Swingheniso Swo Pfuxa Ku Tsakela
1 Yesu a a humelela eku tirhiseni ka swingheniso. Hambi loko a vulavula ni ntshungu kumbe munhu un’we, Yesu a koka nyingiso wa vayingiseri vakwe hi ku va endla va katseka ha un’we-un’we. U kombe vayingiseri vakwe ntikelo wa mhaka ya yena.—Mt. 5:3-12; Yoh. 4:7-30.
2 Ku Lunghiselela Ka Ha Ri Ni Nkarhi I Ka Nkoka: Leswaku hi pfuxa ku tsakela eka rungula ra hina, hi fanele hi endla leswaku swingheniso swa hina swi katsa munhu, swi yelana ni timhaka ta yena naswona hi komba leswaku rungula ra Mfumo ri ta n’wi pfuna.
3 Loko u lunghiselela vutirheli, kamba swilo swa nkarhi wolowo leswi khumbaka vanhu va kwalaho. Xana timhaka ta mahungu ta sweswinyana ti koke nyingiso wa un’wana ni un’wana? I yini lexi nga ta tsakisa muntshwa? Munhu lonkulu? Vavanuna, vavasati kumbe vatswari? Ematshan’wini yo tirhisa xingheniso xin’we eka kaya rin’wana ni rin’wana, hakanyingi swa humelela ku lunghiselela swingheniso swo hlayanyana swo hambana, naswona u lunghekela ku swi cinca hi ku vona n’wangulo wa n’wini wa muti. Vahuweleri van’wana va humelele kahle eku lunghiseleleni ni ku tirhisa swingheniso swo hambana-hambana swa buku leyi nge Reasoning nkarhi wun’wana ni wun’wana loko va ya evutirhelini bya yindlu na yindlu. (rs matl. 9-15) Leswi swi hlayisa ku tshinelela ka vona ku ri kunene naswona ku tsakisa.
4 En’hwetini ya August, u nga ha tsakela ku tirhisa rungula ro fana ni leri:
◼ “Xewani. Hi vulavurisana ni vaakelani mayelana ni timfanelo leti va lavaka ku tivona eka munhu loyi a fumaka van’wana. Xana ndzi nga ku vutisa leswaku i timfanelo tihi timbirhi kumbe tinharhu leti u ehleketaka leswaku i ta nkoka ngopfu? [Yimela nhlamulo. Amukela tinhla takwe. Pfumela loko swi fanerile.] Xana a wu swi tiva leswaku Bibele yi hlamusela timfanelo ta Loyi a vekiweke ku va mufumi wa vanhu? Ti laha eka Esaya 9:6, 7. [Hlaya.] U ehleketa leswaku swi nga va njhani ku hanya ehansi ka mulawuri wo tano?” Yimela nhlamulo ivi u yisa nyingiso eka Pisalema 146:3, 4 ni mhaka leyi nga ebukwini leyi nge Reasoning eka matluka 153-4 malunghana ni nkoka lowu tiyisiweke wa ku fuma ka Yesu. Kumbe buku leyi nge Nghwazi, ndzima 133, yi nga ha tirhisiwa ku pfuxa bulo rin’wana.
5 Loko u vulavurisana ni vanhu lava rhandzaka vukhongeri, rungula leri landzelaka ri nga ha humelela kahle loko u fambisa buku leyi nge Nghwazi.
Endzhaku ko xewetana, u nga ha ku:
◼ “I yini lexi Xikwembu xi xi langutelaka eka hina tanihi Vakreste? Bibele yi hi byela leswaku hi tekelela xikombiso lexi vekiweke hi nghwazi ya misava, Yesu Kreste. [Hlaya 1 Petro 2:21.] U dyondzise valandzeri vakwe leswaku va rhandza vaakelani va vona, va tshama va basile emahanyelweni naswona va khongelela ku ta ka Mfumo wa Xikwembu. Ku ponisiwa ka hina ku titshege hi ku xiya ni ku yingisa Yesu tanihi Muponisi wa hina. [Hlaya Yohane 14:6.] Yesu a nga ri munhu la tolovelekeke. Buku leyi yi n’wi hlamusela tanihi nghwazi leyi tshameke yi hanya. Tanihi leswi hi nga ta ponisiwa ha yena, xana a wu ehleketi leswaku ku ni xilaveko xa leswaku hi dyondza swo tala hi laha swi kotekaka ha kona mayelana ni mintirho yakwe ni leswi a swi dyondziseke? Buku leyi yi lunghiseleriwe sweswo, naswona ndzi nga tsakela ku ku kumela yona.”
6 Hi ku tekelela tindlela ta Yesu ta ku pfuxa ku tsakela ni ku katsa vayingiseri emabulwini, hi komba vanhu va timbilu letinene ntikelo wa swilo swa moya.