Xana Hi Nga Pfuna Njhani?
1 Xivutiso lexi nge, “Xana hi nga pfuna njhani?” xi tala ku vutisiwa hi Timbhoni ta Yehovha loko ti twa hi ta mhangu leyi humeleleke ematikweni man’wana. Hilaha rungula leri nga eka Mintirho 11:27-30 ri kombaka hakona, Vakreste va lembe-xidzana ro sungula va phalale vamakwerhu va le Yudiya lava a va hlaseriwe hi ndlala.
2 Manguva lawa, nhlengeletano ya hina yi ni timfanelo leti yi pfumelelaka ku tirhisa mali ku pfuna lava nga evuswetini ni lava lavaka ku phalariwa hikwalaho ko hlaseriwa hi makhombo ya ntumbuluko kumbe lama endliwaka hi vanhu ni loko ku ri ni xilaveko.
3 Hi xikombiso, n’wexemu vamakwerhu vo tala va nyikerile leswaku ku pfuniwa lava weriweke hi khombo ra tsunami le Asia Dzonga. Ya tlangeriwa swinene minyikelo leyi sukaka embilwini, leyi hoxiweke enkwameni wa nhlengeletano wo phalala. Hambiswiritano, loko munhu a humesa mali leswaku yi tirhisiwa eka khombo ro karhi, matiko man’wana ma lava leswaku yi tirhiseriwa ntsena xikongomelo xexo naswona ku nga si hundza nkarhi wo karhi, ku nga khathariseki leswaku swilaveko swa vamakwerhu swi khathaleriwile kumbe a swi khathaleriwanga.
4 Hikwalaho ka sweswo, ku bumabumeriwa leswaku minyikelo yo phalala ni ku pfuna laha ku nga ni xilaveko yi hoxiwa eka nkwama wa ntirho wa misava hinkwayo. Nkwama lowu wu tirhiseriwa ku pfuna laha ku nga ni xilaveko ni ku yisa emahlweni swilaveko swa moya swa vamakwerhu. Loko swo endleka leswaku munhu a lava ku nyikela hi ku kongoma enkwameni wo phalala, munyikelo wa yena wa ha ta amukeriwa naswona wu ta tirhisiwa loko ku ri ni xilaveko xexo. Hambiswiritano, swi nga tlangeriwa loko minyikelo yo tano yo nyikeriwa handle ka swipimelo.
5 Loko hi humesa minyikelo ya hina hi ku kongoma enkwameni wa ntirho wa misava hinkwayo, hi endla leswaku ku va ni mali leyi ringaneke ku khathalela swilaveko hinkwaswo swa ntirho wa Mfumo ku ri ni ku va mali yi tshama yi rindza loko ku va ni khombo. Leswi swi fambisana ni leswi hlamuseriweke eka Vaefesa 4:16, leswaku hi tirha swin’we ku pfuna van’wana, “leswaku miri wu kula wu akeka hi rirhandzu.”