Ku Titshega Hi Yehovha Eka Hinkwaswo Leswi Hi Swi Endlaka

¹ Hi lava mikateko ya Xikwembu eka hinkwaswo leswi hi swi endlaka. Vutlharhi bya ku lemuka leswi, byi hlamuseriwa kahle eka Pisalema 127:1: “Loko Yehova a nga aki yindlu, la’v̌a yi akaka v̌a tikaratela ŝa hava.” Xisweswo hi fanele hi tiyisekisa leswaku hi tsundzuka Muvumbi emintirhweni hinkwayo ya hina.

² Ku Voniwa Hi Van’wana: Namuntlha, lava tolovelaneke ni tindlela ta ku aka va tsakisiwa ngopfu hi leswi Timbhoni ta Yehovha ti swi endlaka hi ku yimisa Tiholo ta Mfumo leti akiwaka hi ku hatlisa. Hi xikombiso, eka ndhawu yin’wana phepha-hungu ra kona ri hlamusele ri ku: “A ku ri tsima ra ntirho wo Tirhandzela wa Timbhoni ta Yehovha leti a ti tele ‘Ntirho Wo Aka Holo Ya Mfumo’ wa masiku manharhu, naswona wu ve ntirho wa masiku manharhu hakunene. . . . Hi masiku manharhu Komiti Yo Aka Tiholo Ta Mfumo yi tile yi vuya yi famba, kambe leswi va nga swi endla swi ta tsundzukiwa nkarhi wo leha.”

³ Mufundhisi un’wana wa Rhoma Khatoliki u ve ni rito eku akiweni ka Holo ya Mfumo leyi akiweke hi xihatla le Soweto: “A ndzi si tshama ndzi swi vona. Vanhu va tinxaka hinkwato va tirha swin’we. Ku ta valungu va ta tirha endhawini ya vantima, va tirhela vanhu va ntima, naswona a va tipeta ekhombyeni hikuva valungu va hlaseriwa loko va ri emadorobeni ya vantima.”

⁴ Mulanguteri un’wana wa xifundzha u vika leswaku vhiki leri landzeleke ku hetiwa ka Holo ya Mfumo yo akiwa hi ku hatlisa le n’walungwini wa Transvaal, nsati un’wana u kombele buku eka Timbhoni leti a ti nghene ekaya kakwe. Eku sunguleni a nga va amukeli vahuweleri kumbe ku teka tibuku. Hambi swi ri tano, matshalatshala lamanene lama hlanganeke lama endliweke eka tsima leri ra Holo ya Mfumo ma n’wi kombe leswaku lava i vanhu va Xikwembu hakunene.

⁵ Swa tsakisa ku vona leswaku madzana ya vatirhi vo tirhandzela ma tinyiketela ku pfuna eka mintirho leyi yo aka Tiholo ta Mfumo. Moya wo tano wa ku tsakela wa tlangeriwa hakunene naswona wu pfumelelana ni marito lama nga eka Pisalema 110:3: “Tiko ra wena ri ta v̌a le’ra mapfunḍa.” Swi fana ni leswi tinhloko-mhaka ta phepha-hungu rin’wana ti nga swi vula, “Mavoko yo tala ma vevukisa ntirho.”

⁶ Mawaku ntokoto lowu nga rivalekiki wa ku hlanganyela entirhweni wo tano! Mbhoni yin’wana yi hlamuserile: “Ndzi vone onge tsima leri ra ku tirha swin’we ri hi endle hi titwa hi ri ndyangu wun’we, hi tiva leswaku un’wana ni un’wana u endla ntirho wa yena. Vun’we ni ku hleleka ka hina swi kombise leswaku hi seketeriwa hi Yehovha hakunene.” Endzhaku ko tirha emuakweni wa Holo ya Mfumo, munhu un’wana u tsarile, “sweswi ndza ha dyondza buku leyi nge United in Worship. Ntirho lowu wu ve xikombiso lexinene xa vun’we lebyi hlamuseriwaka ebukwini leyi. A ku holoviwi. A nga kona munhu loyi a nga vonaka sweswo kambe a nga khumbeki. Moya wa Yehovha wu kona laha!”

⁷ Phepha-hungu rin’wana ri pfumele ri ku: “Ku humelela ka Timbhoni ta Yehovha ‘eku akeni ka xihatla’ ka tindhawu ta tona ta vugandzeri a ku vangiwi hi ntirhisano ntsena, kambe hi ku tinyiketela.”

⁸ Hi nkarhi wa ku akiwa ka Holo ya Mfumo ya swithezi swimbirhi exikarhi ka Joni, n’wamabindzu un’wana loyi a a famba endlwini ya muakelani u endzele ndhawu leyi a ku akiwa ka yona. A lava ku tiva mayelana ni ntirho lowu endliwaka. U te: “N’wina mi tiakela ndhawu ya n’wina ya vugandzeri . . . kasi vanhu va le kerekeni ya hina va tsandziwa ni hi ku ta. Leswi swi tsakisa ngopfu. Ndzi ni tibuku ta n’wina to tala leti ndzi tshamelaka ku ti xava tanihi leswi ti nga ni xikongomelo lexinene, kambe a ndzi si tshama ndzi ti hlaya. Sweswi ndzi lava ku ya ti hlaya, ndzi ta kuma swo tala hi rungula ra n’wina. Naswona ndzi lava ku ta ndzi ta vona leswaku mi gandzela hi ndlela yihi.”

⁹ Ku Kunguhata Ni Ku Yimisa Tiholo Ta Mfumo: Leswaku swilo leswi nyikeriwaka swi tirhisiwa hi vutlharhi, ku laveka leswaku ku ehleketisisiwa hi xivumbeko ni ndhawu ya Holo ya Mfumo. Miako ya kona yi fanele yi languteka. Buku leyi nge Vutirheli Bya Hina eka tluka 61 yi kandziyisa leswaku “Holo ya Mfumo, tanihi ndhawu ya vugandzeri, a yi fanelanga yi va muako wa manyunyu lowu endleriweke ku hlamarisa van’wana. . . . Xikongomelo xa yona hi lexinene. (Ringanisa Mintirho 17:24.) Yi fanele yi va ndhawu leyinene ni leyi fanelaka ku fambisa minhlangano ya Vukriste leyi pfunaka ku kula emoyeni ni ku dyondza hi Yehova, ni leyi yi hi khutazaka ku hlanganyela entirhweni wa yena wa Mfumo.” Ntokoto wu komba leswaku hi ntolovelo vahuweleri va pfuniwa swinene hi Holo ya Mfumo loko yi ri ekusuhi swinene ni laha va tshamaka kona.

¹⁰ Hakanyingi swa antswa ku va ni Tiholo ta Mfumo timbirhi leti hambaneke eswivandleni swo hambana, ematshan’wini ya Holo ya Mfumo ya swithezi swimbirhi. Yin’wana ni yin’wana ya tona yi nga rhurhela mavandlha mambirhi kumbe ku tlula loko ndhawu ya tona yi hlawuriwa hi vutlharhi. Hambi swi ri tano, eka swiyimo swin’wana Tiholo ta Mfumo timbirhi ti akiwa eka ndhawu yin’we. Ku durha ka ndhawu kumbe ku ka yi nga kumeki ku vangele leswaku ku endliwa sweswo.

¹¹ Tinhla to hlayanyana ti fanele ku langutiwa hi ku pfuniwa hi Komiti Yo Aka Ya Xifundzha ku nga si endliwa xiboho xa ndhawu yo aka: Xana ndhawu ya kona yi le xikarhi ka nsimu ya vandlha? Xana vukulu bya ndhawu byi kambisisiwe hi vukheta? Loko yi ri yikulu ku tlula mpimo, swi ta tika leswaku vandlha ri yi hlayisa. Loko ndhawu ya kona yi ri yitsongo ngopfu a hi yinene. Xana yi kona ndhawu ya ku engetela ka yona loko holo yo tshuka yi va yitsongo? Xana ku ta va ni ndhawu leyi ringaneke ya ku paka, hambi loko ku nga ri na mimovha yo tala evandlheni enkarhini wa sweswi? Xana ndhawu ya kona yi lava mali leyikulu ya ku rhanga yi lunghisiwa hi mhaka ya ku voyama kumbe vumba kumbe hi mhaka ya maribye? Tinhla leti ni tin’wanyana ti fanele ti kambisisiwa ka ha sunguriwa.

¹² Leswi Swi Endliweke: Ku sukela loko Nkwama Wa Sosayiti Wa Ku Aka Tiholo Ta Mfumo wu simekiwile emalembeni manharhu lama hundzeke, ku kumeke timali to pfuna ku akiwa ka 16 wa Tiholo ta Mfumo ematikweni lama nga ehansi ka rhavi leri. Tiholo leti ta Mfumo ti rhurhela 18 wa mavandlha. Mawaku xikombiso lexi xiyekaka swonghasi xa rirhandzu ra Vukreste! Lembe na lembe ku akiwa Tiholo ta Mfumo ta kwalomu ka 20 naswona Tiholo tin’wana ta Mfumo leti nga kona ta pfuxetiwa. Magidi ya vamakwerhu va xinuna ni vaxisati va tinyiketela hi rirhandzu leswaku va pfuna mavandlha hi mintirho ya wona ya ku aka Tiholo ta Mfumo. (Flp. 2:4) Vunyingi bya vatirhi lava vo tirhandzela va pfuna ni hi ntirho wa ntsombano wa muganga ni wa nhlengeletano ya xifundzha, naswona van’wana va tirha eka Tikomiti ta Tiholo ta Nhlengeletano.

¹³ Lava tirhaka eka Tikomiti To Aka Ta Swifundzha va khensiwa swinene hikwalaho ka moya wa vona wa rirhandzu ni ku tiyimisela ku pfuna leswaku ku enetiwa swilaveko leswikulu swa ku aka exikarhi ka nhlengeletano ya Yehovha leyi kulaka. Komiti yin’wana yo aka yi vike yi ku: “Moya wa vona wa rirhandzu wu hi khumba hinkwerhu, kambe lunghiselelo ra Yehovha ra rirhandzu ra nkongomiso wa vutshila ni vurhangeri lebyi tiyeke, hi ku vekiwa ka Tikomiti To Aka Ta Swifundzha wu tikomba wu ri wa nkoka. Tanihi komiti ya xifundzha hi lava ku khensa Sosayiti hi mbilu hinkwayo hi ku endla lunghiselelo ro tano. Handle ka lunghiselelo leri ni hi ku pfuniwa hi moya lowo kwetsima wa Yehovha, muako lowu a wu ta va wu nga humelelanga.” Vandlha ra Inanda South ekusuhi ni le Durban ri vule leswi eka papila ro nkhensa: “Komiti Yo Aka Ya Xifundzha yi endle ntirho lowukulu lowu hi tinyungubyisaka ha wona.” Van’wana vo tala na vona va vula sweswo.

¹⁴ Ku Laveka Vatirhi Vo Tirhandzela Lava Engetelekeke: Hikwalaho ka ku andza loku yaka emahlweni emavandlheni, ku laveka Tiholo ta Mfumo to tala. Ku laveka timali ni vatirhi vo tala. Ka ha ri ni xilaveko lexikulu xa Tiholo tin’wana ta Mfumo ta 170 eAfrika Dzonga, 14 eLesotho, 13 eSwaziland, 2 eNamibia na 7 eBotswana. Xilaveko lexi xi engeteriwe hi ku vumbiwa ka mavandlha lamantshwa ya 32 n’wexemu. Ku ni xilaveko lexikulu eLesotho xa vulanguteri bya vutshila leswaku ku hetiwa miako yin’wana leyi endliwaka. Vamakwerhu lava a va na yona Komiti Yo Aka Ya Xifundzha naswona mali yi le hansi ngopfu. Swaziland na Botswana na wona ma lava ku pfuniwa. Swi nga ha endleka leswaku vamakwerhu lava fanelekaka lava nga ni ntokoto wo aka kumbe wa ku hlela, va swi kota ku hlamula xirhambo lexi xa ku ta va ta pfuna. Hi kombela leswaku u tivisa Sosayiti loko u ta swi kota ku pfuna.

¹⁵ Hambi leswi vamakwerhu vo tala va xinuna ni va xisati va hambetaka va pfuna hi ku aka Tiholo ta Mfumo, va tirhisa nkarhi ni matshalatshala ya vona, ku ni xirhambo xa mpfuno wun’wana tanihi leswi ku nga ni xilaveko xa vatirhi vo tala eku tshoveleni. (Mt. 9:37, 38) Tikomiti to tala ta xifundzha ti vika leswaku ku kuma vatirhi lava engetelekeke lava swi rhandzaka va miako ya Tiholo ta Mfumo swi ta vevukisa ndzhwalo wa lava ku nga khale va rhwala vutihlamuleri lebyi.—Esa. 6:8; Gal. 6:2.

¹⁶ Vamakwerhu lava endlaka xikombelo xa ku tirha eka ntirho lowu wa mfumo va fanele va tsundzuka leswaku va fanele va landza xiboho xa vona. (Mt. 5:37; Kol. 3:23, 24) Valanguteri va tindzawulo va vulavurisana hi ku kongoma ni vatirhi vo tirhandzela leswaku va va tivisa nkarhi lowu va averiweke ha wona ku tirha laha ku akiwaka kona. Makungu ma endliwa hi ku ya hi vatirhi vo tirhandzela lava nga kona. Xisweswo, i swa nkoka leswaku hinkwavo va fika hi nkarhi lowu va twananeke ha wona, tanihi leswi ndzawulo yin’wana ni yin’wana yi lavaka ku endla ntirho wa yona hi nkarhi lowu vekiweke leswaku tindzawulo tin’wana ti endla ntirho wa tona hi ku ya hi xiyimiso. Ku hlela ntirho hi ndlela leyi swi endla leswaku vatirhi va swi kota ku hatla va vuyela emakaya ya vona ni le mavandlheni ya vona, loko va heta ntirho wa vona.

¹⁷ Komiti yin’wana ni yin’wana yo Aka ya Xifundzha yi hlela vatirhi lava nga endhawini leyi yi averiweke yona. Leswi swa humelela, tanihi leswi vamakwerhu lava nga ni vutihlamuleri va xiyaka leswaku va hlela vatirhi leswaku va nga tikeriwi kumbe ku susumetiwa. Hi xivangelo lexi komiti ya xifundzha yi ta rhangisa miako leyi akiwaka hi xihatla. Tikomiti To Aka Ta Mavandlha ti fanele ti kuma pfumelelo wa komiti ya xifundzha ti nga si kombela ku pfuniwa hi Vatirhi Vo Aka Tiholo Ta Mfumo. Vatirhi a va komberiwi leswaku va pfuna eka tikomiti ta ndhawu yin’wana handle ka loko ku endliwa lunghiselelo ro hlawuleka hi Sosayiti ni hi xikombelo lexi humaka eka komiti ya xifundzha leyi tikeriwaka hi nkarhi wa kona. Loko komiti yin’wana ya xifundzha ya le kusuhi yi ri ni ndzhwalo wo vevuka hi nkarhi wa kona, Sosayiti yi nga ha kombela yona leswaku yi pfuneta.

¹⁸ Lava Fanelekaka: Loko ku sunguriwa muako wa Holo ya Mfumo, vatirhi vo tirhandzela lava humaka (ema-)evandlheni leri nga ta tirhisa muako wolowo lowuntshwa kumbe lowu pfuxetiweke kun’we ni mavandlha ya le kusuhi, hi vona lava endlaka mintirho leyin’wana yo pfuneta. Van’wana va vona va leteriwa ivi endzhaku ka sweswo va faneleka tanihi lava nga ni ntokoto kumbe vatirhi va vutshila leswaku va kota ku tata Kingdom Hall Construction Worker Questionnaires.

¹⁹ Lava laviwaka ngopfu hi Tikomiti To Aka Ta Swifundzha n’hweti na n’hweti hi lava nga ni ntokoto entirhweni wa ku aka ni lava tinyiketaka ku pfuna loko ku akiwa Holo ya Mfumo. Va fanele va va ni xiyimo lexinene evandlheni ni ku hlawuriwa hi huvo ya vakulu va vandlha. Loko u ri eka ntlawa lowu, xana u nga swi kota ku hlela swiyimo swa wena leswaku u pfuna exivandleni lexi xa ntirho wa Yehovha? (Neh. 4:6) Loko u ta swi kota, kuma fomo ya Kingdom Hall Construction Worker Questionnaire eka mulanguteri la ungamelaka kumbe matsalana evandlheni ra wena ivi u yi rhumela hi ku hatlisa.

²⁰ Tlhandla-kambirhi, ku ni vamakwerhu lava vupfeke emoyeni lava nga vakulu ni malandza ya vutirheli, lava nga ha swi kotaka ku langutela. Hambi loko ntokoto wa vona wo aka wu ri wutsongo, na vona va nga ha tisa fomo ya swivutiso. Vo tala lava nga eka xiyenge lexi va pfuna eka tindzawulo leti nga riki ta ku aka to fana ni ku kongomisa mafambelo, ntirho wa swakudya, ku rindza, matirhiselo ya nhundzu, vuhlayiseki, nkunguhato, ku xava, ku hlaya timali ni mpfuno wa xihatla. Van’wana na vona va leteriwa leswaku va ta tirhisiwa swinene enkarhini lowu taka. Vakulu ni malandza ya vutirheli va khutaziwa ku langutisisa loko swi ta koteka leswaku va kumekela ntirho lowu wu dzunisaka Tata wa hina, Yehovha.—Ringanisa 1 Samuwele 3:8; Matewu 4:20.

²¹ Hinkwerhu Hi Nga Hlanganyela: Hinkwerhu hi nga komba moya lowunene eka ntirho lowu wa nkoka hi ku pfuna lomu ku nga ni xilaveko evandlheni, loko van’wana va tirha emuakweni wa Holo ya Mfumo hi mahelo-vhiki. Entiyisweni a nga kona exikarhi ka hina loyi a lavaka ku heta vatirhi lava vo tirhandzela matimba hi ku ehleketa leswaku mintirho ya vona ya rirhandzu ya ku aka Tiholo ta Mfumo a hi ntirho wo kwetsima. (Swiv. 24:10; Hev. 6:10) Kavula, ku laveka ku ringanisela, naswona hi yona mhaka leyi Tikomiti To Aka Ta Swifundzha ti nga ni vukheta eku endleni ka swiyimiso leswaku vatirhi vo tirhandzela va nga suki emavandlheni ya vona, kutani va nga kumi ntirho.

²² Hambi loko swiyimo swa hina swi nga hi pfumeleli ku pfuna mayelana ni ntirho wa ku aka hi xiviri, ku ni xiphemu xin’wana xa nkoka xa mhaka leyi lexi hinkwerhu hi nga hlanganyelaka eka xona. I yini? Ku dzunisa Yehovha hi ‘swilo swa hina swa nkoka.’ (Swiv. 3:9) Hi nga tshemba leswaku Yehovha u tsaka swinene loko hi seketela swinene ku akiwa ka Tiholo ta Mfumo leti engetelekeke. Minyikelo ya n’hweti na n’hweti leyi endliwaka eka Nkwama Wa Sosayiti Wo Aka Tiholo Ta Mfumo leyi humaka emavandlheni yo tlula 500, kun’we ni le ka swifundzha ni vanhu, ya tlangeriwa swinene. Hi lava ku mi khutaza hinkwenu leswaku mi ya emahlweni ni nseketelo lowu lowunene tanihi leswi mavandlha yo tala ma kombelaka ku lombiwa mali yo aka Holo ya Mfumo. (Mint. 20:35; 2 Kor. 9:6, 7; 2 Kor. 8:7) Ndlela yin’wana leyi hi nga pfunaka mavandlha lama nga riki na mali, i ku ma nyika swilo swo aka ha swona. Swi nga ha endleka u ri na swona swilo swo aka leswintshwa leswi nga siki tirhisiwaka. Ku vuriwa yini hi swilo leswinene leswi swi tirhisiweke? Etin’hwetini ta sweswinyana, ku ni tindhawu ta minhlangano leti endleriweke mintlawa leyintshwa ya le swidakanini ekusuhi ni le Joni ni le Cape Town hi swilo ni switirho leswi ku hlengiweke ha swona. Komiti Yo Aka Ya Xifundzha ya le ndhawini ya ka n’wina yi ta swi tsakela ku rhwala swilo sweswo. Titwe u tshunxekile ku vulavurisana ni mulanguteri wa wena wa xifundzha kumbe Sosayiti loko u nga swi tivi leswaku u nga yi kuma njhani komiti ya xifundzha.

²³ Mimbuyelo Leyikulu Swinene: Tanihi leswi Tikomiti To Aka Ta Swifundzha ti nyikiwaka swiletelo leswi humaka eka Sosayiti ni vuleteri lebyi engetelekeke, mavandlha lama akaka kumbe ku pfuxeta Tiholo ta Mfumo ma nga pfuneka hi ku kombela xitsundzuxo eka tikomiti leti. Vakulu va ta va va endla hi vutlharhi loko va vulavula ni Komiti Yo Aka Ya Xifundzha va nga si xava ndhawu yo aka ivi va tirhisana swinene ni vamakwerhu lava va nga ni ntokoto eku akeni hinkwako.—Swiv. 15:22.

²⁴ Hakunene, Yehovha u hi pfuna swinene ku aka tindlu to tala ta vugandzeri bya ku dzunisa yena. Vamakwerhu va xinuna ni va xisati va susumetiwa hi rirhandzu ra ku hiteka. Leri i rirhandzu leri Yesu a nga vula leswaku ri ta fungha valandzeri vakwe va xiviri. (Yoh. 13:34, 35) Tanihi leswi Yesu a rhangisa swilaveko swa van’wana emahlweni ka swa yena, na vona va endla sweswo.

²⁵ Ina, lava hlanganyelaka eku akeni ka miako ya vugandzeri bya Yehovha, va vona Pisalema 127:1 yi ri ya ntiyiso. Hambi leswi vatirhi lava nga ni vutshila va tirhisaka nkarhi ni matshalatshala ya vona eku akeni ka Tiholo ta Mfumo hi xihatla, i mikateko ya Yehovha leyi endlaka leswaku va humelela. Onge hinkwerhu hi nga hambeta hi tirhisa nkarhi wa hina ni ‘swilo swa nkoka’ hi ri karhi hi titshega hi Yehovha leswaku a katekisa matshalatshala ya hina.—Swiv. 3:9.

[Xifaniso lexi nga eka tluka 3]

Diepkloof, eSoweto—Yi akiwe hi mune wa masiku

[Swifaniso leswi nga eka tluka 4]

Siku ra ku yi nyiketela—Muako wa swithezi swimbirhi, wa xivumbeko xa timhandzi, Hillbrow, eJoni

[Swifaniso leswi nga eka tluka 5]

Inanda South, eDurban

[Xifaniso lexi nga eka tluka 6]

Lindizwe, Nongoma, le KwaZulu