Ku Akiwa Ka Tiholo Ta Mfumo Eafrika Dzonga Ni Le Matikweni Ya Le Kusuhi
1 Loko hi languta ensin’wini ya misava hinkwayo, swi kufumeta mbilu ku vona ku andza loku nhlengeletano ya Yehovha ya laha misaveni yi nga na kona. N’wexemu eAfrika Dzonga ntsena, ku simekiwe mavandlha lamantshwa yo ringana 37, loko emisaveni hinkwayo ku engeteriwe mavandlha yo ringana 3288. Tanihi leswi ku nga ni ku andza lokukulu swonghasi, a swi hlamarisi leswi ku nga ni xilaveko xa Tiholo ta Mfumo leti engetelekeke.
2 Vamakwerhu vo tala va xinuna ni va xisati va kombisa ku hiseka lokukulu ni ku seketela nhlengeletano ya Yehovha hi ku nyikela nkarhi wa vona ni rifuwo ra vona eku akiweni ka Tiholo ta Mfumo. Tikomiti to Aka ta Xifundzha to ringana 23 leti tirhaka eAfrika Dzonga ni le matikweni ya le kusuhi ti khathalela swilaveko swa mavandlha etindhawini leti ti averiweke eka tona. Lembe rin’wana ni rin’wana, kwalomu ka Tiholo letintshwa ta Mfumo ta 24 ta akiwa naswona to tala ta pfuxetiwa. Ku sukela hi 1985, ku nyiketeriwe Tiholo ta Mfumo to ringana 306. Tikomiti ta swifundzha ti byarhisiwe lunghelo ro langutela mintirho leyi, naswona mintirho ya tona ya tlangeriwa. Lunghiselelo hinkwaro ra ku akiwa ka Tiholo ta Mfumo ri hetisisiwa hi moya wa Vukreste wa ku nyika ni ku tinyikela—ku nga moya lowu misava yi nga wu kombisiki nikatsongo.—2 Tim. 3:2, 4.
3 Leswaku yi pfuneta eku antswiseni ka xiyimo xa Tiholo ta Mfumo, Sosayiti yi sungule ku nyika tikomiti to aka Tiholo ta Mfumo tipulani to fana leti nga eka CAD (Computer Aided Design/Drafting). Leswi swi ta pfuna ku hlayisa nkarhi ni nhundzu ya vatirhi va ku tirhandzela. Swi ta tlhela swi pfuna eku lawuleni ka matirhiselo ya Mali ya Sosayiti ya Tiholo ta Mfumo. Sweswi vakulu va nga hlawula leti va lavaka tona eka tipulani leti leti fanaka. Endzhaku ko kuma endlelo lerintshwa, Komiti yin’wana yo Aka ya Xifundzha eUnited States yi te: “Hi tsake ngopfu naswona swi hi nyanyurile ku kuma endlelo leri. . . . Vamakwerhu lava nga ni ntokoto wa ntivo-vuaki ni vunjhiniyara va pimanyete ku hlayisiwa ka nkarhi hi tiphesente ta 50 ku ya eka 60 hi ku tirhisa maendlelo lawa lamantshwa. Leswi hi nga ni endlelo leri swi ta tlhela swi hi pfuna ku kuma tindlela tin’wana leti fanaka, ni maendlelo ya Tiholo ta Mfumo lama fanaka.” Loko mavandlha ma tirhisana eku seketeleni ka maendlelo lama fanaka ya Tiholo ta Mfumo, hi langutele leswaku ndzhwalo wa vampfampfarhuti va swiyimo swa miako vo tala lava tinyiketeke, vanjhiniyara ni vaaki lava tirhaka hi ku tirhandzela hi ku nyikela mpfuno wa vona va ta vevukeriwa swinene.
4 Vatirhi Va Ku Tirhandzela Va Seketela Ntirho Lowunene: Sosayiti yi tlangela vatirhi vo tala va ku tirhandzela lava pfunetaka eku akiweni ka Tiholo ta Mfumo. Entiyisweni swa tsakisa ku vona makume ya magidi ya vatirhi va ku tirhandzela va tinyiketela eka swiyenge hinkwaswo swa ku akiwa ka Tiholo ta Mfumo. Ku humelela ka nongonoko lowu ka koteka hikwalaho ka moya wo tano wa ku tinyiketa, wa malwandla ni wa ntirhisano wa vatirhi va ku tirhandzela, lava tirhisaka nkarhi lowu kumbexana a va ta wu tirhisa emavandlheni ni le mindyangwini ya vona. (Ps. 110:3; Kol. 3:23) N’wangulo lowu wa rirhandzu wu va endla va faneriwa hi ku bumabumeriwa, hi ku tlangeriwa ni hi nseketelo wa hina hinkwawo.—Rhom. 12:10; Hev. 13:1.
5 Hinkwavo lava fanelekaka ku pfuna Tikomiti to Aka ta Xifundzha nkarhi na nkarhi va komberiwe ku tata tifomo ta Kingdom Hall Construction Worker Questionnaire (S-82). Vandlha ri ti rhumela eka komiti ya xifundzha ri kombisa timfanelo ta muaki ni ku kumeka ka yena. Loko ku ri ni mindzulamiso yo karhi eka xiyimo xa mutirhi wa ku tirhandzela, tanihi loko a rhurhile kumbe a hlawuriwe ku va nandza wa vutirheli kumbe nkulu, ku fanele ku tatiwa tifomo letintshwa hi ku hatlisa ivi ti rhumeriwa hi matsalana wa vandlha. Loko mutirhi wa ku tirhandzela a nga ha faneleki, vakulu va fanele va tsalela komiti yo aka ya xifundzha hi ku hatlisa. Loko ku laveka tifomo tin’wana leti engetelekeke, mi nga ha ti kombela hi ku tirhisa fomo ya n’hweti na n’hweti ya Literature Request. Mulanguteri wa xifundzha na yena a nga tsakela ku tiva lava tinyiketeleke entirhweni lowu wo kwetsima. Hikwalaho, u fanele a kambisisa fayili leyi nga ni tikopi ta swivutiso swa vatirhi va ku tirhandzela va Tiholo ta Mfumo nkarhi na nkarhi loko a endzela vandlha.
6 Ku Hunguta Mintsengo Ya Ntirho Wo Aka: Tikomiti to Aka ta Xifundzha ti lerisiwe ku hlela ndzawulo yo xava nhundzu leyi nga ehansi ka nkulu la nga ni vuswikoti. Vamakwerhu lava tirhaka eka ndzawulo leyi va endla ndzavisiso lowu va pfunaka ku kuma minxavo leyinene hi ku ringanisa swilo leswi xavisiwaka ni leswi ku phikizaniwaka ha swona. Hi ndlela leyi, ku nga endliwa xiboho xa leswaku i switirho swihi leswi nga tirhisiwaka ni leswaku i nhundzu yihi leyi nga xaviwaka. Minkarhi yin’wana, hi nkarhi wa ku akiwa ka Holo ya Mfumo, vamakwerhu lava fanelekaka evandlheni ra ndhawu yoleyo va komberiwa leswaku va ta pfuneta eka ndzawulo leyi.
7 Leswaku va tiyiseka leswaku mali yi tirhisiwa hi vukheta hilaha swi kotekaka hakona, Komiti yo Aka ya Xifundzha yi fanele yi vona matirhiselo hinkwawo ya mali yo aka, ku nga ha va hi ku sayina ticheke kumbe ku tirhisa tivhochara. Hambi i ntirho wa ku aka Holo ya Mfumo leyintshwa, kumbe wa ku pfuxeta yin’wana, lowu katsaka ku tirhisiwa ka vatirhi va ku tirhandzela lava humaka emavandlheni man’wana handle ka leri (lama) nga ta tirhisa holo, komiti ya xifundzha yi fanele yi langutela ntirho wa kona.
8 N’watikontiraka un’wana ni un’wana la hlawuleriweke ku endla ntirho wo karhi eHolweni ya Mfumo, u fanele a humesa vumbhoni bya leswaku u na wona ndzindza-khombo lowu nga ta hakela vatirhi ni ndzindza-khombo lowu sirhelelaka vanhu ni nhundzu, naswona vandlha ri fanele ri katsiwa eka wona, nakambe u fanele a tlhela a va ni vumbhoni bya le nawini. Leswi a swi tirhi eka vatirhi va ku tirhandzela lava pfunetaka hi nkarhi wa ku aka.
9 Ku Pfuneta Hi Swilo Leswi Lavekaka Eka Matiko Man’wana: Ku ni minkarhi yin’wana leyi eka yona matiko lama nga ekusuhi ma lavaka ku pfuniwa hi tikomiti ta xifundzha. Hakanyingi mpfuno wo tano i wa nkoka eku leteleni ka Komiti yo Aka ya Xifundzha ya ndhawu yoleyo. Kunene i xikombiso xa rirhandzu loko vamakwerhu lava nga ni vutihlamuleri va laha tikweni va tiyimisela ku tirhisa timali ta vona leswaku va ya pfuneta etikweni rin’wana. Loko xikombelo xa tiko ro karhi xi amukeriwile, Sosayiti yi ta hlawula komiti ya xifundzha leyi nga ha vaka ni nkarhi lowu yi nga khomekangiki ngopfu eka xiyimiso xa yona xa ku akiwa ka Tiholo ta Mfumo leti nga exifundzheni xa yona leswaku yi pfuna. Leswi swi endla leswaku ku va ni lunghiselelo leri hlelekeke.
10 Hikwalaho ka xilaveko lexi engetelekaka xa Tiholo ta Mfumo ematikweni man’wana, mali leyi nga kona yi fanele yi tirhisiwa hi vutlhari hilaha swi nga kotekaka hakona. Xisweswo, mavandlha ni tikomiti ta swifundzha ti khutaziwa ku hlayisa mali hilaha swi nga kotekaka hakona eku akiweni ka Tiholo ta Mfumo ni le ku antswisiweni ka leti ana ti nga kona. Xikombelo lexi xi amukeriwile hi mandla mambirhi. Minyikelo leyi humaka ematikweni lama fuweke yi karhi yi tirhiseriwa ku kuma mali yo lomba mavandlha lama nga ematikweni lawa ya nga ni xilaveko lexikulu xa Tiholo ta Mfumo kambe laha ku nga riki na switirhisiwa leswi ringaneke ni lomu ku nga ni swiphiqo leswikulu swa timali.
11 Xilaveko xa Tiholo ta Mfumo leti engetelekeke ematikweni yo karhi xa kandziyisiwa eka 1997 Yearbook. Hi xikombiso, ku vulavuriwa hi Ukraine, laha Tiholo ta Mfumo to ringana 47 ti akiweke ku fikela sweswi naswona ka ha akiwa tin’wana ta 56. Xilaveko ematikweni yo tano xi le rivaleni swinene. Xiviko xi ri: “Ku laveka Tiholo ta Mfumo to tala eRussia. Ku ni ku andza lokukulu ka nhlayo ya Timbhoni, kambe mavandlha ya kwalomu ka 85 wa tiphesente lama nga ehansi ka rhavi ra Russia ma hava tindhawu to hlanganyela ta nkarhi hinkwawo. Le Zimbabwe, laha ku nga ni mavandlha ya kwalomu ka 800, vunyingi bya wona ma hlanganyela erivaleni. Leswi swi endle leswaku van’wana lava tsakelaka va tshika ku ta eminhlanganweni.” Swiyimo leswi fanaka swi kona ematikweni ya le Yuropa Vuxa, Afrika ni le Latin America. Eka mavandlha yo ringana 1450 ensin’wini ya hina, ko va mavandlha ya kwalomu ka 400 lama nga ni Tiholo ta wona ta Mfumo leti nyiketeriweke, naswona mavandlha man’wana ya 140 na wona ma tirhisa tiholo leti. Leswi endlaka leswaku mavandlha lamakulu ya kwalomu ka 300 ma lava Tiholo ta Mfumo hi mahlo-ngati.
12 Hambileswi rirhandzu ra vanhu vo tala ri nga hola emasikwini lawa ya makumu, vanhu va Xikwembu va hambeta va kombisa vumbhoni bya ku rhandzana ka vona, rirhandzu leri fikelelaka mindzilikana ya rixaka ni tindhawu. (Mt. 24:12) Hi ku tekelela Tata wa hina la nge tilweni, onge hi nga hambeta hi kombisa rirhandzu ro tano hi ku seketela ka hina ku akiwa ka Tiholo ta Mfumo hi ku swi rhandza, eAfrika Dzonga ni le matikweni ya le kusuhi. Loko hi endla tano hi ta amukeriwa ni ku katekisiwa hi Yehovha hi ndlela leyi fuweke.—Mal. 3:10; Hev. 6:10.