Anakanyela Van’wana—Xiyenge 2
1 Hi lava ku hlayisa vuxaka lebyinene ni vanhu lava tshamaka endhawini ya ka hina lomu swi faneleke kona. Leswi swi lava leswaku hi va anakanyela ni ku xixima timfanelo ni mintlhaveko ya vona.
2 Timbhoni ta Yehovha ti tiviwa hi mikhuva ya tona leyinene. Mimpimanyeto ya ku languteka ka hina exikarhi ka vanhu, exikolweni, entirhweni hambi ku ri etinhlengeletanweni ta hina, yi ve nchumu lowu bumabumeriwaka hi vo tala.—Vona Xihondzo xo Rindza xa June 15, 1989, tluka 20.
3 Kavula, mahanyelo lamanene ma katsa swo tala, swo tanihi ku tshembeka, ku gingirika ni mikhuva leyinene. Nakambe ma katsa ni ku xixima vaaki lava tshamaka ekusuhi ni le Holweni ya hina ya Mfumo. Mahanyelo ya hina lama kombisaka ku xixima Xikwembu ma nga ha honisiwa etimhakeni tin’wana loko hi tsandzeka ku anakanyela vaakelani va hina. Pawulo u hi khutaze ku ‘hanya hi ku pfumelelana ni mahungu lamanene.’—Flp. 1:27.
4 Nkarhi wun’wana, ku vile ni swivilelo leswi humaka eka vaaki lava tshamaka ekusuhi ni Tiholo ta Mfumo hikwalaho ka leswi va swi vonaka swi ri ku pfumala ku anakanyela, leswi endliwaka hi lava vaka kona eminhlanganweni. Vamakwerhu va xinuna ni va xisati va fanele ku papalata ku hlengeletana ehandle ka Holo ya Mfumo kutani va vulavulela ehenhla lerova swi twiwa hi vanhu va tindlu ta le kusuhi. Vana a va fanelanga va pfumeleriwa ku tsutsuma-tsutsuma eHolweni ya Mfumo. Ku hima swipfalo swa movha kumbe ku chaya tibele swi nga kavanyeta vaakelani. Mahanyelo ya muxaka lowu ma kombisa xiyimo lexi nga riki lexinene evandlheni. Nakambe, i swa nkoka leswaku hi landzela milawu hinkwayo ya le mapatwini loko hi ri karhi hi chayela.—Rhom. 13:1, 2, 5.
5 Mimovha a yi fanelanga yi pakiwa etindhawini ta vanhu van’wana kumbe laha yi nga kavanyetaka swo famba swin’wana kumbe ku pfala ndlela. Tindhawu to paka leti hlayiseriweke vaxavi hi van’wamabindzu va ndhawu yoleyo a ti fanelanga ti tirhisiwa handle ka loko u nyikiwe mpfumelelo. Laha mavandlha manharhu kumbe mune ma tirhisaka Holo yin’we ya Mfumo, swi nga ha endleka leswaku minhlangano yi hleleriwa siku rin’wana ni rin’wana evhikini, naswona leswi swi lava ntirhisano lowunene exikarhi ka tihuvo ta vakulu.—Vona Xihondzo xo Rindza xa October 1, 1988, tluka 17, ndzimana 13.
6 Bibele yi hi khutaza leswaku hi ‘endla hinkwaswo hi ku dzunisa Xikwembu,’ naswona leswi swi katsa ku anakanyela van’wana. (1 Kor. 10:31-33) Loko hi nga ‘tikarhateli leswi nga swa hina ntsena,’ hi nga ka hi nga kavanyeti swilo swa van’wana. (Flp. 2:4) Nakambe hi ta papalata ku kavanyeta timhaka ta mabindzu ta vaxavisi va ndhawu ya ka hina.
7 Ku anakanyela van’wana—endzeni ni le handle ka vandlha—swi kombisa leswi hi nga xiswona etimbilwini ta hina. Leswi hi swi endlaka ni ku swi vula swi fanele ku kombisa leswaku ‘hi rhandza vaakelani va hina kukota loko hi tirhandza.’—Mt. 7:12; 22:39.