Xana Wa Yi Tirhisa Buku Leyi Nge Ku Hlamulana?
1. Hi yihi ndlela leyi muapostola Pawulo na Yesu a va dyondzisa ha yona?
1 Muapostola Pawulo a a tiyimisele ku ‘kanerisana ni van’wana hi Matsalwa.’ (Mint. 17:2, 3; 18:19) Hi ndlela yoleyo a a tekelela Yesu loyi nkarhi ni nkarhi a a tshaha Matsalwa ni ku tirhisa swifaniso leswaku a pfuna vayingiseri vakwe leswaku va twisisa ku rhandza ka Xikwembu. (Mat. 12:1-12) Buku leyi nge Ku Hlamulana Hi Matsalwa yi endleriwe ku hi pfuna leswaku hi endla leswi fanaka.
2. Xana hi nga yi tirhisa njhani buku leyi nge Ku Hlamulana leswaku hi lunghiselela swingheniso leswi tirhaka?
2 Ku Lunghiselela Swingheniso Leswi Tirhaka: Buku leyi nge Ku Hlamulana Hi Matsalwa eka matluka 9-15 yi ni swingheniso leswi nga endlaka munhu a tsakela ku dyondza Bibele. Ku dyondza ni ku tirhisa swingheniso swo hambana-hambana, ngopfu-ngopfu loko nsimu ya n’wina mi yi tirha hi ku phindha-phindha swi ta ku pfuna leswaku u cinca-cinca ndlela leyi u sungulaka mabulo ha yona. U nga ha hlaya swingheniso hi ku kongoma ebukwini yoleyo loko u chumayela hi riqingho kumbe loko u vulavula ni munhu hi interfone emiakweni leyi swi nga oloviki ku nghena eka yona.
3. Hi rihi rungula leri nga eka matluka 16-24 ya buku leyi nge Ku Hlamulana leri nga hi pfunaka ensin’wini?
3 Leswi U Nga Swi Vulaka Loko Vanhu Va Ringeta Ku Siva Bulo: Tshama u lunghekile, hi ku va u tirhisa timinete ti nga ri tingani u nga si ya ensin’wini u pfuxeta matluka 16-21 leswaku u tiva ndlela leyi u faneleke u va hlamula ha yona vanhu lava nga ta ringeta ku siva bulo ensin’wini ya n’wina. Xana vini va miti yin’wana ensin’wini ya n’wina i Mabudha, Mahindu, Mayuda kumbe Mamoslem? Loko swi ri tano, rungula leri nga eka matluka 21-24 ri ta ku pfuna.
4. Hi nga yi tirhisa njhani buku leyi nge Ku Hlamulana loko hi vutisiwa xivutiso kumbe loko munhu a hi kaneta?
4 Ku Hlamula Swivutiso: Buku leyi nge Ku Hlamulana yi nga hi pfuna loko hi vutisiwa xivutiso kumbe loko munhu a hi kaneta. U nga byela munhu yoloye leswaku u lava ku n’wi komba mhaka yin’wana leyi tsakisaka leyi nga ebukwini leyi nge Ku Hlamulana. Leswi tinhloko-mhaka ta kona ti longoloxiweke hi ku landzelelana ka maletere, pfula eka nhloko-mhaka leyi nga ni rungula leri u ri lavaka. Kutani u lava swivutiso leswi tsariweke hi marito yo dzwihala. Loko u nga swi kumi hi ku hatlisa leswi u swi lavaka, pfula eka xikombo lexi nga emakumu ka buku. Loko u kuma rungula leri u ri lavaka pfula eka tluka ra kona kutani u ri hlaya hi ku kongoma. Loko mi bula hi matsalwa yo karhi, u nga ha kuma leswi u swi lavaka eka tluka 445 ehansi ka “Matsalwa Lawa Hakanyingi Ma Tirhisiwaka Hi Ndlela Leyi Hoxeke.”
5. Hi tihi tindlela tin’wana leti buku leyi nge Ku Hlamulana yi pfunaka ha tona?
5 Swiyimo Swin’wana Leswi U Nga Yi Tirhisaka Eka Swona: Vahuweleri van’wana va tshama va ri ni buku leyi nge Ku Hlamulana loko va ri entirhweni kumbe exikolweni leswaku yi ta va pfuna ku hlamula swivutiso swo tanihi lexi nge, ‘Ha yini mi nga ti tlangeli tiholideyi?’ Vantshwa va ri kume ri va pfuna rungula leri nga ehansi ka nhloko-mhaka leyi nge “Ntumbuluko” ni leyi nge “Hundzuluko” loko va tsala switsalwana exikolweni. Xana ku ni muvabyi loyi u nga ta n’wi endzela kumbe munhu la feriweke? Rungula leri nga ehansi ka nhloko-mhaka leyi nge “Xikhutazo” ri ta ku pfuna leswaku u n’wi chavelela hi Matsalwa. Nakambe buku leyi yi ni rungula leri nga pfunaka lava lunghiselelaka tinkulumo ni lava fambisaka minhlangano ya nsimu.
6. Hi yihi pakani leyi hi lavaka ku yi fikelela loko hi ri karhi hi chumayela?
6 Loko hi ri eku chumayeleni, xikongomelo xa hina a hi ku kanetana na vanhu; kambe i ku va nyika rungula leri nga ta va pfuna. Hi lava ku tirhisa Matsalwa hi vutlhari loko hi ri karhi hi bula na vona. Loko hi yi tirhisa hi ndlela leyinene buku leyi nge Ku Hlamulana, hi kombisa leswaku hi tiyimisele ku dyondzisa hi ndlela leyinene.—1 Tim. 4:16.