka mintirho leyi.
26 Tikomiti to Aka ta Swifundza ni tikomiti ta kwalaho to aka ti endla xiyimiso xa vatinyiketeri leswaku va va endhawini leyi ku akiwaka eka yona loko mpfuno wa vona wu laveka. Vatinyiketeri lava nkarhi na nkarhi va lava ku hetisisa xitshembiso xa vona ni ku hlayisa minkarhi ya switshembiso swo tano hi ku tshembeka, va endla leswaku ‘Ina wa vona a va Ina.’ (Mat. 5:37) Loko nchumu wo karhi lowu nga languteriwangiki wu va sivela ku endla leswi, va tivisa mulanguteri loyi a nga ni vutihlamuleri hi ku hatlisa. Vatinyiketeri va tlhelela emabandlheni ya ka vona ni le mindyangwini ya vona hi ku hatlisa hi laha swi nga kotekaka ha kona naswona a va kayeli ku hlanganyela eminhlanganweni ni le ntirhweni wa nsimu handle ka xivangelo lexi twalaka. Lava va nga eku akeni ka Holo ya Mfumo ku ta va lava (1) va nga vatinyiketeri lava amukeriweke, lava vekiweke hi ku kongoma hi tinhloko ta tindzawulo leswaku va va kona ni (2) lava humaka emabandlheni lama nga endhawini leyi Holo ya Mfumo yi akiwaka eka yona leswaku va vumba ntlawa lowu tolovelekeke wa vatirhi lava nga riki na vutshila. Lavan’wana va khutaziwa ku seketela ntirho wa nsimu ni minhlangano emabandlheni ya ka vona.
27 Fambiselo Ro Tinyiketela: Xana munhu u tinyiketerisa ku yini? Hi December 1991, huvo yin’wana ni yin’wana ya vakulu yi rhumeriwe mphakelo wa tifomo ta Phepha Ra Swivutiso Ra Vaaki Va Tiholo Ta Mfumo. Tona ti nyikiwa vatirhi lava fanelekaka loko va ti kombela. Loko ku laveka tifomo leti engetelekeke, vakulu va ti kuma eka mulanguteri wa xifundza. Vakulu va ni vuleteri lebyi hlamuseriweke kahle malunghana ni vatinyiketeri lava lavekaka ni timfanelo leti va faneleke ku ti fikelela.
28 Loko u rhandza ku tinyiketela ku pfuna ku aka Tiholo ta Mfumo endhawini ya ka n’wina, naswona u ri nandza wa vutirheli kumbe nkulu, kumbe u ri Mukriste loyi a nga xikombiso loyi a nga mutirhi loyi a nga ni vutshila, u nga kombela yin’wana ya tifomo leti eka vakulu va bandlha ra ka n’wina. Tlherisela fomo leyi tatiweke eka vakulu. Va ta engetela marito ya vona kutani va yi rhumela eka mulanguteri wa xifundza, loyi hi ku fanana a nga ta tatisa fomo kutani a yi rhumela eka Komiti yo Aka ya Xifundza. Loko swiyimo swa wena swa munhu hi xiyexe swi ku pfumelela ni loko u fanelekela ku tinyiketela, u ta kuma mikateko leyikulu loko u vona ntsako wa vamakwenu loko ntirho wo aka Holo ya vona ya Mfumo wu fika emakumu, leswi nga ta dzunisa Yehova.
29 Hinkwenu Mi Nga Pfuna: Lava va nga swi kotiki ku tinyiketela na vona va tirha ntirho wa risima. Va pfuna ku khathalela swilaveko swa bandlha loko van’wana va tirha ku aka Holo ya Mfumo. Vatinyiketeri van’wana nkarhi na nkarhi va boheka ku nga vi kona eminhlanganweni emabandlheni ya ka vona loko hi rirhandzu va pfuna mabandlha man’wana hi ku aka Tiholo ta Mfumo.
30 Nakambe, loko ku akiwa Holo ya Mfumo ekusuhi, vahuweleri va le bandlheni ra ka n’wina lava nga riki na vutshila byo aka va nga ha va ni nkarhi lowu va pfulekeleke wo pfuna tanihi xiphemu xa ntlawa wa vatirhi lava tolovelekeke. Vatirhi lava a va yi tatisi fomo ya swivutiso swa vatinyiketeri. Xilaveko xi vekiwa erivaleni, naswona ku endliwa malunghiselelo hi ku tirhisa vakulu va (ma-)bandlha leri katsekaka entirhweni wo aka ni vakulu va le mabandlheni ya le kusuhi hi nkarhi wun’we.
31 Hinkwerhu ka hina hi na nkarhi lowu hi pfulekeleke wo nyikela hi tlhelo ra swa timali eka Nkwama wa Sosayiti wa Tiholo ta Mfumo loko swiyimo swa hina swi hi pfumelela. Ku sukela loko Nkwama wa Sosayiti wa Tiholo ta Mfumo wu sunguriwile hi January 1990, ku endliwe leswaku mali yi kumeka ni le matikweni man’wana leswaku yi pfuna ku akiwa ka Tiholo letintshwa ta Mfumo ta 33 ensin’wini ya rhavi ra Afrika Dzonga. Tona ti kota ku eneta mabandlha ya 44. Mabandlha yo tala a ma ta va ma nga ti kumanga tindhawu to tano letinene to hlanganyela eka tona loko a ku nga ri rirhandzu ra vumakwerhu leri vonakeke hi nseketelo wa n’wina wa ku hanana eka Nkwama wa Sosayiti wa Tiholo ta Mfumo.
32 Nkwama wa Sosayiti wa Tiholo ta Mfumo wu nyikela mali yo lombisa leswaku wu pfuneta ku aka Tiholo letintshwa ta Mfumo. Tanihi leswi mali leyi yi hakeriwaka yi ri ni mintswalo, yi lombiwa mabandlha man’wana lama nga ni xilaveko. Ku na mimpfuno loko mi tihlanganisa na Sosayiti malunghana ni xikombelo xa mali yo lombisa mi nga si lava mali eka minhlangano ya mabindzu.
33 Marito Yo Tlangela: Loko Holo ya rona leyintshwa ya Mfumo yi hetiwile, bandlha ra le Newcastle ri vule leswi landzelaka eka papila leri yaka eka Sosayiti: “Hi nkhensa Yehova swinene, naswona hi rhandza ku nkhensa swinene hi ku hi nyika mali yo lombisa ya Holo ya hina ya Mfumo ni mpfuno hinkwawo lowu mi hi nyikeke wona.”
34 Bandlha rin’wana ri phofule ku tlangela ka mpfuno wa rirhandzu lowu ri wu kumeke, ri ku: “Hi rhandza ku phofula ku nkhensa ka hina lokukulu eka n’wina hikwalaho ka mpfuno wa Nkwama wa Sosayiti wa Tiholo ta Mfumo. Handle ka wona ku akiwa ka holo [ya hina] a swi ta nonon’hwa swinene ni ku teka nkarhi wo leha. Vutlhari bya Yehova bya vonaka hakunene eka lunghiselelo leri.”
35 Bandlha ra Knysna ri tsarile: “Ha tsaka ku vika leswaku Holo ya hina ya Mfumo sweswi yi hetiwile hi ku helela. Hi ve ni tinhlamuselo to tala swinene ni swibumabumelo malunghana ni holo leyintshwa naswona ana se hi ve ni minhlangano yi nga ri yingani endzeni ka yona. Ha swi xiya leswaku leswi a swi nga ta koteka handle ka moya wa Yehova ni mpfuno wa swa timali [wa Sosayiti], kunene ha nkhensa.”
36 Hi lawa marito lama humaka eLebowa-Kgomo malunghana ni moya lowunene lowu kombisiweke hi vamakwerhu: “Eku sunguleni mali leyi hlengeletiweke a yi ri yitsongo swinene. Kutani Makwerhu T— u nyikele nkulumo ebandlheni leyi eka yona a kandziyiseke leswaku a va nga ta swi kota ku aka Holo ya Mfumo hi 10 wa tisente. Endzhaku ka leswi minyikelo yi ve leyi antswaka lerova eku heteleleni [hi] hlengeleta ntsengo wa R15 000,00. Kutani Sosayiti yi pfune hi mali yo lombisa leyi [hi] pfuneke ku aka Holo leyi ya Mfumo. — Vaakelani a va hlamarisiwa hi ku vona hinkwerhu hi ri karhi hi tirha swin’we, ku katsa ni tinxaka hinkwato. — Sweswi Holo ya Mfumo yi herile, yi hlawulekile tanihi ndhawu leyinene ya vugandzeri bya Timbhoni ta Yehova, laha eLebowa-Kgomo.”
37 Ntirho Lowu Nga eMahlweni: Ina, hinkwerhu ka hina hi na xivangelo xo va lava tsakeke loko hi hlangavetana ni swilaveko swa ntshovelo. Hi fanele ku va ni moya wa ntirhisano—hi tirha swin’we ni ku seketela ntirho lowu wa nkoka hi xitalo. (Ps. 133:1) Ha tsaka swonghasi leswi hi nga ni vavanuna lava vekiweke hi nhlengeletano ya Yehova leswaku va rhangela etimhakeni ta moya ni le ku akeni ka miako leyi lavekaka! Pawulo u kombele Vafilipiya, a ku: “Hetisisani ku tsaka ka mina hi ku va ni miehleketo yo fana, ni rirhandzu ro fana.” (Vafil: 2:2) Kunene, hi ni xivangelo lexikulu xo tsaka, tanihi leswi hi byarhisiweke mahungu lamanene ya Mfumo lowu simekiweke lama faneleke ku ‘chumayeriwa emisaveni hinkwayo leyi akiweke leswaku byi va vumbhoni eka matiko hinkwavo’ makumu ma nga si fika. (Mat. 24:14) Ku teka ka hina xiyimo lexi tiyeke etlhelweni ra Mfumo wolowo ni ku tikarhatela swilaveko swa wona hi ku tshembeka swi tsakisa mbilu ya Yehova. “N’wananga, tlhariha, u tsakisa mbilu ya mina, ndzi ta kuma rito eku hlamula lava ndzi rhukanaka.” (Swiv. 27:11) Mawaku lunghelo leri hlamarisaka swonghasi leri hi nga na rona ro tirha ni ku hlanganyela na Yesu Kriste hi ku tsaka entirhweni wa Yehova!