Ku Tlangela Ka Wena Rifu Ra Kriste

¹ “N’wana-wa-Munhu a nga telanga ku tirheriwa, kambe ku tirhela van’wana ni ku nyiketa vutomi bya yena ku kutsula lavo tala.” (Mat. 20:28) A nga kona munhu un’wana la tshameke a hanya la misaveni loyi a a ta endla leswi Yesu Kriste a swi endleleke vanhu. Hi ndlela ya yena ya vutomi ni rifu ro hetelela emhandzini ya nxaniso, hi nghenisiwe endleleni yo kuma nyiko leyikulu ngopfu ku tlula leyi munhu un’wana ni un’wana a nga yi kumaka, vutomi lebyi nga heriki. Kambe, vanhu vo tala a va swi tlangeli leswi Kriste a swi endleke.

² Xiya leswi humeleleke loko Yesu a hlangana ni vanhu va khume va nhlokonho. Loko va vona Yesu, va huwelela: “Yesu, n’wini wa hina, hi twele vusiwana!” (Luka 17:13) U va twele vusiwana, a va letela hi ku ya hi Nawu leswaku va famba va ya tikombisa eka vaprista. Loko va ri endleleni, hinkwavo vanhu va khume va nhlokonho va hanyisiwa.

³ Kambe i wun’we ntsena loyi a vuyeleke eka Yesu a ya khensa. Lavan’wana va kaye va kwihi? Va ye emahlweni ni ndlela ya vona va nga anakanyi hi ku ya khensa mupfuni wa vona. (Luka 17:15-17) Xana hina hi fana na mani? Hi fanele hi fana ni munhu loyi a vuyeke. A a ri ni ku tlangela ka ntiyiso. Xana hi titwa hi ndlela yoleyo hi rifu ra Kriste?

⁴ Ku Kombisa Ku Tlangela Ka Hina: Lembe rin’wana ni rin’wana Sosayiti yi ringanyeta leswaku tindzimana to karhi ti hlayiwa eBibeleni hi vhiki ra le mahlweni ka siku ra Xitsundzuxo. Ku hlaya ka Bibele loku ringanyetiwaka ku nga kumiwa ehansi ka masiku ya April 12-17 eka 1992 Calendar of Jehovah’s Witnesses. Hi nga kombisa ku tlangela ka hina hi ku hlaya ni ku anakanyisisa hi swiendlakalo leswi swi endlekeke evuton’wini bya Yesu a nga si fa.

⁵ Ntirho wa hina wa nsimu wa yelana ni ku tlangela Xitsundzuxo. Vakulu va ta fanela ku endla malunghiselelo lama hleriweke kahle leswaku maphayona ni vahuweleri va ta kota ku kunguhatela ntirho lowu engetelekeke wa nsimu hi April.

⁶ Hakanyingi leyi i n’hweti leyi ha yona magidi ma nghenelaka ntirho wa vuphayona bya nkarhinyana. Hi April n’wexemu vanhu va 6 559 va hlanganyerile laha Afrika Dzonga. Xana u nga endla tano hi April leyi? Loko u nga swi koti ku phayona nkarhinyana, kunguhata ku kurisa ku hlanganyela ka wena entirhweni wo chumayela loko swiyimo swi pfumela.

⁷ Aka Ku Tlangela Eka Van’wana: Lembe na lembe enkhubyeni wa Xitsundzuxo, vanhu vo tala lava tsakelaka va hlanganyela na hina. Hi xikombiso, eka vanhu va 10 650 158 lava veke kona eXitsundzuxweni emisaveni hinkwayo hi March n’wexemu, vanhu vo tlula 6 370 000 a a ku ri lava tsakelaka. Leswi swi kombisa ku koteka lokukulu ka ku andza enhlengeletanweni.

⁸ Hi fanele hi tirhisa swirhambo leswi gandlisiweke swa Sosayiti naswona hi endla malunghiselelo ya swo famba, ya swichudeni swa Bibele ni vanhu lava tsakelaka loko swi laveka. Kombisa ku hiseka loko u va rhamba.

⁹ Va pfune va vona xivangelo xa ku simekiwa ka Xitsundzuxo, ni leswaku i vamani lava dyaka swifanekiselo ni leswi swifanekiselo swi yimelaka swona. (1 Vakor. 11:23-26) Tlhela u hlamusela ntshembo wa lava dyaka ni wa vahlaleri lava nga swi dyiki swifanekiselo. (Yoh. 10:16; Nhlav. 14:3, 4) Leswi swi ta pfuna vanhu lava tsakelaka ku twisisa leswaku hinkwerhu hi fanele ku ‘kombisa ripfumelo’ ni leswaku ku va kona eXitsundzuxweni xa rifu ra Kriste kan’we hi lembe a hi swona ntsena leswi lavekaka.—Yoh. 3:16.

¹⁰ Xitsundzuxo xa rifu ra Kriste i xiendlakalo xo hlawuleka swinene. Hi ku xi lunghiselela kahle, hi kombisa leswaku ha swi tlangela hakunene leswi Yehova na Kriste va hi endleleke swona. Ku aka ku tlangela xiendlakalo lexi eka swichudeni swa hina swa Bibele ni le ka vanhu van’wana lava tsakelaka swi ta va pfuna leswaku na vona, va kombisa ripfumelo elunghiselelweni ra Yehova ra nkutsulo ha Yesu Kriste.