Xana U Swi Lunghekerile Ku Langutana Ni Mhangu Ya Ntumbuluko?

1. Ha yini ku ri vutlhari ku tshama hi lunghekele timhangu ta ntumbuluko?

¹ Lembe ni lembe, vanhu va timiliyoni emisaveni hinkwayo ku katsa ni vamakwerhu, va hlaseriwa hi ku tsekatseka ka misava, ti-tsunami, swidzedze leswi fambisanaka ni timpfula letikulu ni tindhambhi. Tanihi leswi timhangu ta ntumbuluko ti hlaselaka hi xitshuketa naswona ti nga khumbaka un’wana ni un’wana wa hina, i vutlhari ku tshama hi lunghekile loko to tshuka ti hlasela.—Swiv. 21:5.

2. Ha yini vakulu va fanele ku tshama va ri ni tiadirese ni tinomboro ta hina ta tinqingho leti tirhaka?

² Loko Ti Nga Si Hlasela: Minkarhi yin’wana vatirhela-mfumo va swi kota ku lemukisa hi timhangu ti nga si hlasela. I swa nkoka ku swi tekela enhlokweni swilemukiso sweswo. (Swiv. 22:3) Loko xilemukiso xo tano xi twarisiwile, vakulu va ta ringeta ku tivisa mavandlha hinkwawo leswaku ma ta kota ku lungheka. Endzhaku ka loko mhangu yi hlaserile, vakulu va ta ringeta ku vulavurisana ni muhuweleri ha wun’we wa vandlha, ku vona loko ku ri ni lava vavisekeke niloko ku ri ni leswi va nga va pfunaka ha swona. Loko vakulu va nga ri na tinomboro leti tirhaka ta tinqingho, va nga heta nkarhi wo tala va ri karhi va ringeta ku kumisisa lomu vahuweleri va nga kona. Hikwalaho i swa nkoka leswaku vahuweleri va nyika matsalana ni mulanguteri wa dyondzo ya vona ya buku tiadirese ni tinomboro ta riqingho leti tirhaka.

3. Xana hi nga tirhisana njhani ni vamakwerhu loko hi tshama endhawini leyi talaka ku hlaseriwa hi timhangu?

³ Loko vandlha ri ri endhawini leyi talaka ku hlaseriwa hi timhangu, vakulu va nga ha kombela vahuweleri leswaku va va nyika mavito ni tinomboro ta tinqingho ta maxaka kumbe vanghana lava tshamaka emugangeni wolowo, lava ku nga vulavuriwaka na vona loko ko tshuka ku ve ni mhangu. Leswi swi ta pfuna vakulu ku tiva loko ku ri ni vahuweleri lava balekeleke kun’wana. Nakambe vakulu va nga ha pfuna vahuweleri leswaku va tshama va ri ni swilo swo karhi leswi va nga tipfunaka ha swona loko mhangu yi hlasela, malunghiselelo yo kuma vutumbelo ni ndlela leyi lava lavaka mpfuno wo hlawuleka va nga pfuniwaka ha yona. I swa nkoka ku tirhisana ni vamakwerhu eka malunghiselelo lawa ya rirhandzu.—Hev. 13:17.

4. Xana hi fanele hi endla yini loko mhangu yo hlasela endhawini leyi hi tshamaka eka yona?

⁴ Loko Mhangu Yi Hundzile: Xana u fanele u endla yini loko mhangu yo hlasela endhawini leyi u tshamaka eka yona? Tiyiseka leswaku vandyangu wa wena va kuma swilo leswi va swi pfumalaka. Loko u swi kota, pfuna ni van’wana lava hlaseriweke hi mhangu yoleyo. Ringeta ku vulavurisana ni mulanguteri wa dyondzo ya buku kumbe nkulu un’wana hi ku hatlisa hilaha u nga kotaka hakona. U fanele u endla tano hambiloko ku ri leswaku u ponile eka mhangu yoleyo. Loko u lava mpfuno, tiyiseka leswaku vamakwenu va karhi va endla hinkwaswo leswi va nga swi kotaka leswaku va ku pfuna. (1 Kor. 13:4, 7) U nga rivali leswaku Yehovha wa xi vona xiyimo lexi u langutaneke na xona; tiyiseka leswaku u ta ku pfuna. (Ps. 37:39; 62:8) Tshama u lunghekele ku pfuna van’wana hi tlhelo ra moya ni ku va chavelela. (2 Kor. 1:3, 4) Hatla u vuyela eka xiyimiso xa wena xa mintirho ya swa moya.—Mat. 6:33.

5. Ku chava timhangu swi hi khumba njhani tanihi Vakreste?

⁵ Hambileswi vanhu emisaveni hinkwayo va nga dyiki byi rhelela loko va anakanya hi timhangu, kambe hi nga va ni ntshembo wa leswaku vumundzuku bya hina byi ta va lebyi tsakisaka. Ku nga ri khale, timhangu hinkwato a ti nge he vi kona. (Nhlav. 21:4) Swa sweswi, a hi tekeni magoza lama lavekaka leswaku hi lunghekela ku langutana ni timhangu leti nga ha hlaselaka ni swiyimo swo tika leswi nga hi welaka, kambe hi tshama hi ri lava hisekelaka ku byela van’wana mahungu lamanene.