Cinca-cinca eVutirhelini Bya Wena
1 Van’wana va te, ku cinca-cinca i xitshongo xa vutomi. Hakanyingi, ku sungula mhaka hi ndlela leyi hambaneke swi nga yi endla yi tsakisa swinene. Leswi swi tano evutirhelini bya hina. Loko hi nga tivoneli, marungula ya hina ya yindlu na yindlu ma nga va nchumu wun’we. Ku phindha-phindha swingheniso leswi fanaka swi nga hi karhata hina swin’we ni vini va miti. Hikwalaho, cinca-cinca evutirhelini bya wena. Kambe u nga swi endlisa ku yini leswi?
2 Ematshan’weni yo vula u ku, ‘Avuxeni. Hi endzela vaakelani va hina hi mahungu lamanene ya Mfumo,’ ha yini u nga ehleketi hi tindlela to cinca-cinca marito ya wena yo sungula ha wona? Buku leyi nge Reasoning yi ni rungula ro tala malunghana ni swingheniso. Eka matluka 9-15, ku ni swingheniso swa tinhloko-mhaka to hambana ta 18. Naswona ku ni swingheniso swimbirhi, swinharhu kumbe ku tlula eka tinhloko-mhaka to tala.
3 Loko u tirhisa broxara leyi nge “Xana Xikwembu Xa Hi Khathalela Hakunene?,” xingheniso lexi xi humaka eka xiyenge lexi nge “Life/Happiness” eka tluka 13 xi nga ha pfuna:
◼ “Hi vulavurisana ni vanhu lava khumbekaka ngopfu hi nkoka wa vutomi namuntlha. Van’wana va vutisa, Xana vutomi lebyi nga ni ntsako wa ntiyiso byi kona? Broxara leyi yi komba langutelo leri khutazaka ni leri tlhontlhaka miehleketo.” Pfula broxara eka tluka 25 ivi u hlaya yinhla-nkulu yin’we kumbe timbirhi eka tindzimana 15 na 16.
4 Vahuweleri van’wana va Mfumo—ngopfu-ngopfu lavatsongo ni lavantshwa swin’we ni lavakulu—va kume leswaku ku tshinelela loku tsakisaka emutini ku nga endliwa hi ku tirhisa swiphephana.
Muhuweleri lontsongo a nga ha tirhisa xiphephana lexi nge “Xana Misava Leyi Yi Ta Pona?” ivi a ku:
◼ “Ndzi ku khomele rungula ro koma malunghana ni vumundzuku bya misava leyi. Ndzi tsakela ku ku nyika xiphephana lexi nge Xana Misava Leyi Yi Ta Pona?” Muhuweleri lonkulu la tirhaka ni munhu lontsongo a nga ha vona leswaku u fanele a engetela mavonelo kumbe tinhlamuselo tin’wana, hi ku ya hi maangulelo ya n’wini wa muti.
5 Loko n’wini wa muti a komba ku tsakela, muhuweleri lonkulu a nga ha ku:
◼ “Vona swifaniso leswi swimbirhi, xin’we i xa xihaha-mpfhuka lexi wisetelaka tibomo hi nkarhi wa nyimpi, lexin’wana i xa n’wana la sikaka. [Pfula eka tluka 5.] Languta swifaniso leswi swa ku tsekatseka ka misava ni munhu la vabyaka a ri emubedweni exibedlhele. [Yimanyana.] Bibele yi komba leswaku swilo swo tano swo chavisa swi ta hela ku nga ri khale.” Kutani hlaya Nhlavutelo 21:4, 5 na Pisalema 46:8, 9.
6 Loko u fambisa buku leyi nge Ku Chaputa Ka Nhlavutelo, hikwalaho ka yini u nga kandziyisi langutelo lerinene ra vumundzuku leri kombisiwaka eka Nhlavutelo 21:3, 4? Kutani u hlaya ndzimana 7 eka tluka 303 ebukwini. Vutisa n’wini wa muti leswaku xana swa twisiseka ku pfumela leswaku Xikwembu xi ta hetisisa switshembiso leswi. Bulo ro koma ra vuprofeta bya Bibele lebyi se byi hetisekeke ri fanele ri tiyisa ntshembo wa n’wini wa muti wa leswaku Xikwembu xi nga swi kota ku katekisa rixaka ra vanhu.
7 Hinkwavo vahuweleri va Mfumo va lava ku hlanganyela eku antswiseni ka swilaveko swa le tilweni, va byala timbewu ta ntiyiso lomu swi kotekaka kona ni ku hlakulela ku tsakela loku kombisiwaka. Loko se hi endle ntirho wa hina, hi ntsako hi nga siya ku andza kwihi ni kwihi ka nkarhi lowu taka emavokweni ya Yehovha. Hi ni mahungu lamanene yo ma avela vaakelani va hina. Loko hi lunghekile nkarhi hinkwawo, hi nga cinca-cinca eku nyikeleni ka rungula ra Mfumo ni ku ehleketelela loko hi fambisa tibuku.