Xiphemu Xa Wena Eku Akeleni Ka Nkarhi Lowu Taka

1 Namuntlha Vakriste va ya emahlweni va khathalela ntirho wo aka wa moya lowu Yesu a wu sunguleke kwalomu ka malembe ya 1960 lama hundzeke loko a sungule ku hlengeleta vadyondzisiwa. (Mat. 4:17; 7:24, 25, 28; Yohane 7:46) Yehova u katekise ntirho lowu hi xitalo. (Swiv. 10:22) Tanihi leswi hi fambaka hi huwelela Mfumo wa Xikwembu, nakambe hi akela ku khathalela ku engeteleka ka nkarhi lowu taka.—Ekl. 11:6.

2 Loko Tiholo tin’wana ta Mfumo ta khale ngopfu ti lava ku pfuxetiwa, tiholo to tala leti engetelekeke ta laveka leswaku ti rhurhela mabandlha lamantshwa ni lama nga kona. Timali ni vatirhi vo tirhandzela va laveka leswaku mintirho leyi yo aka yi hetiwa hi laha ku humelelaka. Langutelo lerinene leri bumabumelekaka ra vamakwerhu eku hetisiseni ka xilaveko lexi ri hakeriwa hi laha ku fuweke.—Ps. 41:1; Swiv. 19:17; Ekl. 11:1; Luka 14:13, 14.

MPFUNO WA RIRHANDZU LOWU NYIKERIWAKA HI VO TALA

3 Hi kombisa rirhandzu ra hina eka ‘nhlengeletano hinkwayo ya vamakwerhu’ hi ku nyikela eka Nkwama Wa Sosayiti Wa Tiholo Ta Mfumo. (1 Pet. 2:17) Kambe xilaveko xi ya emahlweni xi andza tanihi leswi ntirho wo hlengeleta wu hatlisaka. Kutani Yehova u ya emahlweni a katekisa lunghiselelo leri, naswona vakulu va fanele ku tiyiseka leswaku bokisi ra minyikelo ra Nkwama Wa Sosayiti Wa Tiholo Ta Mfumo ri funghiwe kahle naswona ri vonaka eka hinkwavo. Minyikelo leyi amukeriwaka kun’we ni timali leti kumiwaka hi ku vuyisiwa ka mali leyi lombiweke yi tirhisiwa ku aka Tiholo letintshwa ta Mfumo.

4 Sosayiti, kun’we ni mabandlha hinkwawo lama pfunekaka eka lunghiselelo leri, yi kombisa ku tlangela lokukulu eka vanhu vo tala ni mindyangu leyi nyikelaka nkarhi na nkarhi eka Nkwama Wa Sosayiti Wa Tiholo Ta Mfumo. Mabandlha yo tala ma endle swiboho leswaku ma nyikela eka nkwama lowu. Swifundza swin’wana swi endle swiboho leswi fanaka hi rirhandzu. Entiyisweni, ha tsaka swinene ku vika leswaku mabandlha ya 504 eka ya 1195 sweswi ma seketela nkwama lowu. Tanihi leswi ku nga lunghelo ku pfuna vamakwerhu, xana mabandlha laman’wana ma nga swi languta hi vukheta ku endla leswi fanaka? Leswi a swi ta engetela mali leyi nga kona hi xihatla swinene, xisweswo swi pfuna mabandlha yo tala ku vuyeriwa.

VATIRHI VO TIRHANDZELA LAVA ENGETELEKEKE VA LAVEKA

5 Xana u ni vutshila entirhweni wo aka? Loko swi ri tano, ni loko u kumeka leswaku u pfuna eku akeni ka Tiholo ta Mfumo, u nga tivisa vakulu va kwalaho kumbe mulanguteri wa xifundza. Vatirhi lava nga ni vutshila va laveka etikweni hinkwaro. Sweswi vatshila vo aka lava kumekaka a va talanga leswi vulaka leswaku vutihlamuleri byo aka Tiholo ta Mfumo byi le henhla ka vamakwerhu va nga ri vangani ntsena. Vamakwerhu lava va swi tsakela, kambe va tikeriwa hi swilaveko swa nkarhi na nkarhi leswi endliwaka eka vona. Handle ka leswi, nakambe va na mindzwhalo yin’wana, yo fana ni vutihlamuleri bya ndyangu ni bandlha. Kutani xivutiso xa tlakuka, Hi nga va kuma kwihi vaaki lava engetelekeke lava fanelekaka? Hi ku va letela!

6 Hi khutaza hinkwavo, kambe ngopfu-ngopfu vamakwerhu lavantshwa lava nga ni matimba emirini, leswaku va tivisa vakulu va ka vona kumbe mulanguteri wa xifundza hi ku navela ka vona ku tirha. Komiti Yo Aka Ya Xifundza yi ta mi nyika ndzetelo wa ntirho. Vutshila byo aka byi nga kumiwa hi ku hatlisa. Loko hi aka kaya ra Bethele eRoodekrans, hi tokote ku kayivela ka xiviri ka vatshila, kutani hi letele vamakwerhu lava nga riki na ntokoto tanihi vaveki va switina, vapulasiteri, vapulambara, vavatli, ni van’wana. Hambi ku ri vamakwerhu va xisati a va leteriwa eka vutshila byo tanihi ku veketela tithayili ni ku penda, naswona va swi endle kahle ngopfu hakunene.

7 Hi khutaza Tikomiti To Aka Ta Xifundza leswaku ti pfuxa ku chivirika ka vamakwerhu. Vavanuna lava nga ni vuswikoti a va letele vamakwerhu va xinuna ni va xisati lava swi tsakelaka. Hambi leswi leswi swi nga ha nonokisaka ntirho eku sunguleni, hi ku famba ka nkarhi vavanuna vo tala lava nga ni vutshila va ta kumeka leswaku va khathalela mintirho yo tala. Leswi swi ta vangela ku hangalaka ka ndzhwalo wa ntirho naswona hikwalaho swi ta hatlisisa nongonoko wo aka. Vuyelo lebyi engetelekeke hi leswaku swi tsakisa ngopfu ku tirha kun’we ni vapfumeri-kulorhi eku akiweni ka Tiholo letinene ta Mfumo.

8 Kutani ke, ha yini u nga tiendli u kumeka SWESWI. U ta kuma ndzetelo eka swivumbeko swin’wana swo aka loko u ri karhi u tsundzuka leswaku Esaya 65:21, 22 yi kombisa leswaku vutshila bya wena byi ta tlhela byi tirhisiwa emisaveni leyintshwa.

XIPHEMU XA TIKOMITI TO AKA TA XIFUNDZA

9 Tikomiti To Aka Ta Xifundza ta 22 ti nyika mpfuno eka swiyimo hinkwaswo swa ku pulana ni ku aka. Vamakwerhu lava tirhaka eka tikomiti i vakulu lava nga ni ntokoto, naswona va nga nyikela swiringanyeto swa nkoka swo aka Tiholo ta Mfumo letinene ni leti kokaka mahlo ni ku hlayisa nkarhi ni mali. Hikwalaho ka ntokoto wa vona, va nga pfuna vakulu va kwalaho leswaku va kunguhata loko swi ta antswa leswaku va antswisa Holo ya Mfumo leyi nga kona kumbe ku aka leyintshwa, naswona va nga va pfuna ku vona loko ndhawu leyi va yi kunguhateke ya vuako lebyintshwa yi fanerile va nga si yi xava. Nakambe va nga pfuna vakulu ku ringanyeta hi ku pakanisa timali ta vuako ni nxavo wa Holo ya Mfumo leyi nga kona leyi yi nga ha xavisiwaka.

10 Mi nga si xava nhundzu, i vutlhari ku tihlanganisa ni Komiti Yo Aka Ya Xifundza. Tikomiti leti ti averiwe ku pfuna hi ku aka Tiholo ta Mfumo endhawini leyi hlawuriweke, naswona ti nga pfuna hi ku xava ndhawu. Ti na swiletelo swa ku pfuna vamakwerhu leswaku va papalata ku nonon’hweriwa loku va nga hlangavetanaka na kona eku kumeni ka ndhawu. Mulanguteri un’wana ni un’wana wa xifundza u tivisiwa vito, adirese ni nomboro ya riqingho ya mutshami wa xitulu wa komiti naswona a nga avelana rungula leri ni vakulu va kwalaho loko ku ri na xilaveko.

11 Loko ku hlawuriwa ndhawu ya ku aka Holo ya Mfumo edorobeni leri nga ni mabandlha yo tlula rin’we, vakulu va kwalaho va fanele ku bula hi mhaka leyi ni Komiti Yo Aka Ya Xifundza, mulanguteri kumbe valanguteri va xifundza, mulanguteri wa doroba kumbexana ni vakulu lava humaka emabandlheni ya le kusuhi. Leswi swi nga pfuna vakulu va kwalaho ku hlawula ndhawu leyi nga ta pfuna mabandlha lama katsekaka eka ntirho lowu nga kona kumbexana ni ku olovisa swiyimo swa ku tala ngopfu eka Tiholo ta Mfumo ta le kusuhi, loko nakambe ku pfumeleriwa ku andza ka nkarhi lowu taka endhawini. Etindhawini ta le madorobeni, hakanyingi Holo yin’we ya Mfumo yi tirhisiwa hi mabandlha manharhu kumbe ku tlula. Hambi ku ri etindhawini leti nga talangiki ngopfu hi vanhu, ndhawu yi nga ha hlawuriwa leyi yi nga pfunaka mabandlha mambirhi kumbe ku tlula. Hi khutaza mabandlha leswaku ma tirhisa Tiholo ta wona ta Mfumo hi xitalo.

12 Ku tirhisa swiletelo leswi nyikeriweke hi Sosayiti, Tikomiti To Aka Ta Xifundza ti nyikela mpfuno wa nkoka tanihi leswi ti pfunaka mabandlha ya kwalaho eka mintirho ya wona yo antswisa ni mintirho ya miako leyintshwa. Hi nkarhi wo aka, vatirhi vo tirhandzela va byeriwa hi nkarhi lowu kahle-kahle va nga ta va va laveka ha wona endhawini yo aka leswaku va nga kayeli ku hlanganyela eminhlanganweni ni le ka ntirho wa nsimu wa bandlha ra ka vona. Komiti yin’wana Yo Aka Ya Xifundza yi te: “Hi matshalatshala ya hina lama hambetaka ya ku tirhisa swiletelo swa Sosayiti, hi pfuniwe ku olovisa ni ku hatlisisa mafambiselo yo aka.” Ku hlela ni vutshila leswi dyondziweke eka mintirho leyi swi ta pfuna eku akeni ka Holo ya Nhlengeletano ni le ku pfuneni ka vamakwerhu ku tlhela va aka endzhaku ka makhombo ya ntumbuluko. Entiyisweni, vatirhi van’wana vo tirhandzela lava leteriweke hi Sosayiti va pfunile eku akeni ka hofisi yo hundzuluxela eWindhoek naswona van’wana va ta tirhisiwa ku aka xiengetelo lexintshwa eBethele.

13 Hinkwavo va nga kombisa mihandzu ya musa hi ku khomisana ni lava va langutelaka ntirho wo aka. Hi ndlela leyi, ntirho lowu lavekaka wu ‘endliwa hi xitalo’ naswona wu endliwa “hi ku tsaka [ku nga ri] hi ku vilela.” (Mintirho 14:26; Vahev. 13:17) Komiti Yo Aka Ya Xifundza yi kote ku vika yi ku: “Ku khomisana exikarhi ka mabandlha lawa manharhu a ku hlawulekile. . . . Vamakwerhu hinkwavo va kombise ku vupfa ka moya. A swi tsakisa ku tirha na vona. A ku ri ntirho lowu nga ta tsundzukiwa.”

KU SEKETELA MINTIRHO YO AKA TIHOLO TA MFUMO HI TLHELO RA TIMALI

14 Malunghiselelo ya mali yihi na yihi leyi lavekaka ma fanele ku endliwa emasungulweni. (Luka 14:28-30) Vakulu va fanele ku vona vuswikoti bya bandlha byo hakela minxavo leyi katsekaka hi ku kambisisa leswaku (1) ku ta nyikeriwa mali muni loko yi hlanganile ku pfuna ku xava ndhawu ni mintsengo yo aka, (2) i mali muni leyi yi nga lombiwaka kwalaho ni mpimo wa nkarhi lowu mali yi nga ta kumeka ha wona, naswona (3) i mali muni leyi vahuweleri va nga na yona emiehleketweni yo yi nyikela n’hweti na n’hweti yo hakela mali yihi na yihi leyi lombiweke leyi lavekaka ku engetela eku khathaleleni ka ku lahlekeriwa loku tolovelekeke ko fambisa ntirho.

15 Endzhaku ka sweswo, vakulu va mabandlha lava tsakelaka ku pfuniwa hi mali leyi humaka eka Nkwama Wa Sosayiti Wa Tiholo Ta Mfumo va fanele ku bula hi ta ntirho wa vona lowu kunguhatiweke ni swilaveko swa timali ni mulanguteri wa xifundza, loyi a nga va pfunaka hi ku tivisa Sosayiti hi swilaveko swa vona ni vuxokoxoko bya ntirho. Endzhaku ka loko rungula ri rhumeriwile eka Sosayiti hi mulanguteri wa xifundza, papila ri rhumeriwa eka mabandlha lama katsekaka hi ku kongoma. Mpfuno wa timali wu nyikeriwa nkarhi na nkarhi loko timali ti va kona naswona hi ku ya hi xilaveko.

HLAYISA MOYA WA KU HISEKA

16 Hinkwavo va fanele ku bumabumeriwa hikwalaho ka rirhandzu ra vona eku sekeleni ka Nkwama Wa Sosayiti Wa Tiholo Ta Mfumo. Marito yo tlangela ma amukeriwile ma huma eka mabandlha lama pfuniweke. Ku ‘pfumala ku dyelelana’ ka humelela exikarhi ka mabandlha. (2 Vakor. 8:14, 15) Mabandlha ya mune eka ndhawu yin’wana ma tsarile: “Hi wu tlangela swonghasi nongonoko wo tano lowunene, naswona hi va nkhensa swonghasi vamakwerhu hinkwavo lava hananaka swinene lava va nyikeleke eka Nkwama Wa Sosayiti Wa Tiholo Ta Mfumo . . . Entiyisweni, rirhandzu ra Vukriste leri xiyekaka ri kombisiwile ka hina. Hi kombela mi amukela ku nkhensa ka hina hi mpfuno wa n’wina hinkwawo eku endleni ka leswaku ntirho lowu wa Tiholo ta Mfumo wu humelela.” Bandlha rin’wana ra le Natal ri tsarile: “Kutani vamakwerhu, xikongomelo xa papila leri i ku mi nkhensa swinene hi ku hi lomba ntsengo lowukulu wa mali leswaku hi aka holo ya hina. Vamakwerhu, handle ka mali leyi yi lombiwaka ya ntikelo swinene, a hi nga ta swi kota ku aka Holo ya Mfumo. Kutani vamakwerhu, nakambe hi vula ku ‘Nkhensa’ lokukulu.”

17 Hi nkarhi wa ku akiwa ka Holo leyintshwa ya Mfumo, ku hiseka, ku chivirika ni moya lowunene swi nghenisa voko eku humeleleni ka ntirho. Moya lowu fanaka wu fanele ku ya emahlweni tanihi leswi hi lavaka ku tisa vanhu vo tala eka vutivi bya ntiyiso ni ku va khutaza ku hlangana na hina eHolweni ya Mfumo. Ku chivirika ko tano i xikombiso lexi kombisiwaka hi ku tlangela loku vangelaka ku andza loku xiyekaka eka lava vaka kona eminhlanganweni ni le ku kuleni hinkwako ka bandlha.

18 Tanihi leswi hi yaka emahlweni hi kurisa vutirheli bya hina, hi tirha hi matimba entirhweni lowu nga kona, handle ko kanakana mikateko ya Yehova yi ta ya emahlweni na hina. (Luka 13:24) A hi swi tivi leswaku i ku kula ni ku engeteleka kwihi loku ku hi rindzeleke enkarhini lowu taka. Kambe hi fanele ku lunghekela ku amukela ku nghena kwihi na kwihi ka vagandzeri ka nkarhi lowu taka. Sweswo swi lava ku lunghiselela eka hina sweswi. Xisweswo, hi khongelela mikateko ni nkongomiso lowu hambetaka wa Yehova. Eku akeleni ka nkarhi lowu taka, onge hinkwerhu hi nga va vatirhi kun’we na Yehova—hi tlhelo ra miri, ra nyama ni ra moya. Entiyisweni u ta hi katekisa tanihi leswi hi khathalelaka kahle lava va hatliselaka eka nhlengeletano ya yena ya Mfumo hi nkarhi wa xiphemu xo hetelela xa masiku lawa ya makumu.—Esa. 60:8, 10, 11, 22.