Hi Nga Pfuneta Njhani Eku Khathaleleni Ka Holo Ya Hina Ya Mfumo?

Holo yin’wana ni yin’wana ya Mfumo ya Timbhoni ta Yehovha yi byarha vito ro kwetsima ra Xikwembu. Hikwalaho, hi swi teka ku ri lunghelo ku va hi katseka eku yi hlayiseni leswaku yi tshama yi basile, yi languteka ni ku va yi lunghisiwe kahle naswona i xiphemu xa nkoka eka vugandzeri bya hina byo kwetsima. Hinkwerhu hi nga pfuneta.

Hlanganyela eku basiseni endzhaku ka minhlangano. Endzhaku ka minhlangano yin’wana ni yin’wana, hi ntsako vamakwerhu va basisa Holo ya Mfumo. Kan’we hi vhiki, holo hinkwayo ya basisiwa. Nkulu kumbe nandza wa vutirheli u kongomisa ntirho wo basisa, hi ntolovelo u landzelela nxaxamelo wa leswi faneleke swi basisiwa. Van’wana va kukula, va koropa kumbe va basisa khapete hi muchini, va sula ritshuri, va veketela switulu kahle, va basisa swihambukelo, va hlantswa mafasitere ni swivoni, va lahla thyaka kumbe va yi basisa ehandle ni ku basisa rivala. Kan’we hi lembe, ku vekiwa siku leri ku nga ta basisiwa endzeni ni le handle ka holo. Loko hi tirha ni vana va hina eka mintirho yin’wana, hi va dyondzisa leswaku va xixima ndhawu ya hina ya vugandzeri.—Eklesiasta 5:1.

Hlanganyela eku yi lunghiseni. Lembe rin’wana ni rin’wana, Holo ya Mfumo ya kamberiwa hi vukheta endzeni ni le handle ka yona. Endzhaku ka ku kamberiwa koloko, nkarhi na nkarhi ku lunghisiwa leswi onhakeke leswaku yi tshama yi ri eka xiyimo lexinene, leswaku ku papalatiwa ku tirhisa mali swi nga fanelanga. (2 Tikronika 24:13; 34:10) Holo ya Mfumo leyi baseke ni leyi khathaleriwaka kahle i ndhawu leyi faneleke yo gandzela Xikwembu xa hina. Hi ku hlanganyela eka ntirho lowu, hi kombisa leswaku ha n’wi rhandza Yehovha ni ku tlangela ndhawu ya hina ya vugandzeri. (Pisalema 122:1) Leswi swi tlhela swi endla leswaku vanhu va yi tsakela.—2 Vakorinto 6:3.

• Ha yini hi nga fanelanga hi honisa ndhawu ya hina ya vugandzeri?

• Hi wahi malunghiselelo lama endliwaka leswaku Holo ya Mfumo yi tshama yi basile?