Bokisi Ra Swivutiso

◼ Xana ku fanele ku endliwa yini loko ku va ni khombo laha ku tshamaka vamakwerhu?

Loko Ku Va Ni Khombo eNdhawini Ya Ka N’wina: U nga chavi. Tshama u rhurile, ivi u yisa nyingiso eka leswi nga swa nkoka hakunene—vutomi, ku nga ri nhundzu. Tikarhatele swilo leswi ndyangu wa wena wu swi lavaka hi tlhelo ra nyama hi nkarhi wolowo. Kutani tivisa vakulu malunghana ni swiyimo swa wena ni ku va byela ndhawu ya kona.

Vakulu ni malandza ya vutirheli va endla ntirho wa nkoka etimhakeni ta mphalalo. Loko ku nyikeriwa xitsundzuxo ka ha ri emahlweni malunghana ni khombo, ro tanihi swidzedze leswikulu, vamakwerhu lava va fanele va tiyiseka leswaku un’wana ni un’wana u le ndhawini leyi hlayisekeke, naswona loko nkarhi wu pfumela, va fanele va kuma swo phalala ni ku swi yisa lomu swi lavekaka kona.

Endzhaku ka sweswo, vafambisi va dyondzo ya buku va fanele va endzela ndyangu wun’wana ni wun’wana va ya vona loko va hlayisekile. Mulanguteri la ungamelaka kumbe nkulu un’wana u fanele a tivisiwa hi xiyimo xa ndyangu wun’wana ni wun’wana, hambiloko hinkwavo va hlayisekile. Loko ku ri ni loyi a nga vaviseka, vakulu va ta ringeta ku n’wi lavela mirhi yo n’wi tshungula. Va ta tlhela va va lunghiselela swilo swa nyama swo tanihi swakudya, swiambalo, byetlelo kumbe swilo swin’wana leswi lavekaka ekaya. (Yoh. 13:35; Gal. 6:10) Vakulu va vandlha va ta seketela vandlha hi tlhelo ra moya ni ra mintlhaveko naswona va ta hlela leswaku ku sunguriwa minhlangano ya vandlha hi xihatla hilaha swi nga kotekaka hakona. Endzhaku ka loko ndzavisiso hinkwawo wu endliwile, nkulu u fanele a tihlanganisa ni mulanguteri wa xifundzha hi vito ra huvo ya vakulu a n’wi tivisa loko ku ri ni la vavisekeke, ku onhaka ka Holo ya Mfumo kumbe ku onhaka ka makaya ya vamakwerhu kun’we ni swilaveko swin’wana swo hlawuleka. Kutani mulanguteri wa xifundzha u ta bela hofisi ya rhavi riqingho a va vikela hi ta xiyimo xa kona. Loko mi nga n’wi kumi mulanguteri wa xifundzha, mi nga ha tivisa hofisi ya rhavi hi ku kongoma. Hofisi ya rhavi yi ta rhumela mpimo lowukulu wo phalala lowu lavekaka.

Loko Khombo Ri Hlasela Kun’wana: Tsundzukani vamakwerhu va xinuna ni va xisati eswikhongelweni swa n’wina. (2 Kor. 1:8-11) Loko mi tsakela ku pfuneta hi mali, mi nga ha yi rhumela eka Sosayiti, laha mali ya mphalalo yi vekeriwaka etlhelo leswaku yi ta endla ntirho lowu. Adirese hi leyi: Watch Tower, Private Bag X2067, Krugersdorp, 1740. (Mint. 2:44, 45; 1 Kor. 16:1-3; 2 Kor. 9:5-7; vona Watchtower ya December 1, 1985, matluka 20-2.) Mi nga rhumeli swilo swo phalala endhawini leyi nga weriwa hi khombo handle ka loko mi komberiwe ku endla tano hi vamakwerhu lava rhangelaka. Leswi swi ta endla leswaku mintirho yo phalala yi endliwa hi nawu naswona swilo swi averiwa hi ndlela leyi hlelekeke. (1 Kor. 14:40) Hi kombela leswaku mi nga beli Sosayiti riqingho swi nga fanelanga, tanihi leswi ku endla tano swi nga sivelaka tiqingho leti fanelaka ku nghena leti humaka endhawini leyi weriweke hi khombo.

Endzhaku ka loko ku hleriwile, Sosayiti yi ta boha loko ku fanele ku vumbiwa komiti ya mphalalo. Vamakwerhu lava nga ni vutihlamuleri va ta tivisiwa. Hinkwavo va fanele va tirhisana ni vakulu lava rhangelaka leswaku vamakwerhu lava nga ekhombyeni va ta pfuniwa hi mfanelo.—Vona buku leyi nge Timbhoni Ta Yehovha I Vahuweleri Va Mfumo Wa Xikwembu, matluka 310-15.