Siku Ra Nkoka Swinene Hi 1991
1 Siku ra nkoka swinene eka khalendara ya hina lembe leri i Mugqivela, March 30. Loko dyambu se ri perile hi siku rero, hi ta tlangela Xitsundzuxo xa rifu ra Yesu. (1 Vakor. 11:20, 24) Ha yini siku ra ku fa ka Yesu ri endliwe siku ra xitsundzuxo xo hlawuleka?
XITSUNDZUXO—NKOKA WA XONA
2 Rifu ra Yesu a ku ri xiendlakalo xa nkoka wa hinkwako-nkwako. Loko a tsalela swirho leswi totiweke swa bandlha ra Vukriste, muapostola Pawulo u te: “Minkarhi hinkwayo loko mi dya xinkwa lexi, ni loko mi nwela exinwelweni lexi, mi vula rifu ra Hosi, yi kondza yi ta.” (1 Vakor. 11:26) Kutani ke, Xitsundzuxo xi kokela nyingiso wo hlawuleka eka nkoka wa rifu ra Yesu Kriste eku hetisiseni ka xikongomelo xa Yehova. Xi kandziyisa nhlamuselo ya rifu ra Yesu ra gandzelo, ngopfu-ngopfu mayelana ni ntwanano lowuntshwa ni ndlela leyi rifu ra yena ri khumbaka lava va nga ta va vadya-ndzhaka-kulobye eMfun’weni wa le tilweni ha yona.—Yoh. 14:2, 3; Vahev. 9:15.
3 Hi ku hlayisa vutshembeki ku kondza a fa, Yesu u kwetsimise vito ra Tata wa yena, naswona u kombise leswaku munhu la hetisekeke a a tikombisa a tshembekile eka Xikwembu ehansi ka ndzingo wa muxaka wun’wana ni wun’wana lowu Sathana a nga n’wi tiselaka wona. Nakambe rifu ra yena ri nyikele gandzelo ra munhu la hetisekeke leri lavekeke ku kutsula vana va Adamu, naswona ri endle swi koteka eka vo tala hi laha swi nga kotekaka ha kona lava nga ta kombisa ripfumelo ku hanya hi laha ku nga heriki emisaveni ya paradeyisi. Hikwalaho ka hinkwaswo leswi a swi ta hetisisiwa hi rifu ra Yesu, a swi n’wi fanela swonghasi leswaku a letela vadyondzisiwa va yena ku tsundzuka rifu ra yena.—rs matl. 266-7.
NDLELA LEYI HI NGA KOMBISAKA KU TLANGELA HA YONA
4 Misava yi na minkhuvo yo tala elembeni naswona ku endliwa swo tala leswaku yi tlakusiwa. Hi tlhelo rin’wana, Xilalelo xa Hosi i nkhuvo wu ri woxe lowu valandzeri lava tinyiketeleke, lava landzelaka mikondzo ya Yesu va lerisiweke ku wu hlayisa. Handle ko kanakana, i nkhuvo lowukulu swinene elembeni eka Vakriste hinkwavo va ntiyiso. Xana nkoka lowukulu wa ku tsundzuka Xilalelo xa Hosi a wu nge hi susumeteli ku yisa nyingiso eka xona hi March?
5 Kumbexana hi nga tinyika timinete ti nga ri tingani vhiki na vhiki hi March hi bula ni swichudeni swa hina swa Bibele hi matsalwa lama kandziyisaka nkoka wa rifu ra Kriste ivi hi swi komba xisekelo xa Xitsundzuxo. Nakambe hi nga va khutaza ku landzelerisisa swinene ku hlaya ka Bibele ka Xitsundzuxo ka March 25-30, hi laha swi kombisiweke ha kona eka 1991 Calendar of Jehovah’s Witnesses. Leswi swi nga pfuna ku engetela ku tlangela ka vona Xilalelo xa Hosi.
6 Tanihi leswi nkhuvo wa Xitsundzuxo wu nga ta va hi Mugqivela, swi ta olova eka vanhu vo tala leswaku va hlela swiyimo swa vona leswaku va va kona. Vahuweleri vo tala va langutela ku vuyeriwa hi ntiyiso wa leswaku ku na mahelo-vhiki ya ntlhanu hi March leswaku va tirha tanihi maphayona ya nkarhinyana. Leswi swi va pfumelela ku va ni ku hlanganyela lokukulu eku kandziyiseni ka nkhuvo wa Xilalelo xa Hosi. Swi nyika nkarhi lowu engetelekeke wo pfuna lava nga vantshwa ku lunghiselela miehleketo eka xiendlakalo lexi xo hlawuleka.
7 Hikwalaho ka nkoka wa nkhuvo wa Xitsundzuxo, a hi endleni hinkwaswo leswi hi nga swi kotaka ku pfuna van’wana leswaku va va kona. Switsundzuxo leswi pfunaka leswi swi nga languteriwaka hi vakulu swi nga kumiwa eka Vutirheli Bya Hina Bya Mfumo bya March 1989 na April 1990.
8 Onge hi nga tshinelela siku leri ra nkoka swinene hi 1991 hi ku twisisa lokunene ni ku tlangela loku enteke ka hinkwaswo leswi rifu ra Yesu ri vulaka swona eka vanhu. Ina, onge hinkwerhu ka hina hi nga va kona eka madyambu ya March 30, tanihi leswi nakambe vagandzeri va ntiyiso va Yehova hi ku tshembeka va yingiselaka xileriso xa Yesu xo “vula rifu ra Hosi, yi kondza yi ta.”