A Hi Hlayiseni Tindhawu Ta Hina To Gandzela Eka Tona Ti Ri Eka Xiyimo Lexinene
1. Hi xihi xikongomelo xa Holo ya Mfumo?
1 Emisaveni hinkwayo ku ni mavandlha ya Timbhoni ta Yehovha yo tlula 94 000. Mavandlha yo tala ma hlengeletana eTiholweni ta Mfumo, leti ti nga ntsindza wa vugandzeri lebyi tengeke endhawini yoleyo, leswaku ma dyondza Bibele ni ku tsakela xinakulobye xa Vukreste. Hambiswiritano, van’wana va ha hlengeletana etindhawini leti hiriweke, to tanihi swikolo ni tindhawu to khomisa.
2. Ha yini swi ri swa nkoka ku hlayisa Holo ya Mfumo yi basile naswona yi tlhela yi languteka?
2 Xiyimiso Xo Basisa Xa Nkarhi Na Nkarhi: Ntirho wo khathalela Holo ya Mfumo i xiphemu xa nkoka xa vugandzeri bya hina. Buku leyi nge Vutirheli Bya Hina eka matluka 61-2 yi ri: “Vamakwerhu va fanele ku swi teka ku ri lunghelo ku tirha mintirho ya ku tirhandzela yo hlayisa Holo ya Mfumo yi basile, yi amukeleka naswona yi ri eka xiyimo lexinene ku nga ri ku yi seketela hi swa timali ntsena. Holo ya Mfumo yi fanele yi yimela nhlengeletano ya Yehovha hi ndlela leyinene, endzeni ni le handle.” Leswi Holo ya Mfumo yi tirhisiwa ko tala evhikini, swa fanela leswaku yi tshama yi ri karhi yi basisiwa ni ku lunghisiwa. Hakanyingi timhaka to khathalela Holo ya Mfumo ti endliwa hi vatirhi va ku tirhandzela lava tirhisaka holo ya kona. Ku fana ni le minkarhini ya ku tsariwa ka Bibele, namuntlha malandza ya Yehovha ma fanele ma tikarhatela ku “pfuxa ni ku lunghisa” ndhawu ya wona yo gandzela eka yona.—2 Tikr. 34:10.
3. Xana ntirho wo basisa Holo ya Mfumo wu nga hleriwa njhani naswona i vamani lava nga hoxaka xandla eka lunghelo leri?
3 Xiyimiso xa vhiki ni vhiki xo basisa Holo ya Mfumo xi fanele ku veheriwa eka bodo ya switiviso. Mintlawa hinkwayo ya dyondzo ya buku yi nga ha siyerisana eku basiseni ka holo, yi landzelela nxaxamelo wa swilo leswi faneleke ku endliwa vhiki rin’wana ni rin’wana. Hinkwavo lava va swi kotaka va nga hlanganyela eka lunghelo ra vhiki ni vhiki ro hlayisa Holo ya Mfumo yi basile yi tlhela yi languteka. Hambi ku ri vana va nga hlanganyela eku basiseni loko va tirha ehansi ka nkongomiso wa vatswari, leswi swi ta va dyondzisa ku tlangela lunghelo leri. Ngopfu-ngopfu loko Holo ya Mfumo yi tirhisiwa hi mavandlha yo tlula rin’we, ntirhisano wa laveka leswaku ku hetisisiwa ka xiphemu lexi xa nkoka xa vugandzeri bya hina ku nga vi ndzhwalo wa vanhu vo karhi ntsena. Leswi swi tano ni le ka mavandlha lama tirhisaka muako lowu hiriweke kumbe etindhawini to khomisa.
4. I yini lexi nga endliwaka leswaku vandlha ri tiva leswi ri faneleke ri swi endla loko ri basisa Holo ya Mfumo?
4 Nxaxamelo wa swilo leswi faneleke ku endliwa wu fanele wu veheriwa laha ku vekiwaka kona swo basisa. Nxaxamelo lowu wu fanele wu kombisa mintirho leyi faneleke ku endliwa vhiki ni vhiki, yo fana ni ku basisa ehansi, ku hlantswa mafasitere, ku susa ritshuri etikhawuntarini, ku lahla thyaka ni ku basisa swivoni. Mintirho yo fana ni ku pholicha fenichara ya mapulanga ni ku hlantswisisa switulu, makhetenisi ni timboni a yi lavi ku endliwa nkarhi na nkarhi. Tikhemikhali hinkwato leti tirhisiwaka eku basiseni ti fanele ti vekiwa laha vana va nga taka va nga fikeli kona, ti tlhela ti tsariwa mavito. Nakambe ku nga nyikiwa ni nhlamuselo yo koma ya matirhiselo ya tikhemikhali.
5. Vuhlayiseki i bya nkoka hi ndlela yihi naswona hi swihi swilo leswi lavaka ku kamberiwa nkarhi na nkarhi? (Vona bokisi leri nga eka tluka 4.)
5 Vuhlayiseki i bya nkoka swinene eHolweni ya Mfumo. (Det. 22:8) Bokisi leri ri nga eka tluka 4, ri xaxameta swilo swin’wana leswi lavaka ku kamberiwa nkarhi na nkarhi leswaku ku papalatiwa makhombo.
6. Xana ntirho wa ku hlayisa Holo ya Mfumo wu hleriwa njhani?
6 Ku Hlayisa Holo Ya Mfumo: Huvo ya vakulu yi ni vutihlamuleri bya ku kongomisa ku hlayisiwa ka Holo ya Mfumo. Hi ntolovelo, huvo yi hlawula nkulu kumbe nandza wa vutirheli leswaku a fambisa ntirho. Hi yena a hlelaka timhaka ta siku ni siku leti khumbaka Holo ya Mfumo, a tiyiseka leswaku holo yi tshama yi basile naswona yi ri exiyin’weni lexinene a tlhela a vona leswaku swilo leswi lavaka ku xaviwa swi tshama swi ri kona. I swa nkoka ku vona leswaku a ku na swilo leswi nga vangaka khombo eholweni hi yoxe kumbe ejarateni ra yona. Loko mavandlha mambirhi kumbe ku tlula ma tirhisa holo yin’we, tihuvo ta vakulu ti ta hlawula komiti yo langutela holo leswaku yi endla malunghiselelo ya ku khathalela muako ni jarata ra kona. Komiti leyi yi tirha ehansi ka vukongomisi bya tihuvo ta vakulu.
7. (a) I yini lexi endliwaka lembe ni lembe ku tiyisekisa leswaku Holo ya Mfumo yi tshama yi ri exiyin’weni lexinene? (b) Hi swihi swilo leswi lavaka ku tshama swi ri karhi swi khathaleriwa? (Vona bokisi leri nga eka tluka 5.)
7 Holo ya Mfumo yi fanele yi kamberiwa lembe na lembe. Vakulu va ni vutihlamuleri byo endla malunghiselelo yo khathalela nchumu wihi ni wihi lowu lavaka ku lunghisiwa. Vahuweleri va nga komberiwa leswaku va ta pfuna loko ku ri ni xo karhi lexi lavaka ku lunghisiwa. Hinkwerhu hi fanele hi tshama hi xalamukele ku lulamisa nchumu wihi ni wihi hambi wu ri wuntsongo naswona a hi fanelanga hi hlwela ku khathalela swilo leswi lavaka ku lunghisiwa. Ndhawu yo khomisa, leyi ku khomeriwaka minhlangano eka yona yi fanele yi khathaleriwa na yona.
8. Hi rini laha vakulu va nga vulavurisanaka ni Komiti Yo Aka Ya Xifundzha?
8 Loko vakulu va lava switsundzuxo kumbe mpfuno malunghana ni ku lunghisa Holo ya Mfumo, va nga ha tivisa Komiti Yo Aka Ya Xifundzha. Leswi swi nga ha katsa timhaka to fana ni ku sivela ku kurha emuakweni.
9. Hi wahi maendlelo lawa ma faneleke ma landzeriwa loko ku fanele ku qachiwa munhu?
9 Ku Tirhisa Mali Ya Vandlha Hi Vutlhari: Ntirho wo tala wa le ndzeni ni le handle ka Holo ya Mfumo wu endliwa hi vatirhi va ku tirhandzela. Matshalatshala ya vona ya ku tirhandzela ma kombisa rirhandzu leri va nga na rona naswona leswi swi londzovota mali. Loko swi boha leswaku ku qachiwa munhu wo karhi leswaku a ta endla mintirho yo fana ni ku dlaya switsotswana kumbe ku basisa thanki ra nkululo, vakulu va ta lava munhu la nga durhiki. Va ta sungula hi ku tsala leswaku va lava ku endliwa ntirho wa njhani ni switirhisiwa swin’wana ni swin’wana leswi nga ta laveka. Tikopi ta phepha leri ti ta nyikiwa vanhu vo hlayanyana lava kotaka ku endla ntirho lowu leswaku va kota ku vula leswaku va lava mali muni. Kutani endzhaku va hlawula loyi a nga chipa. Maendlelo lawa ma fanele ma tirhisiwa hambiloko ku ri makwerhu loyi a nga ta endla ntirho kumbe loyi a nga ta tisa nhundzu hi nxavo wo karhi.
10. I yini lexi endliwaka ku tiyisekisa leswaku mali ya vandlha yi tirhisiwa hi ndlela leyi faneleke?
10 Vakulu va fanele va teka magoza lama faneleke leswaku va kombela ku papalata ku hakela xibalo, loko lunghiselelo leri ri ri kona etikweni ra ka n’wina. Loko mavandlha yo tlula rin’we ma tirhisa Holo yin’we ya Mfumo, komiti leyi langutelaka holo yi fanele yi va ni akhawunti yo hlawuleka leyi tirhisaka cheke naswona yi fanele yi yisa xiviko xa timali lexi tsariweke ehansi, eka huvo yin’wana ni yin’wana ya vakulu n’hweti na n’hweti, leswi swi ta endla leswaku vakulu va tiva leswaku mali yi tirhisiwe njhani. Vakulu va fanele va yi tirhisa kahle mali ya vandlha.
11. Xana ku nga endliwa yini loko ku fanele ku endliwa ntirho lowukulu wo lunghisiwa kumbe ku pfuxetiwa holo?
11 Ntirho Lowukulu Wo Lunghisa Ni Ku Pfuxeta Muako: Loko komiti leyi langutelaka holo yi xiya leswaku ku na leswi lavekaka eHolweni ya Mfumo kumbe leswi lavaka ku lunghisiwa, komiti yi fanele yi kombela nkongomiso eka huvo ya vakulu. Loko yi kuma leswaku ku ni swilo leswikulu leswi lavaka ku lunghisiwa lerova ku ta laveka mpfuno wo huma ni le ka vanhu lava nga tirhisiki yona Holo yoleyo ya Mfumo, vakulu va fanele va vulavurisana ni Komiti Yo Aka Ya Xifundzha. Vamakwerhu lava, lava nga ni ntokoto, va ta nyikela swiringanyeto leswi tirhaka ni ku kongomisa ntirho. Loko ku ta laveka mali yo tala, i swa nkoka leswaku ku kumeka leswaku i mali muni leyi nga ta laveka naswona vandlha ri fanele ri tivisiwa ku vona loko ri pfumela leswaku ku tirhisiwa mali ya kona.—Vona Bokisi Ra Swivutiso eka Vutirheli Bya Hina Bya Mfumo bya February 1994.
12. Xana hi nga swi kombisa njhani leswaku ha ri tlangela lunghelo ra hina ra ku hlanganyela eHolweni ya Mfumo?
12 Ha ri tlangela swinene lunghelo ra hina ro hlengeletana swin’we eHolweni ya Mfumo! A hi fanelanga hi tshika ku hlengeletana ka hina kumbe hi ku teka ku nga ri ka nkoka. Hinkwerhu hi nga endla leswaku lunghiselelo leri, leri hi khutazaka, ri humelela hi ku hlanganyela hi xitalo leswaku hi khathalela Holo ya hina ya Mfumo. Leswi swi tlakusa vugandzeri lebyi tengeke naswona swi yisa ku dzuneka evitweni ra Yehovha. A hi tikarhateleni ku hlayisa ndhawu ya hina ya vugandzeri yi ri eka xiyimo leyinene.
[Bokisi leri nga eka tluka 4]
Nxaxamelo Wa Leswi Faneleke Ku Kamberiwa
◻ Loko swi ri kona, swo tima ndzilo swi fanele swi kumeka hi ku olova naswona swi fanele swi lunghisiwa kan’we hi lembe.
◻ Switepisi ni tindhawu to huma ha tona ti fanele ti vonaka kahle, ni ku kumeka hi ku olova, ti tlhela ti va ni swo khomelela.
◻ Ndhawu yo veka swilo, swihambukelo ni tindhawu to hayeka majazi swi fanele swi basa, swi hleleka naswona a swi fanelanga swi va ni swilo leswi khomaka ndzilo hi ku hatlisa, swilo swa munhu hi xiyexe ni thyaka.
◻ Lwangu ni swo kangatela mati ya mpfula swi fanele swi kamberiwa ni ku basisiwa nkarhi na nkarhi
◻ Laha vanhu va fambaka kona ni laha ku pakiwaka kona mimovha ku fanele ku voningiwa naswona a ku fanelanga ku rheta kumbe ku va ni swilo leswi nga wisaka vanhu.
◻ Swilo swa gezi, swo kufumerisa ni swo hungisa moya swi fanele swi kamberiwa kahle ni ku lunghisisiwa.
◻ Laha ku pfutaka ku fanele ku hatla ku pfariwa leswaku ku siveriwa ku kurha.
◻ Muako wu fanele wu lotleriwa loko ku nga ri na munhu eka wona.
[Bokisi leri nga eka tluka 5]
Ku Hlayisa Muako Ni Nhundzu
◻ Ehandle: Xana lwangu, khumbi, pende, mafasitere ni bodo leyi kombisaka vito ra muako swi le xiyin’weni lexinene?
◻ Rivala: Xana rivala ra languteka? Xana laha ku fambiwaka kona, rihlampfu ni ndhawu yo paka mimovha swi le ka xiyimo lexinene?
◻ Endzeni: Xana mete, makhetenisi, switulu, fenichara ya le khumbini, phepha ro sasekisa ro namarheta ekhumbini ni ndhawu yo veka tibuku swa languteka?
◻ Switirhisiwa: Xana mavoni, michini yo kurisa mpfumawulo ni swo hungisa moya swi tirha kahle?
◻ Swihambukelo: Xana swi basile naswona swi tirha kahle? Xana mathawula ma hlantswiwa nkarhi na nkarhi?
◻ Maphepha ya vandlha: Xana maphepha ya vun’wini ma le nkarhini naswona ma helerile? Loko lunghiselelo leri ri ri kona etikweni ra kan’wina, xana tifomo to papalata ku hakela xibalo ta tatiwa lembe ni lembe?