Tindhawu To Gandzela Eka Tona

VAGANDZERI va Yehovha va ntiyiso va lerisiwa leswaku va hlengeletana leswaku va ta leteriwa ni ku khutazana. (Hev. 10:23-25) Ndhawu yo sungula leyi vanhu va Xikwembu lava hlawuriweke, ku nga Vaisrayele, a va hlangana eka yona leswaku va gandzela a ku ri ‘tabernakela, ku nga ntsonga wa nhlangano.’ (Eks. 39:32, 40) Hi ku famba ka nkarhi, Solomoni n’wana wa Davhida u ake yindlu kumbe tempele, leswaku Xikwembu xi ta dzunisiwa eka yona. (1 Tih. 9:3) Endzhaku ka loko tempele yi lovisiwile hi 607 B.C.E., Vayuda va sungule ku hlengeletana va gandzela Xikwembu emiakweni leyi a yi vitaniwa masinagoga. Hi ku famba ka nkarhi, tempele yi tlhele yi akiwa hi vuntshwa kutani yi ya emahlweni yi tirhisiwa tanihi ntsindza wa vugandzeri bya ntiyiso. Yesu u dyondzise emasinagogeni ni le tempeleni. (Luka 4:16; Yoh. 18:20) Yesu u tlhele a khoma nhlengeletano entshaveni.—Mat. 5:1–7:29.

² Endzhaku ka loko Yesu a file, Vakreste a va hlengeletana etindhawini ta mani na mani ni le makaya ya vamakwerhu leswaku va dyondzisa Matsalwa ni ku tiphina hi vunakulobye ni vapfumeri-kulobye. (Mint. 19:8, 9; Rhom. 16:3, 5; Kol. 4:15; Film. 2) Minkarhi yin’wana a swi lava leswaku Vakreste vo sungula va hlangana exihundleni leswaku va nga voniwi hi vaxanisi va vona. Ina, malandza ya Xikwembu yo tshembeka enkarhini lowu hundzeke a ma swi navela hi mbilu hinkwayo ku hlangana etindhawini ta vugandzeri leswaku ma ta ‘dyondzisiwa hi Yehovha.’—Esa. 54:13.

³ Ninamuntlha, tinhlengeletano ta vandlha ta ha khomeriwa emakaya ya vamakwerhu ni le tindhawini ta mani na mani. Hakanyingi makaya ya vamakwerhu ma tirhisiwa ku khomela tinhlengeletano ta ntirho wa nsimu. Lava va pfulaka makaya ya vona leswaku ku khomiwa tinhlengeletano to tano va swi teka ku ri nkateto. Vo tala va vula leswaku ku pfula makaya ya vona ma tirhisiwa hi ndlela yoleyo swi tiyise ripfumelo ra vona.

HOLO YA MFUMO

⁴ Ndhawu leyi Timbhoni ta Yehovha ti hlanganaka eka yona hi xitalo hi le Holweni ya Mfumo. Hi ntolovelo, ku xaviwa ndhawu kutani ku akiwa Holo ya Mfumo leyintshwa kumbe ku pfuxetiwa muako lowu nga kona. Leswaku ku hlayisiwa mali yo aka ni yo khathalela miako, mavandlha yo hlayanyana ma nga ha tirhisa Holo yin’we ya Mfumo loko swi koteka. Etindhawini tin’wana, va boheka ku hirha holo. Tiholo ta Mfumo letintshwa ni leti pfuxetiweke hi vuntshwa hi ndlela leyikulu swi fanerile leswaku ti nyiketeriwa. Hambiswiritano, loko ku cinciwe swilo leswi nga nyawuriki kumbe ku lunghisiwe swilo leswi nga vuliki nchumu eHolweni ya Mfumo, a xi kona xilaveko xa leswaku yi tlhela yi nyiketeriwa.

⁵ Holo ya Mfumo a yi fanelanga yi va muako wa manyunyu, lowu akiweke hi xikongomelo xo bombisela van’wana. Hambileswi miako ya kona yi nga ta hambana hi ku ya hi tindhawu, kambe hi fanele hi tsundzuka leswaku hi yi akela ku yi tirhisa. (Mint. 17:24) Yi fanele yi va ndhawu leyinene ni leyi fanelekaka ku khoma tinhlengeletano ta vandlha eka yona, hi ku ya hi swiyimo swa ndhawu yoleyo.

⁶ Mavandlha hinkwawo ya Timbhoni ta Yehovha ma hoxa xandla eku tirhiseni ni ku le ku khathaleleni ka Holo ya Mfumo leyi ma averiweke eka yona. A ku na puleti ya munyikelo leyi hundzisiwaka naswona vanhu a va sindzisiwi ku humesa minyikelo. Ku ni bokisi ra munyikelo naswona lava vaka kona etinhlengeletanweni ta vandlha va ta nyikela hi mali leswaku ku ta khathaleriwa holo. Va swi endla hi ku tirhandzela, swi huma embilwini.—2 Kor. 9:7.

⁷ Hinkwavo evandlheni va fanele va swi teka ku ri lunghelo ku seketela Holo ya Mfumo hi tlhelo ra timali naswona va fanele va swi hisekela leswaku yi tshama yi basile ni ku yi hlayisa kahle. Hakanyingi nkulu kumbe nandza wa vutirheli hi yena loyi a averiwaka ku endla xiyimiso xa ku endla ntirho lowu. Hakanyingi, ku basisa ku endliwa hi mintlawa ya nsimu, leyi rhangeriwaka hi mulanguteri wa ntlawa kumbe mupfuni wakwe. Holo ya Mfumo yi fanele yi n’wi yimela kahle Yehovha ni nhlangano wakwe, endzeni ni le handle.

⁸ Loko holo yi tirhisiwa hi mavandlha mambirhi kumbe ku tlula, vakulu va mavandlha wolawo va fanele va simeka Komiti ya ku Tirhisiwa ka Holo ya Mfumo leyi nga ta tirhisana eka timhaka leti khumbaka muako ni nhundzu. Tihuvo ta vakulu ti ta hlawula makwerhu la nga ta va muhlanganisi wa komiti ya ku tirhisiwa ka holo. Komiti ya ku tirhisiwa ka holo yi fanele yi tirha ehansi ka nkongomiso wa vakulu kutani yi langutela ku basisiwa ka holo, yi tiyiseka leswaku swilo leswi lavaka ku lunghisiwa a swi honisiwi nileswaku swilo leswi tirhisiwaka eholweni swi tshama swi ri kona. Mavandlha lama katsekaka ma fanele ma tirhisana kahle.

⁹ Loko mavandlha yo hlayanyana ma tirhisa Holo yin’we, va fanele va cincana minkarhi ya ku khoma tinhlengeletano ta vandlha. Vakulu va fanele va hlela xiyimiso hi ndlela ya rirhandzu ni ya ku anakanyelana. (Filp. 2:2-4; 1 Pet. 3:8) A ri kona vandlha leri faneleke ri endlela mavandlha laman’wana xiboho. Loko mulanguteri wa muganga a endzela rin’wana ra mavandlha wolawo lama tirhisaka Holo yin’we, mavandlha laman’wana ma ta cinca siku leri ma khomaka tinhlengeletano ta wona ta le xikarhi ka vhiki evhikini rero.

¹⁰ Holo ya Mfumo yi nga tirhiseriwa minkhuvo ya vukati ni swilahlo loko Komiti ya Ntirho ya Vandlha yi pfumerile. Vakulu lava va kambela xikombelo ha xin’we hi vukheta kutani va endla xiboho hi ku landza nkongomiso wa rhavi.

¹¹ Lava pfumeleriwaka ku tirhisa Holo ya Mfumo, va fanele va tikhoma hi ndlela leyi pfumelelanaka ni ndlela leyi Vakreste va ntiyiso va tikhomaka ha yona. A ku fanelanga ku endliwa nchumu eHolweni ya Mfumo lowu nga ta khunguvanyisa vandlha kumbe wu tisa ndzhukano eka Yehovha kumbe eka ndhuma leyinene leyi vandlha ri nga na yona. (Filp. 2:14, 15) Hi ku landza nkongomiso wa rhavi, Holo ya Mfumo yi nga tirhiseriwa mintirho yin’wana ya moya yo fana ni Xikolo xa Vutirheli bya Mfumo ni Xikolo xa Ntirho wa Vuphayona.

¹² Minkarhi hinkwayo swirho swa vandlha swi fanele swi xixima tindhawu leti swi hlengeletanaka eka tona. Ku ambala, ku tilunghisa ni ku languteka ka hina swi fanele swi fambisana ni ndhuma leyinene leyi vagandzeri va Yehovha va nga na yona. (Ekl. 5:1; 1 Tim. 2:9, 10) Loko hi tirhisa ndzayo leyi hi nyikiwaka yona emhakeni leyi, hi kombisa leswaku ha ti tlangela tinhlengeletano ta hina ta vandlha.

¹³ Hi fanele hi tiyiseka leswaku tinhlengeletano ta hina ti famba hi ku hleleka. Ku khutaziwa leswaku vana va tshama ni vatswari va vona. Vatswari lava nga ni swihlangi va nga ha komberiwa leswaku va tshama laha va nga ta kota ku hatla va huma loko xihlangi xi lava ku layiwa kumbe xi lava mpfuno wo karhi.

¹⁴ Vamakwerhu van’wana va hlawuriwa ku va varindzi loko tinhlengeletano ta vandlha ti ri karhi ti ya emahlweni. Va fanele va va ni vuxiyaxiya, xinghana naswona va pfumelelana ni swiyimo. Ntirho wa vona wu katsa ku amukela vaendzi ni ku va endla va titwa va ntshunxekile, ku pfuna lava fikaka nongonoko wu sungurile leswaku va kuma ndhawu yo tshama, ku hlaya nhlayo ya lava veke kona naswona va teka goza loko ku hisa ngopfu kumbe ku titimela ngopfu. Nakambe varindzi va ta tsundzuxa vatswari leswaku va byela vana va vona va tshamiseka hi nkarhi wa nongonoko. Loko n’wana a ba pongo, murindzi u ta kombela mutswari leswaku a huma na yena leswaku vayingiseri va nga kavanyeteki. Ntirho lowu endliwaka hi varindzi wu endla leswaku hinkwavo lava vaka kona etinhlengeletanweni ta vandlha va vuyeriwa. Swi nga va swinene leswaku ntirho lowu wu endliwa hi vakulu ni malandza ya vutirheli.

NTIRHO WO AKA HOLO YA MFUMO

¹⁵ Eka lembe-xidzana ro sungula, Vakreste van’wana a va fuwile ku tlula van’wana, hi yona mhaka leyi muapostola Pawulo a tsaleke a ku: “Hi ku ringanisela, leswi mi seleke na swona sweswi swi pfala ku kayivela ka vona, leswaku leswi va seleke na swona swi pfala ku kayivela ka n’wina, ku va ni ku ringana-ringana.” (2 Kor. 8:14) Ninamuntlha, langutelo leri fanaka hi ku “ringanisela” ra ha tirha. Minyikelo leyi nyikeriwaka emavandlheni lama nga kona emisaveni hinkwayo yi pfuneta ku aka ni ku pfuxeta Tiholo ta Mfumo. Minyikelo yo tano leyi humaka eka vamakwerhu emisaveni hinkwayo ya tlangeriwa swinene hi nhlangano ni hi mavandlha lama vuyeriwaka hi ku kongoma hikwalaho ka yona.

¹⁶ Rhavi ri ava mavandlha lama faneleke ma akeriwa Tiholo ta Mfumo exifundzheni xa rona. Nakambe rhavi ri endla xiboho xa leswaku Tiholo ta Mfumo ti fanele ti akiwa rini naswona kwihi ni ku tlhela ku pfuxetiwa tiholo leti nga ensin’wini ya rhavi. Loko ku tshuka ku va ni mhangu, ku endliwa malunghiselelo ya leswaku ku lunghisiwa Tiholo ta Mfumo leti onhakeke naswona minkarhi yin’wana ku lunghisiwa ni makaya ya vamakwerhu.

¹⁷ Rhavi ri tirhisana ni vamakwerhu lava tirhaka hi ku tirhandzela leswaku va xava ndhawu, va lulamisa Holo ya Mfumo, va kuma mpfumelelo wo aka ni ku yi aka. Leswi ku nga ni xilaveko lexikulu xa Tiholo ta Mfumo ematikweni yo tala, ku laveka vatirhi vo tala va ku tirhandzela. Vahuweleri hinkwavo lava khuvuriweke lava fanelekaka lava lavaka ku pfuna va khutaziwa ku tata fomo ya xikombelo kutani va yi nyika Komiti ya Ntirho ya Vandlha. Hambi ku ri vahuweleri lava nga khuvuriwangiki va nga pfuneta eka ntirho wo aka kumbe ku pfuxeta Holo ya vona ya Mfumo.

TIHOLO TA TINHLENGELETANO

¹⁸ Hi ntolovelo Vakreste vo sungula a va hlangana hi mintlawa leyitsongo. Kambe, minkarhi yin’wana a ku hlangana “ntshungu lowukulu.” (Mint. 11:26) Hilaha ku fanaka, vanhu va Yehovha namuntlha va hlangana etinhlengeletanweni letikulu va khoma tinhlengeletano ta muganga ni tinhlengeletano ta xifundzha. Hakanyingi ku hirhiwa miako ya le ndhawini yoleyo leswaku ku khomiwa nhlengeletano eka yona, kambe loko miako yi nga faneleki kumbe yi nga ri kona, ku nga ha akiwa ndhawu yo gandzela eka yona leyi vuriwaka Holo ya Tinhlengeletano.

¹⁹ Minkarhi yin’wana ku xaviwa muako, wu lunghisiwa ivi wu tirhisiwa tanihi Holo ya Tinhlengeletano. Kambe, hi xitalo ku xaviwa xitandi ivi ku akiwa holo leyintshwa. Tiholo ta Tinhlengeletano a ti ringani, swi ya hi swilaveko swa ndhawu yoleyo. Rhavi ri endla xiboho xo xava kumbe ku aka holo yo tano endzhaku ka loko ri kambisise kahle leswaku ku ta tirhisiwa mali muni nileswaku holo ya kona yi ta tirhisiwa kangani hi lembe.

²⁰ Rhavi ri hlawula vamakwerhu lava nga ta khathalela matirhelo ni ku lunghisiwa ka Holo ya Tinhlengeletano. Ku endliwa xiyimiso xa leswaku miganga yi basisa nkarhi ni nkarhi kumbe kambirhi hi lembe ni ku lunghisa leswi lavaka ku lunghisiwa ku nga si onhaka swo tala. I swinene leswaku vamakwerhu va tiendlela ntirho lowu. Hikwalaho mavandlha ma khutaziwa ku seketela xiyimiso xexo hi mbilu hinkwayo.—Ps. 110:3; Mal. 1:10.

²¹ Minkarhi yin’wana Holo ya Tinhlengeletano yi nga tirhiseriwa mintirho yin’wana ya vugandzeri, yo tanihi swikolo swa Bibele ni tinhlengeletano to hlawuleka ta valanguteri va miganga. Ku fana ni Holo ya Mfumo, Holo ya Tinhlengeletano i ndhawu leyi nyiketeriweke ya vugandzeri. Loko hi hlanganile eHolweni ya Tinhlengeletano, ndlela leyi hi tikhomaka ha yona, hi ambalaka ha yona ni leyi hi tilunghisaka ha yona, yi fanele yi xiximeka ku fana ni loko hi ri eHolweni ya Mfumo.

²² Ku nghena vanhu vo tala enhlanganweni wa Xikwembu eminkarhini leyi ya makumu. Lebyi i vumbhoni bya leswaku Yehovha wa hi katekisa. (Esa. 60:8, 10, 11, 22) Xisweswo, i swinene ku seketela matshalatshala lawa nhlangano wu ma endlaka yo hi pfuna leswaku hi va ni tindhawu letinene to gandzela eka tona, yo ti hlayisa ni ku ti basisa. Loko hi endla tano, hi ta va hi kombisa leswaku ha swi tlangela leswi miako yo tano yi swi hetisisaka, ku nga ku hi pfuna leswaku hi khutazana, ngopfu-ngopfu leswi hi vonaka siku ra Yehovha ri tshinelaka.