Xana Timbhoni Ta Yehovha Ta Phalala Loko Ku Ri Ni Mhangu?

Ina, hakanyingi Timbhoni ta Yehovha ta hoxa xandla loko ku tshuka ku va ni mhangu. Hi phalala vanhu hinkwavo, Timbhoni ni lava nga riki Timbhoni hilaha xitsundzuxo xa le Bibeleni eka Vagalatiya 6:10, xi vulaka ha kona: “A hi endleleni hinkwavo leswi nga swinene, kambe ngopfu-ngopfu lava nga swin’we na hina eripfumelweni.” Hi tlhela hi ringeta ku chavelela vanhu lava weriweke hi mhangu.—2 Vakorinto 1:3, 4.

Nhlengeletano

Endzhaku ka mhangu, vakulu va le mavandlheni ya laha ku nga ni mhangu, va ringeta ku tihlanganisa ni vanhu lava hlanganyelaka emavandlheni ya kwalaho ku vona loko va ha hlayisekile ni loko va lava mpfuno. Endzhaku ka sweswo, vakulu va vikela rhavi ra Timbhoni ta Yehovha ra kwalaho malunghana ni leswi va swi endleke ni mphalalo lowu va wu nyikeleke.

Loko mavandlha ya kwalaho ma nga swi koti ku pfuneta eka mphalalo lowu lavekaka, Huvo Leyi Fumaka ya Timbhoni ta Yehovha yi endla malunghiselelo yo pfuna hi swilo leswi lavekaka. Leswi swi yelana ni leswi a swi endliwa hi Vakreste vo sungula lava a va khathalelana hi nkarhi wa ndlala. (1 Vakorinto 16:1-4) Rhavi ra kwalaho ri hlawula Tikomiti Ta Xilamulela-mhangu leswaku ti lunghiselela ni ku kongomisa ntirho wo phalala. Timbhoni ta le tindhawini tin’wana ti nyikela hi nkarhi ni hi swilo swin’wana swo phalala ha swona.—Swivuriso 17:17.

Mali

Ndlela yin’wana leyi minyikelo yi rhumeriwaka erhavini ra Timbhoni ta Yehovha yi tirhiseriwaka swona, i ku phalala lava weriweke hi timhangu. (Mintirho 11:27-30; 2 Vakorinto 8:13-15) Leswi ntirho hinkwawo wu endliwaka hi vatirhi vo tirhandzela lava nga hakeriwiki, mali leyi nyikeriwaka yi tirha ntirho wo phalala. Hi yi tirhisa hi vurhon’wana minyikelo hinkwayo.—2 Vakorinto 8:20.