Ndlela Yo Hlakulela Vuswikoti Byo Hlamulana Ni Vanhu

¹ Nhlamuselo yin’wana ya xiga lexi nge “ku hlamulana” i “ku vulavula ni munhu hi xikongomelo xo n’wi susumetela ku endla kumbe ku anakanya swo karhi.” Leswaku u kota ku antswisa vutirheli bya wena hi ndlela leyi humelelaka, u fanele u hlakulela vuswikoti bya ku hlamulana ni vanhu lava u hlanganaka na vona. (Mint. 17:2-4) Xana u nga byi hlakulela hi ndlela yihi vuswikoti lebyi?

² Masungulo Ya Byona I Ku Anakanyisisa: Loko u ri karhi u dyondza mintiyiso ya Bibele, swi ta ku pfuna ku anakanyisisa hi leswi u swi dyondzeke. Loko tinhla tin’wana ti nga twisiseki kahle, tinyike nkarhi wo endla ndzavisiso ivi u tlhela u anakanyisisa ha tona. U nga tikarhateli ku twisisa ntsena tinhlamuselo leti nyikeriweke kambe u fanele u twisisa ni swivangelo swa Matsalwa leswi tinhlamuselo ti sekeriweke eka swona.

³ Ku Lunghiselela Vutirheli Swa Laveka: Anakanya hi ndlela leyi u nga ta hlamusela ntiyiso ha yona eka vanhu vo hambana-hambana. Vana ni xivutiso lexi tlhontlhaka mianakanyo lexi u nga ta xi vutisa leswaku u pfuxa ku tsakela ka vanhu. Hlanganisa xivutiso lexi ni yinhla leyi nga eMatsalweni u tlhela u yi hlamusela. Anakanya hi ku kanetiwa loku u nga langutanaka na kona u tlhela u anakanya hi leswi u nga swi vulaka loko u kanetiwa. Hlawula yinhla leyi munhu a nga ta yi tsakela eka buku leyi u nga ta yi fambisa.

⁴ Tekelela Xikombiso Xa Yesu: Yesu u veke xikombiso lexinene ngopfu mayelana ni ku hlamulana ni vanhu hi Matsalwa hi ndlela leyi humelelaka. Loko u lava ku kambisisa madyondziselo yakwe, hlaya mhaka leyi nga eka Luka 10:25-37. Xiya endlelo leri: (1) Tirhisa Matsalwa loko u hlamula swivutiso leswi vanhu va ku vutisaka swona. (2) Kombela vanhu lava leswaku va tiphofula, va bumabumele loko va hlamule hi vutlharhi. (3) Nkarhi hinkwawo tiyiseka leswaku xivutiso ni Matsalwa swa pfumelelana. (4) Leswaku u tiyisekisa leswaku vanhu va wu twisisa mongo wa nhlamulo leyi u yi nyikelaka, tirhisa xifaniso lexi nga ta fikelela mbilu.—Vona Xihondzo xo Rindza xa March 1, 1986, matluka 27-8, tindzimana 8-10.

⁵ Tirhisa Xitirho Lexi Hi Nyikiweke Xona: Buku leyi nge Ku Hlamulana Hi Matsalwa yi kandziyisiwe hi xikongomelo xa leswaku yi ta tirhisiwa evutirhelini bya nsimu. Swingheniso swa yona, tindlela ta ku hlamula vanhu lava lavaka ku siva bulo ni tinhla ta yona leti twalaka, ti ta hi pfuna ku hlakulela vuswikoti bya ku hlamulana ni vanhu. Buku leyi nge Ku Hlamulana i xitirho xa risima lexi nkarhi hinkwawo hi faneleke hi famba na xona evutirhelini naswona hi nga kanakani ku xi tirhisa loko hi burisana ni vanhu hi rungula leri sekeriweke eBibeleni. Hlaya rungula leri nga eka matluka 7-8 leswaku u dyondza tindlela ta ku tirhisa buku leyi hi ndlela leyi vuyerisaka swinene.

⁶ Loko u hlakulela vuswikoti bya ku hlamulana ni vanhu, u ta antswisa vutshila bya wena entirhweni wo chumayela ni ku dyondzisa. Hi ndlela leyi, wena kun’we ni lava u hlanganaka na vona evutirhelini bya nsimu, mi ta kuma mikateko yo tala.