Ku Pfuna Hinkwavo Lava Tsakeleke

 ¹ Ripfumelo ra hina ni ku rhandza van’wana swi ta hi susumeta hi March leswaku hi pfuna ni ku rhamba hinkwavo lava tsakeleke rungula ra Mfumo, hi va rhambela eXitsundzuxweni. Vanhu vo tano va lava ku yisiwa elunghiselelweni ra Yehovha ra ku ponisiwa, leri titshegeke hi gandzelo ra nkutsulo ra Kreste.​​—⁠⁠Hev. 9:⁠28.

 ² I swinene ku tsala mavito ya lava u lavaka ku va rhambela eXitsundzuxweni. Katsa ni lava hambaka va va kona eminhlanganweni swin’we ni lava a va dyondza eku sunguleni kumbe va komba ku tsakela hi tindlela to karhi. U nga rivali vanghana va vukati lava nga pfumeriki ni swirho swin’wana swa ndyangu. Endzhaku ko va tsala ehansi, endla matshalatshala yo hlawuleka yo endzela un’wana ni un’wana. U nga ha kombela vakulu va ku pfuna eku endleni ka maendzo man’wana.

 ³ U nga ku yini loko u endza?

Endzhaku ko pfuxelana khwatsi, u nga ha vula swo fana ni leswi:

◼ “Enkarhini lowu hundzeke a wu tsakela swilo swa moya, naswona ndzi vona onge u nga xi tsakela xirhambo lexi xa xiendlakalo xo hlawuleka. [Nyika n’wini wa muti xirhambo lexi gandlisiweke xa Xitsundzuxo.] Xitsundzuxo xa rifu ra Kreste hi xona ntsena xiendlakalo lexi Hosi Yesu Kreste a leriseke valandzeri vakwe leswaku va xi tlangela. Hi langutele ku pfuxeta leswi Kreste a swi endleke hi rifu ra yena ni leswaku hi nga byi kuma njhani vutomi lebyi nga heriki ha rona. N’wexemu, lava a va ri kona eka nhlangano lowu wo hlawuleka a va tlula 11 wa timiliyoni. Ndzi nga tsaka loko wo famba na mina hi ya kona nan’waka.” Tiyiseka leswaku u tsala nkarhi ni ndhawu leyi vandlha ra ka n’wina ri nga ta tlangela Xitsundzuxo eka yona. Nakambe, lunghiselela swo famba ha swona loko swi laveka.

 ⁴ Loko lavantshwa va ta eXitsundzuxweni, va fanele va titwa va amukelekile. Va pfune va tolovelana ni vahuweleri va vandlha, u va tivisa vanhu lava tsakelaka lava kumbexana va tshamaka ekusuhi na vona. Swi ta va khutaza ku vona leswaku vanhu vo tala lomu va tshamaka kona va tsakela ntiyiso. Va rhambe leswaku va ta tshama ni ndyangu wa ka n’wina hi nkarhi wa Xitsundzuxo loko sweswo swi koteka.

 ⁵ Ina, ku va kona ntsena eXitsundzuxweni a ku nge va ponisi. Kambe eka vo tala lava u va rhambaka, ku nga ha va goza ra vona ro sungula leswaku va pfumela engatini ya Yesu leyi halatiweke. Loko mi huma eka nhlangano lowu mi ya ekaya, vutisa muendzi loko a ta swi tsakela ku va kona eka Nhlangano wa le Rivaleni ni le ka Dyondzo ya Xihondzo xo Rindza hi Sonto leyi landzelaka. Kombisa tintswalo ni ku va la pfunaka. N’wi endle a swi tiva leswaku wa swi tsakela ku pfuna hi ndlela yihi na yihi leyi kotekaka. Loko a sungula ku hlanganyela na hina nkarhi na nkarhi, nhluvuko wa yena wa moya wu ta hatlisa. Mayana ntsako lowu hi nga ta va na wona hi ku pona “nhlomulo lowukulu” swin’we ni van’wana vo tala lava hi nga ha vaka hi kote ku va pfuna!​​—⁠⁠Nhlav. 7:​9, 14.