Ku Pfuneta Endzhaku Ka Loko Ku Ve Ni Mhangu

Timhangu ta ntumbuluko i tshamelo maxelo namuntlha. Loko ku ri ni mhangu, matshalatshala yo phalala ma fanele ma va ma hleriwe kahle naswona ma languteriwa hi xiyimo xa le henhla. Hikwalaho ka sweswo, Huvo Leyi Fumaka yi hlele leswaku ku va ni Ndzawulo Ya Mphalalo eka hofisi ya rhavi rin’wana ni rin’wana.

Loko vamakwerhu eka ndzawulo yoleyo va twa hi mhangu leyi veke kona, hi xihatla va fonela vakulu va le ndhawini yoleyo ku tiva leswaku vahuweleri va nga pfuniwa njhani. Loko mhangu yi onhile swinene lerova vahuweleri a va nge swi koti ku pfunana, rhavi ri ta avela vamakwerhu lava leteriweke leswaku va ya pfuneta hi ntirho wo phalala. Vamakwerhu lava va nga kombela vamakwerhu leswaku va ta pfuneta kumbe va nyikela hi swilo swo karhi kumbe va nga ha xava kutani va phakela vamakwerhu swilo leswi va swi lavaka.

Ku ni mbuyelo lowunene loko swilo swi endliwa hi ndlela leyi. Swi endla ku nga vi na swintirhwantirhwana swo tala, a swi hlangahlanganisi nhloko naswona swi endla leswaku mali ni switirhisiwa swin’wana swi tirhisiwa kahle, ku nga leswi nga ha endlekaka loko vamakwerhu va tiendlela swilo hi voxe.

Vamakwerhu lava hlawuriweke va ta languta leswaku ku ta laveka mali muni ni leswaku ku ta laveka vanhu vangani ku ta pfuneta eka ntirho wo phalala. Va nga tlhela va bula ni varhangeri va le ndhawini yoleyo lava nga hi pfunaka leswaku hi hatla hi phalala vamakwerhu. Hikwalaho, mi nga vo na swi pfuketana mi sungula ku koleka minyikelo, mi rhumela swilo swo phalala kumbe mi endzela tindhawu leti khumbekeke loko mi nga komberiwanga ku endla tano.

Nilokoswiritano, loko ku ri ni mhangu hi fanele hi pfuneta. (Hv 13:16) Ha va rhandza vamakwerhu! Hi nga va pfuna njhani? Nchumu wa nkoka, i ku khongelela lava khumbekeke hikwalaho ka mhangu ni ku khongelela lava phalalaka. Hi nga tlhela hi nyikela eka minyikelo ya ntirho wa misava hinkwayo. Hi ku kongomisiwa hi Huvo Leyi Fumaka, tihofisi ta marhavi ta swi tiva leswaku minyikelo yoleyo yi nga tirhisiwa kwihi hi ndlela leyinene. Loko hi lava ku pfuneta hi nga kombisa leswaku ha kumeka hi ku va hi tata fomo ya Local Design/Construction Volunteer Application (DC-50).

HLALELANI VHIDIYO LEYI NGE, NDHAMBI YO CHAVISA SWINENE EBRAZIL KUTANI MI HLAMULA XIVUTISO LEXI LANDZELAKA:

I yini leswi ku tsakisaka hi matshalatshala yo phalala ya Timbhoni ta Yehovha endzhaku ka ndhambi leyi a yi ri kona eBrazil hi 2020?