Ku Akiwa Ka Tiholo Ta Mfumo—I Ntirho Wo Kwetsima Naswona I Wa Nkoka
1. Hi wihi ntirho lowu endliweke eku akiweni ka Tiholo ta Mfumo, naswona hi wihi ntirho lowu wa ha lavaka ku endliwa?
1 Eka malembe ya ntlhanu lama hundzeke ku akiwe Tiholo ta Mfumo ta 262 ku tlhela ku lunghisiwa to tala ensin’wini leyi nga ehansi ka rhavi ra Afrika Dzonga. Hi ba mandla hi vuyelela hikwalaho ka ntirho lowukulu wa Tikomiti to Aka ta Xifundzha ni hinkwavo lava ti pfuneke. Hambileswi ku endliweke ntirho lowukulu swinene, ka ha ri ni ntirho wo tala lowu faneleke wu endliwa eku akiweni ka Tiholo ta Mfumo. Xana hinkwerhu ka hina hi nga wu seketela njhani ntirho lowu wo kwetsima wa Yehovha?—Nhlav. 7:15.
2. Xana hi nga wu seketela njhani hi ku kongoma ntirho wo aka Tiholo ta Mfumo?
2 Tiyimisele Ku Tirha: Loko u ri muhuweleri la khuvuriweke, ha ku rhamba leswaku u ta pfuna Tikomiti to Aka ta Xifundzha hi ku tata fomo leyi nge Kingdom Hall Volunteer Worker Questionnaire. (Ps. 110:3) Vatirhi hinkwavo va ku tirhandzela va fanele va tiyimisela ku tirha hi mbilu hinkwayo naswona va ri ni moya wa ntirhisano. (Ps. 133:1) Hambiloko ku nga ri na ntirho wo karhi lowu u wu tivaka, u nga ha hoxa xandla eka tsima ro aka. U nga ha leteriwa ntirho wo karhi lowu nga ta va mpfuno swinene hi ku famba ka nkarhi.
3. Hi tihi tindlela tin’wana leti hi nga seketelaka lunghiselelo leri ha tona?
3 Loko u nga swi koti ku va kona loko ku ri karhi ku akiwa, u nga seketela ntirho wolowo hi ku khutaza lava kotaka ku va kona. U nga ha pfuna evandlheni hi ku sala u endla swiavelo swa lava nga ya eku akeni. Loko vakulu va hlela ka ha ri ni nkarhi va ta tiyiseka leswaku vandlha ri sala ri khathaleriwa kahle loko vamakwerhu van’wana va ha ye eku akeni ka Holo ya Mfumo. Handle ko kanakana, Yehovha wa tsaka loko hi tirhisana hi vun’we leswaku hi yisa ntirho wa Mfumo emahlweni.—Hev. 13:16.
4. Xana hi nga va khutaza njhani lava va endlaka ntirho wo aka Tiholo ta Mfumo?
4 Khutaza Van’wana: Ku aka tindhawu ta vugandzeri swi lava nkarhi wo tala ni ku tirha hi matimba. Hikwalaho, lava rhambiwaka ku ya pfuneta entirhweni wo aka, minkarhi yin’wana a va nge vi kona emavandlheni ni le makaya ya vona. Onge hi nga hatla hi va bumabumela ni ku va khutaza vatirhi lava titsonaka swo karhi leswaku va endla ‘ntirho lowu wu faneleke.’—Mint. 6:3; Rhom. 14:19.
5. Xana vatirhi vo tirhandzela va nga endla njhani leswaku va ringanisela?
5 Ringanisela: Ku chumayela hi Mfumo wa Xikwembu hi wona ntirho wa hina lowukulu etimhakeni leti kongomisiwaka hi Xikwembu. (Mar. 13:10) Hikwalaho, Tikomiti to Aka ta Xifundzha ti endla matshalatshala yo hlela xiyimiso xo aka hi ndlela ya leswaku vatirhi vo tirhandzela va nga tsandzeki ku ya emavandlheni ya vona swi nga fanelanga. Hilaha ku fanaka, vatirhi vo tirhandzela va tikarhatela ku ringanisela leswaku va khathalela vutihlamuleri byo tala lebyi va nga na byona. Va endla malunghiselelo lama faneleke leswaku va tiyiseka leswaku vamakwerhu van’wana va sala va endla swiavelo swa vona evandlheni loko vona va ha ye eku akeni ka Holo ya Mfumo.
6. I yini leswi fikeleriwaka loko hinkwavo evandlheni va ri ni moya wa ntirhisano wo yisa vugandzeri bya ntiyiso emahlweni?
6 Muapostola Pawulo u vule leswaku swirho swa vandlha swi tirha hi vun’we “leswaku miri wu kula wu akeka hi rirhandzu.” (Efe. 4:16) Ndlela leyi hi n’wi rhandzaka ha yona Yehovha ni vugandzeri bya ntiyiso swi hi susumetela ku va lava khomisanaka entirhweni wo chumayela mahungu lamanene ni ku seketela ntirho wa ku akiwa ka Tiholo ta Mfumo.