Ku Vulavulela Buku Leyi Nge Hanya Hi Masiku Hi Laha Ku Humelelaka
1 Yesu a a ri ni vuswikoti eku tirhiseni ka yena swingheniso. A a tiva leswi a faneleke ku swi vula leswaku a pfuxa ku tsakela. Siku rin’wana u sungule bulo ni wansati wa Musamariya hi ku kombela mati yo nwa ntsena. Xikan’we-kan’we sweswo swi koke nyingiso wakwe hikuva ‘Vayuda a va nga tirhisani ni Vasamariya.’ Eku heteleleni bulo leri lerinene ri pfune yena ni van’wana vo tala leswaku va hundzuka vapfumeri. (Yoh. 4:7-9, 41) Hi nga kuma dyondzo eka xikombiso xa yena.
2 Loko u lunghiselela ku fambisa buku leyi nge Hanya Hi Masiku, tivutise, ‘I swilo swihi swa nkoka leswi khumbaka vanhu va nsimu ya ka hina? I yini lexi nga ta tsakisa n’wana wa kondlo-a-ndzi-dyi, munhu lonkulu, wanuna kumbe wansati?’ U nga lunghiselela swingheniso swo hlayanyana kutani u kunguhata ku tirhisa xin’we lexi tikombaka xi fanelana ni xiyimo.
3 Tanihi leswi ku onhaka ka vutomi bya ndyangu ku khumbaka vo tala, u nga ha ku:
◼ “Mintshikelelo ya vutomi ya siku na siku yi vange ku karhateka lokukulu emindyangwini namuntlha. Xana yi nga wu kuma kwihi mpfuno? [Yimela nhlamulo.] Bibele yi nga va mpfuno wa xiviri eka hina. [Hlaya 2 Timotiya 3:16, 17.] Matsalwa ma nyikela swiletelo leswi vuyerisaka leswi nga pfunaka mindyangu leswaku yi pona. Xiya leswi vuriwaka eka ndzimana 3 eka tluka 238 ra buku leyi nge, U Nga Hanya Hi Masiku aParadeyisini eMisaveni.” Hlaya ndzimana 3, kutani u fambisa buku.
4 Loko u tirhisa xiviko xa mahungu xa ndhawu ya ka n’wina, u nga ha ku:
◼ “Xana u ma twile mahungu lawa a ma vulavula hi [boxa mhaka leyi khumbaka ndhawu ya ka n’wina]? Xana u titwe njhani hi swona? [Yimela nhlamulo.] Swi ku endla u tivutisa leswaku misava leyi yi kongome kwihi, a swi tano ke? Bibele yi vhumbhe swilo swo tano tanihi vumbhoni lebyi kombaka leswaku hi hanya emasikwini ya makumu.” Kutani languta rungula leri nga ebukwini leyi nge Hanya Hi Masiku, matluka 150-3.
5 Vo tala va khumbeka hi xiphiqo xa ku andza ka vugevenga. U nga tirhisa xingheniso xo sungula ehansi ka xihloko lexi nge “Crime/Safety” eka tluka 10 ra buku leyi nge “Reasoning”:
◼ “Hi vulavula ni vanhu hi mhaka ya ku hlayiseka ka munhu hi byakwe. Hi rhendzeriwe hi vugevenga byo tala naswona byi khumba vutomi bya hina. Xana u ehleketa leswaku ku ta laveka yini leswaku vanhu vo fana na mina na wena hi titwa hi hlayisekile ku famba eswitarateni ni vusiku?” U nga ha hlaya Pisalema 37:10, 11 kutani u kombisa mikateko leyi Mfumo wa Xikwembu wu nga ta yi tisa, hi ku tirhisa matluka 156-8 ya buku leyi nge Hanya Hi Masiku.
6 Loko u tsakela manghenelo yo olova, u nga ha tirhisa xingheniso xo fana ni lexi nga ehenhla ka tluka 12 ra buku leyi nge “Reasoning”:
◼ “Hi khutaza vaakelani va hina leswaku va xiya vumundzuku byo tsakisa lebyi Bibele yi hi tshembisaka byona. [Hlaya Nhlavutelo 21:3, 4.] Xana wa swi tsakela sweswo? [Yimela nhlamulo.] Ndzima 19 ya buku leyi yi kandziyisa mikateko yin’wana leyi vanhu lava yingisaka va nga ta yi kuma ehansi ka Mfumo wa Xikwembu.” Kutani fambisa buku leyi nge Hanya Hi Masiku hi munyikelo wa R10,50.
7 Ku lunghiselela xingheniso lexi humelelaka swi nga ku pfuna ku fikelela lava nga ni ndlala ya leswo lulama.—Mt. 5:6.