Xitsundzuxo—Xiendlakalo Xa Nkoka Swinene!

¹ Hi Sonto, March 23, endzhaku ka ku pela ka dyambu, hi ta tlangela Xitsundzuxo xa rifu ra Kreste. (Lk. 22:19) Lexi hakunene i xiendlakalo xa nkoka swinene! Hi ku tshama a tshembekile eka Yehovha ku fikela eku feni, Yesu u kombise leswaku swa koteka leswaku munhu a hlayisa ku tinyiketela ka yena loku hetisekeke hambiloko a ri ehansi ka ntshikilelo lowukulu, xisweswo a seketela vululami bya vuhosi bya Yehovha. (Hev. 5:8) Ku engetela kwalaho, rifu ra Kreste ri nyikele gandzelo leri hetisekeke ra munhu leri lavekaka ku kutsula vanhu, leswi nga ta endla leswaku lava kombisaka ripfumelo va hanya hilaha ku nga heriki. (Yoh. 3:16) Hi ku va kona eXitsundzuxweni, hi nga kombisa ku tlangela ka hina loku humaka embilwini ka rirhandzu ra Yehovha ni ra gandzelo ra Yesu hikwalaho ka hina.

² Hinkwerhu hi khutaziwa ku fambisana ni nongonoko wa ku hlaya ka Bibele lowu averiweke March 18-23, hilaha swi kombisiweke hakona eka 1997 Calendar of Jehovah’s Witnesses. Nakambe, bulo ra ndyangu ra tindzima 112-16 ra buku leyi nge Nghwazi Leyi Tshameke Yi Hanya ri ta pfuna ku yisa nyingiso wa hina eka vhiki ra nkoka swinene ematin’wini ya vanhu.

³ Xana u nga engetela nkarhi lowu u wu tirhisaka evutirhelini bya nsimu hi nkarhi wa nguva ya Xitsundzuxo? Vahuweleri vo tala va ta ma tirhisa swinene mahelo-vhiki ya ntlhanu ya n’hweti ya March leswaku va tirha tanihi maphayona ya nkarhinyana. Ha yini u nga vi un’wana wa vona? Hinkwerhu ka hina hi nga hlanganyela hi xitalo eku kandziyiseni ka nkoka wa ku va kona eXitsundzuxweni. Leswi xi nga ta va hi Sonto, swi ta olovela vo tala ku va kona. Tiyiseka leswaku u rhamba swichudeni hinkwaswo swa Bibele ni vanhu van’wana lava tsakelaka leswaku va hlanganyela na hina. Va hlayele leswi tsariweke eka tluka 127, ndzimana 18, ebukwini leyi nge Vutivi malunghana ni siku rin’we elembeni leri faneleke ri tlangeriwa hi ku hlawuleka.

⁴ Langutela xiendlakalo lexi xa nkoka swinene xa 1997 hi ku tlangela lokukulu eka hinkwaswo leswi rifu ra Yesu ri vulaka swona eka hina. Vana kona emadyambyini ya March 23, loko Vakreste va ntiyiso etindhawini hinkwato va tlangela Xitsundzuxo hi ku tshembeka.