Ku Antswisa Vutshila Bya Hina eNsin’wini—Ku Lunghiselela Xingheniso Xa Hina

Lexi Endlaka Swi Va Swa Nkoka: Loko xingheniso xa hina xi nga n’wi tsakisi n’wini wa muti, a nga ha tsema bulo hi nga si n’wi chumayela. Hikwalaho, vahuweleri vo tala va teka xingheniso xa vona xi ri xa nkoka swinene. Hambileswi swingheniso leswi hi nga swi tirhisaka swi nga kona eka Vutirheli Bya Hina Bya Mfumo ni le bukwini leyi nge Ku Hlamulana, minkarhi yin’wana swi va swi nga helelanga, leswaku hi ta kota ku pfumelelana ni swiyimo. Hambiloko xingheniso lexi hi nga xi tirhisaka xi helerile, vahuweleri va nga ha hlawula ku xi cinca kumbe va lunghiselela xa vona vini. Hikwalaho, hi ta va ni vuyelo lebyinene loko hi xi lunghiselela kahle xingheniso xa hina ematshan’weni yo vula swin’wana ni swin’wana leswi taka emiehleketweni loko n’wini wa muti a pfula nyangwa.—Swiv. 15:28.

Ndlela Leyi U Nga Swi Endlaka Ha Yona:

Hlawula nhloko-mhaka. Yi fanele yi va yi sekeriwe eka nkandziyiso lowu u nga ta wu fambisa naswona yi fanele yi koka rinoko ra vanhu va le nsin’wini ya n’wina.
Ma lunghiselele hi vukheta marito yo sungula lawa u nga ta ma vula endzhaku ko xeweta n’wini wa muti. U nga ha sungula hi ku: “Ndzi ku endzerile hikwalaho ka . . . ,” “Vanhu vo tala va karhatekile hi . . . ,” “Ndzi tsakela ku twa vonelo ra wena hi . . . ,” kumbe u vula swin’wana. Hakanyingi swivulwa swo koma swi tlhela swi olova swi koka rinoko ra vanhu. Vahuweleri van’wana va hlawula ku nhlokohata xingheniso xa vona.
Vutisa n’wini wa muti xivutiso lexi lavaka leswaku a vula vonelo ra yena lexi nga ta endla leswaku bulo ri ya emahlweni. (Mat. 17:25) Tsundzuka leswaku swi nga ha endleka leswaku a a ehleketa hi timhaka tin’wana loko u nga si fika, hikwalaho xivutiso xa wena a xi fanelanga xi tika swinene kumbe xi n’wi chavisa.

Ringeta Ku Endla Leswi N’hweti Leyi:

Vekelani nkarhi etlhelo wo lunghiselela xingheniso xa n’wina ivi mi titoloveta xona hi nkarhi wa vugandzeri bya n’wina bya ndyangu.
Loko u ri ensin’wini, byela vahuweleri van’wana leswi u kunguhateke ku swi vula. (Swiv. 27:17) Loko xingheniso xa wena xi nga vi ni vuyelo lebyinene, xi cince.