Ku Lunghiselela Swingheniso Leswi Vanhu Va Swi Tsakelaka

1. Ha yini xingheniso lexinene xi ri xa nkoka?

¹ Swingheniso leswinene swi endla leswaku swi olova ku va ni bulo leri sekeriweke eMatsalweni. Swingheniso leswi vanhu va nga swi tsakelaka a swi fani, kambe hinkwaswo swi lava ku lunghiseleriwa kahle. (Swiv. 15:28) I yini leswi endlaka leswaku vanhu va tsakela xingheniso?

2. Hi nga xi lunghiselela njhani xingheniso lexi endlaka leswaku vanhu va tsakela?

² Vulavula Hi Timhaka Leti Karhataka Vanhu: Xingheniso xa hina xi fanele xi endla leswaku vanhu va tsakela handle ka swona n’wini wa muti a nga ha tsema bulo. Hikokwalaho loko u lunghiselela, anakanya hi timhaka leti karhataka vanhu. Xana va lava hulumendhe leyinene, ntsako endyangwini kumbe ku herisiwa ka tinyimpi? Hakanyingi vanhu va rhandza ku tiphofula, hikwalaho lunghiselela xivutiso lexi tlhontlhaka mianakanyo. Loko u chumayela u nga ha tirhisa xin’wana xa swingheniso leswi nga eka Vutirheli Bya Hina Bya Mfumo kumbe u fambisana ni swiyimo swa le nsin’wini ya n’wina. Minkarhi yin’wana mi nga ha titoloveta swingheniso swin’wana hi nkarhi wa Vugandzeri bya Ndyangu bya nimadyambu.

3. Hi nga swi endla njhani leswaku xingheniso xa hina xi fambisana ni mindhavuko ya lava hi va chumayelaka?

³ Anakanyisisa Hi Mindhavuko: Etindhawini tin’wana, loko hi va endzerile va lava hi namba hi nghena emhakeni. Kasi etindhawini tin’wana a swi xiximeki loko muendzi a nghena emhakeni a nga sungulanga a pfuxelana ni n’wini wa muti. Etindhawini tin’wana, swa hi olovela ku tirhisa Bibele loko hi sungula ku vulavula ni vanhu hikwalaho ka leswi va nghenaka tikereke. (Mint. 2:14-17) Kambe, loko vanhu va nghena kereke leyi nga riki ya Vukreste kumbe va nga ngheni kereke, swi nga va swinene ku vulavula hi Bibele loko hi endla riendzo ro vuyela ku nga ri eka riendzo ro sungula.—Mint. 17:22-31.

4. I marito ya njhani lawa hi faneleke hi ma tirhisa eka swingheniso swa hina?

⁴ Swingheniso: Lunghiselela swingheniso swa wena hi vukheta. Tirhisa marito yo olova. Ndlela leyi hi vulavulaka ha yona na yona i ya nkoka. Hiseka naswona u n’wayitela hi ndlela ya xinghana leyi kombisaka leswaku wa khathala hi n’wini wa muti. Loko hi landzela swiringanyeto leswi swi ta hi pfuna leswaku hi lunghiselela swingheniso leswi nga ta endla leswaku vanhu lava nga ensin’wini ya hina va lava ku dya “etafuleni ra Yehovha.”—1 Kor. 10:21.