Ku Sungula Tidyondzo Ta Bibele Hi Buku Leyi Nge Hanya Hi Masiku
1 Ku rhandza vanhu swi ta hi susumetela ku va hi hatlisa hi tlhelela hi ya pfuna lava nga ni ndlala ni torha ra ntiyiso. (Mt. 5:6) Hi fanele ku xalamukela ni ku hlakulela ku tsakela kwihi ni kwihi loku hi ku kumeke ku nga si hela. Ku lunghiselela i xilotlelo xa ku humelela.
2 Pakani ya hina yi fanele yi va ku sungula tidyondzo ta Bibele. (Mt. 28:20) Tikopi to sungula ta buku leyi nge Hanya Hi Masiku a ti ri ni marito lama landzelaka ya xingheniso: “Hakunene leyi i buku leyinene yo yi tirhisela ku dyondza ni un’wana ni un’wana, lavatsongo kumbe lavakulu, ku nga khathariseki leswaku xiyimo xa vona xa dyondzo hi xihi.” Yi tsariwe hi ndlela leyi endlaka leswaku ku fambisa tidyondzo swi olova, yi pfuna hambi va ri vahuweleri lavantshwa leswaku va hlanganyela. Ku humelela ka hina eku sunguleni ka tidyondzo letintshwa ku titshege hi ndlela leyi hi chivirikelaka ha yona ku endla maendzo yo vuyela.
3 Xana Hi Nga Ti Sungurisa Ku Yini Tidyondzo? Loko hi vuyela, hi ntolovelo i swinene ku hlanganisa bulo ra hina ni yinhla kumbe xivutiso lexi boxiweke eriendzweni ro sungula. Kumbexana mi bule hi xiyimo xa vafi, kutani u siya xivutiso lexi nge, “Hi wihi ntshembo lowu nga kona hi varhandziwa va hina lava feke?” Hlamusela leswaku ku pfuxiwa ka vafi a hi ntshembo lowu nga riki na vumbhoni; rhekhodo ya Bibele yi ni swikombiso swo tala swa vanhu lava pfuxiweke. Hlamusela swifaniso leswi nga eka matluka 167-9. Kutani u hlamusela leswi kombisiweke etindzimaneni 1 na 2 eka tluka 166. Loko ku ri ni ku tsakela, tshembisa ku tlhela u vuya mi ta yisa bulo emahlweni.
4 U nga ha va u vulavule ni mutswari loyi a kombiseke ku khumbeka hikwalaho ka ku andza ka swiphiqo leswi nga kona eku kuriseni ka vana. U nga ha vula swin’wana swo fana na leswi hi marito ya wena:
◼ “Vatswari hinkwavo va navelela vana va vona leswinene. Bibele yi ni swiringanyeto leswi nga pfunaka vatswari ku letela vana va vona leswaku va kuma vutomi lebyi enerisaka lebyi nga ni xikongomelo. Hikwalaho ka sweswo, hi khutaza mindyangu hi matimba leswaku yi dyondza Bibele swin’we. [Kombetela eka ndzimana 23 leyi nga eka tluka 246.] Vutivi lebyi kumiwaka byi nga tisa mikateko leyi nga heriki endyangwini hinkwawo.” Hlaya Yohane 17:3. Phofula ku navela ka wena ku tlhela u vuya u ta kombisa ndyangu ndlela yo sungula dyondzo ya vona.
5 Loko u ri muhuweleri lontsongo kumbe loyi a ha ku sungulaka, naswona hi ku komisa u vulavule hi ntshembo wa Paradeyisi eriendzweni ro sungula, u ri karhi u pfule buku eka tluka 3, hlamusela swin’wana swo fana na leswi hi ku olova:
◼ “Bibele yi tshembisa leswaku lava endlaka ku rhandza ka Xikwembu va nga langutela ku hanya emisaveni yo fana na leyi, laha ku nga ta va ni ntsako ni ku rhula. Buku leyi yi kombisa leswi hi faneleke ku swi endla leswaku hi ta tiphina hi mikateko yoleyo.” Hlamusela endlelo ra hina ra dyondzo hi ku komisa, kutani u endla nkombiso wa kona.
6 Tanihi vadyondzisiwa va Yesu, hi ni vutihlamuleri byo pfuna vanhu. (Rhom. 10:14) Loko hi fambise buku kumbe hi ve ni bulo lerinene ro olova, hi ni vutihlamuleri byo hlakulela ku tsakela. (Mt. 9:37, 38) Loko hi hetisisa xiavelo lexi kahle, hinkwerhu hi nga kuma mikateko leyi tisiwaka hi sweswo.—1 Tim. 4:16.