Hlakulela Ku Tsakela eBukwini Leyi Nge Hanya Hi Masiku
1 Loko hi ya emakaya ya vona, hi ntolovelo hi kuma vanhu va ri karhi va anakanya swinene hi ‘mivilelo ya mafambiselo lawa ya swilo.’ (Mar. 4:19) Hi langutane ni xihinga xo pfuxa ku tsakela ka vona hi xingheniso lexi tlhontlhaka mianakanyo. Eku sunguleni, vanhu vo tala va nga ha va va nga swi tsakeli ngopfu leswi hi swi vulaka. Loko ho va byela leswi nga ta khumba vutomi bya vona, hi nga ha pfuxa ku tsakela ka vona eka rungula ra Mfumo. Xilotlelo xo sungula mabulo i ku hlawula tinhla leti tsakisaka to vulavula ha tona ebukwini leyi nge Hanya Hi Masiku. I yini leswi u nga ta swi vula?
2 U nga ha tirhisa manghenelo lawa:
◼ “Loko a wu ri ni matimba, i xiphiqo xihi lexi karhataka namuntlha lexi a wu ta xi herisa? [Yimela nhlamulo, naswona loko swi fanerile, vula leswaku vanhu vo tala va titwa hi ndlela leyi fanaka.] Ku ta fikela sweswi, varhangeri va misava va tikomba va nga humeleli eku kumeni ka ntlhantlho wa swiphiqo leswi karhataka namuntlha. Kambe ku na Loyi a nga ta swi kota ku herisa swiphiqo hinkwaswo leswi hlaselaka vanhu. Ndzi kombela u xiya leswi tsariweke eka Pisalema 145:16. [Hlaya tsalwa, kutani u kombetela eka swifaniso leswi nga eka matluka 11-13.] Ndzimana 14 leyi nga eka tluka 14 yi tlakusa xivutiso lexi ha ha ku vulavulaka ha xona naswona yi ya emahlweni yi vutisa yi ku: ‘Kambe leswi swi ta humelela rini xana?’” Hlamusela leswaku buku leyi yi ta hlamula xivutiso xexo, ivi u yi fambisa.
3 Kumbe u nga ha vula swin’wana swo fana na leswi:
◼ “Kumbexana u tiva gome leri vaka kona loko u feriwe hi loyi u n’wi rhandzaka. Swi le rivaleni leswaku u titwe u hlunamile naswona u tivone u nga pfuni nchumu. U nga ha va u anakanyisise hi swivutiso leswi landzelaka: [Hlaya swivutiso leswi nga endzimaneni yo sungula eka tluka 76.] Xana a swi nga ta chavelela ku kuma tinhlamulo ta swivutiso leswi? Swi nga ha ku khutaza ku tiva leswaku Bibele yi nyika ntshembo lowu tiyeke hi lava feke. [Hlaya Yohane 5:28, 29.] Buku leyi yi hi pfuna ku twisisa xiyimo xa lava feke ni ntshembo lowu nga kona wa nkarhi lowu taka.” Hlamusela tindzima 8 na 20 hi ku komisa. Nyika n’wini wa muti nkarhi wo kambisisa buku.
4 Swi nga ha endleka u kuma minkarhi leyinene yo nyikela vumbhoni bya xitshuketa. Loko swi ri tano, u nga ha vula swin’wana swo fana na leswi hi marito ya wena:
◼ “Misava yi ni swiphiqo swo tala namuntlha, naswona a swi kanakanisi leswaku na wena u langutane na swin’wana swa swona. Lexi khomisaka gome hi leswaku swi vonaka onge i vanhu lava rhuleke lava xanisekaka ngopfu. Xana u anakanya leswaku Xikwembu xi ta kala xi herisa ku xaniseka loku hinkwako? [Yimela nhlamulo.] U nge ndzi ku hlamusela leswi Xikwembu xi tshembisaka ku swi endlela lava xi tirhelaka. [Hlaya Pisalema 37:40 kutani u pfula tluka 99 ra buku leyi nge Hanya Hi Masiku.] Buku leyi yi hlamusela xivangelo lexi endleke Xikwembu xi pfumelela vubihi ni ndlela leyi xi nga ta byi herisa ha yona.”
5 Loko u ri muhuweleri lontsongo, u nga tirhisa rungula leri sekeriweke eswifanisweni leswi nga eka matluka 156-8. U nga ha sungula hi ku vutisa u ku:
◼ “Xana u nga swi tsakela ku hanya emisaveni yo fana ni leyi? [Yimela nhlamulo.] Xin’wana ni xin’wana xa swifaniso leswi swo saseka xi sekeriwe eka xitshembiso lexi kumekaka eRitweni ra Xikwembu, ku nga Bibele. [Kombisa Matsalwa lama swi hlamuselaka.] Buku leyi yi nga ku pfuna leswaku u dyondza swo tala hi xitshembiso xa Xikwembu xo endla misava hinkwayo yi va paradeyisi. Yi ni marungula lama ponisaka vutomi naswona yi lulameriwe hi nkarhi lowu u nga ta wu heta u ri karhi u yi hlaya.”—Yoh. 17:3.
6 Yehovha u ta katekisa ntirho wa hina loko hi tikarhatela ku kongomisa vanhu lava fanaka ni tinyimpfu ematini ya ntiyiso. Hikwalaho a hi endleni hi matimba hi September hi hlakulela ku tsakela ebukwini leyi nge Hanya Hi Masiku.