Bokisi Ra Swivutiso

◼ I mani la faneleke ku basisa Holo ya Mfumo?

Holo ya Mfumo leyi baseke ni leyi kokaka mahlo, yi ri yimelela kahle rungula ra hina leri hi ri chumayelaka. (Ringanisa 1 Petro 2:12.) Ku hlayisa holo yi basile ni ku hleleka i swa risima swinene naswona un’wana ni un’wana a nga hoxa xandla leswaku yi tshama yi basile. A hi fanelanga hi rindzela leswaku ku va vanhu va nga ri vangani lava hlayisaka holo va ri voxe. Hi ntolovelo ku basisa holo ku hleriwa hi ku ya hi mintlawa ya Dyondzo ya Buku ya Vandlha, mufambisi wa dyondzo kumbe mupfuni wakwe hi yena la rhangelaka. Etiholweni leti ku hlanganyelaka mavandlha yo hlayanyana eka tona, vakulu va ta hlela leswaku mavandlha hinkwawo ma hlanganyela eku basiseni ka holo.

Xana hi yihi ndlela yo antswa ya ku hetisisa vutihlamuleri lebyi? Holo ya Mfumo yi fanele yi basisiwa hi ku ya hi xiyimiso nkarhi ni nkarhi. Switirhisiwa ni nhundzu yo basisa ha yona swi fanele swi tshama swi ri kona leswaku swi ta tirhisiwa eku basiseni. Nxaxamelo wa swilo leswi lavaka ku basisiwa wu fanele wu vekiwa laha vatirhi va nga ta wu vona loko va lava nkongomiso. Ku nga ha tirhisiwa tindlela timbirhi to basisa leti hambaneke, yin’wana ku nga va ku basisanyana endzhaku ka nhlangano wun’wana ni wun’wana kasi leyin’wana ku nga ha va ya ku basisa holo hinkwayo vhiki ni vhiki. Mufambisi wa dyondzo ya buku u fanele a endla xiyimiso xa siku xa ku basisa holo hinkwayo ni ku veka nkarhi lowu hinkwavo lava averiweke ku basisa holo va nga ta kota ku va kona ha wona. Nakambe byanyi, swiluva ni swimilana swi fanele swi khathaleriwa nkarhi ni nkarhi. Swindledyana ni tindhawu to paka mimovha swi fanele swi tshama swi basile. Lembe ni lembe ku fanele ku basisiwa holo hinkwayo, kumbexana ku basisa ku nga ha endliwa emahlweni ka Xitsundzuxo. Ku basisa loku ku nga ha katsa ku hlantswa mafasitere kun’we ni khumbi, ku hlantswa khapete kun’we ni ku hlantswa makhetenisi.

Ina, hinkwerhu hi nga olovisa ntirho wo basisa hi ku papalata ku cukumeta tincinghamu kumbe ku thyakisa endzeni kumbe ehandle ka holo. Hi nga siya xihambukelo xi basile endzhaku ka loko hi xi tirhisile, leswaku munhu la landzelaka a ta kota ku xi tirhisa. Papalata ku onha switirho kumbe ku onha fanichara. Xiyani thyaka leri nga ekhapeteni, switulu leswi onhakeke, tiphayiphi leti nga tirhiki kahle, timboni ta gezi leti tshweke ni swin’wana kutani mi tivisa makwerhu la khathalelaka timhaka ta vuhlayiseki bya Holo ya Mfumo.

Hinkwerhu ka hina a hi tiyimiseleni ku endla xiphemu xa hina. Leswi swi ta endla leswaku yi va yindlu yo xonga ya vugandzeri naswona ku basa ka yona ku ta endla vanhu va vona leswaku hi vanhu lava baseke lava fundzhaka Yehovha Xikwembu.—1 Pet. 1:16.