Ku Tlangela Rifu Leri Nyikaka Ntshembo Wa Vutomi Lebyi Nga Heriki
1 Ni madyambu hi April 6, 1993, hi ta tlangela rifu ra Munyiki Lonkulu wa vutomi. (Mint. 3:15) Hakunene, swi fanela swinene ku tsundzuka vutomi ni rifu ra Yesu Kreste. Ntshembo wa hina wa ku hanya hi laha ku nga heriki wu titshege hi ngati leyi halatiweke ya Yesu.
2 Xitsundzuxo xi komba nkoka wa rifu ra Kreste eku hetisekeni ka xikongomelo xa Yehovha. Xikongomelo xexo xi katsa ku endla gandzelo ra munhu la hetisekeke leri lavekaka leswaku ku kutsuriwa rixaka ra Adamu, ku endla leswaku magidi ya timiliyoni ta vanhu ma va ni ripfumelo ni ku hanya hi laha ku nga heriki emisaveni ya paradeyisi.—Yoh. 3:16.
3 Hinkwavo varhandzi va ntiyiso ni vutomi va langutele ku tlangela Xilalelo xa Hosi hi ku landza xileriso xa Yesu. (Lk. 22:19) Hi nga endla yini hina hi hexe leswaku hi komba ku tlangela ka hina lunghiselelo ra gandzelo ra nkutsulo wa Kreste? Leswi hi vonaka nkoka wa nkhuvo lowu, ku laveka ku hlela lokunene. Hi wahi malunghiselelo lawa u ma endlaka ya xiendlakalo lexi xo hlawuleka?
4 Ku Laveka Ku Lunghiselela Ka Ha Ri Ni Nkarhi: Ina, hi ta endla leswaku xirho xin’wana ni xin’wana xa ndyangu xi va kona. Nakambe hi fanele hi lunghisa mianakanyo ni ku anakanya hi tindzimana ta Bibele ta April 1-6 leti kombisiweke eka 1993 Calendar. Swi ta va swinene ku katsa rungula leri khumbaka nkoka wa Xitsundzuxo eka dyondzo ya Bibele ya hina vini ni ndyangu emahlweni ka April 6. Kunguhata ku hatla u fika u tlhela u tshamanyana endzhaku ka nkhuvo wa Xitsundzuxo leswaku u ta amukela lavantshwa lava va sungulaka ku va kona.
5 Eka mavhiki ya le mahlweni ka Xitsundzuxo, rhamba hinkwavo lava tsakelaka lava u va tivaka va ta eka nkhuvo lowu. Tirhisa swirhambo leswi gandlisiweke leswi odiweke hi vandlha ra ka n’wina. Loko u swi tirhisa, tsundzuka ku tivisa vanhu lava tsakelaka, ndhawu ni nkarhi wa nkhuvo wa le ka n’wina. Endla nxaxamelo wa lava u lavaka ku va rhamba. Xana hinkwavo lava lavaka ku va kona va na swona swo famba ha swona? Loko va nga ri na swona, u nga va pfuna hi yini? Loko u ri ni ndhawu emovheni ya wena, ha yini u nga vutisi vakulu loko un’wana a lava xo famba ha xona?
6 Hikwalaho ka leswi lowu ku nga nkhuvo wa nkoka elembeni, ni leswi ku languteriweke vanhu vo tala, vakulu va fanele va endla malunghiselelo yo hlawuleka ka ha sele nkarhi. (1 Kor. 14:40) Loko ka ha sele masikunyana kumbe vhiki emahlweni ka April 6, vakulu va ta hlela nhlengeletano yo hlawuleka swin’we ni vamakwerhu lava nga ta pfuna enkhubyeni lowu, va tiyiseka leswaku va twisisa malunghiselelo ni ndlela leyi swifanekiselo swi nga ta fambisiwa ha yona. Loko u averiwe ku pfuna hi nkarhi wa nkhuvo tanihi murindzi kumbe mufambisi wa swifanekiselo, landzelela swikongomiso swa vakulu etimhakeni leti. Hi ku languta switsundzuxo leswi nga eka bokisi eka tluka 7, vakulu va endla leswaku malunghiselelo ya varindzi, vafambisi va swifanekiselo, swifanekiselo ni xivulavuri, ma endliwa kahle ka ha ri emahlweni.
7 Vamakwavo va Kreste lava seleke emisaveni namuntlha a va ha ri vangani, naswona ku nga ri khale ngopfu, ku tlangeriwa ka Xilalelo xa Hosi ku ta fika emakun’wini ya kona. (1 Kor. 11:25, 26) Loko ha ha ri na lunghelo leri, onge hi nga hambeta hi tlangela rifu leri nyikaka ntshembo wa vutomi lebyi nga heriki.