Ku Tsundzuka Nkutsulo Hi Ntsako
1, 2. Hi swihi swivangelo leswi endlaka leswaku hi tsundzuka nkutsulo hi ntsako?
1 Tanihi Vakreste emisaveni hinkwayo, hi ta yingisa xileriso xa Yesu Kreste kutani hi hlangana loko dyambu ri pela hi Mugqivela, March 22, 2008, leswaku hi tsundzuka rifu ra yena. (Luka 22:19; 1 Kor. 11:23-26) Hi tiyimisele ku endla tano hikwalaho ka leswi hi swi tlangelaka hi mbilu hinkwayo hinkwaswo leswi Yehovha na Yesu va hi endleleke swona hi siku rero, emalembeni ya 1 975 lama hundzeke. Yesu u kwetsimise vito ra Tata wakwe hi ku tshama a tshembekile kukondza a fa hi ndlela yo vava emhandzini ya nxaniso, kutani a swi veka erivaleni leswaku hinkwaswo leswi Sathana a hehleke Yehovha ha swona a ku ri mavunwa ya rihlaza.—Yobo 1:11; Swiv. 27:11.
2 Ngati ya Yesu yi endle leswaku ntwanano lowuntshwa wu tirha kutani vanhu lava nga hetisekangiki va kota ku amukeriwa tanihi vana va Xikwembu, va ri ni ntshembo wo fuma na Kreste eMfun’weni wa le tilweni. (Yer. 31:31-34; Mar. 14:24) Ku tlula kwalaho, Xikwembu xi kombise rirhandzu lerikulu eka vanhu hi ku endla xitlhavelo hi N’wana wa xona la rhandzekaka, hilaha Yesu a hlamuseleke Nikodema hakona.—Yoh. 3:16.
3. Xana lava va nga ta ta eXitsundzuxweni va ta pfuneka hi ndlela yihi?
3 Rhamba Van’wana: Vutirheli Bya Hina Bya Mfumo bya January, byi ringanyete leswaku hi tsala mavito ya vanhu lava hi lavaka ku va rhamba. Xana se u sungurile ku rhamba lava u tsaleke mavito ya vona? Xana u karhi u endla malunghiselelo yo hlanganyela hilaha ku heleleke eka tsima leri nga ta sungula hi March 1, ro rhambela vanhu eXitsundzuxweni? Lava va nga ta ta eXitsundzuxweni va ta yingisa rungula ra Matsalwa leri nga ta tiyisa ripfumelo ra vona eka nkutsulo kutani va kota ku kuma vutomi lebyi nga heriki.—Rhom. 10:17.
4. Ha yini hi fanele ku fika ka ha ri ni nkarhi eXitsundzuxweni?
4 Hinkwerhu lava hi nga swi kotaka ku fika hi nkarhi, a hi endleni tano leswaku hi ta va amukela hi mandla mambirhi lava nga ta ta eka xiendlakalo lexi xo hlawuleka. Leswi ku vaka ni vanhu vo tala eXitsundzuxweni, hi fanele ku xalamukela ku pfuxela lava sungulaka ku ta, ku katsa ni van’wana lava hambetaka va ta eminhlanganweni.
5. Xana u nga yi lunghiselela njhani mbilu ya wena leswaku yi dzika eka leswi nga ta va swi endleka eXitsundzuxweni?
5 Lunghiselela Mbilu Ya Wena: Xibukwana lexi nge Ku Kambisisa Matsalwa Siku Ni Siku—2008 ni khalendara ya 2008 swi ni xiyimiso xa ku hlaya ka Bibele ko hlawuleka ka nkarhi wa Xitsundzuxo, loku nga ta sungula hi March 17. Ku anakanyisisa hi swiendlakalo swa nkoka leswi endlekeke emasikwini yo hetelela ya vutomi bya Yesu laha misaveni, swi ta ku pfuna leswaku u lunghiselela mbilu ya wena yi dzika eka leswi nga ta va swi endleka eXitsundzuxweni. (Ezra 7:10) Ku anakanyisisa ni ku khongela loko u ri karhi u hlaya swiendlakalo leswi eBibeleni, swi ta endla leswaku rirhandzu ra wena ha Yehovha na Yesu ri ya ri kula, hikwalaho ka leswi va hi kutsuleke.—Ps. 143:5.
6. Xana ku tsundzuka nkutsulo hi ntsako ku ta hi pfuna hi ndlela yihi?
6 Loko Xitsundzuxo xi ri karhi xi tshinela, onge hi nga tiyiseka leswaku hi lunghekile hi tlhela hi pfuna van’wana leswaku va lunghekela xiendlakalo lexi xa nkoka. Ku tsundzuka nkutsulo hi ntsako ku ta tiyisa vuxaka bya hina na Yehovha ni N’wana wa yena. (2 Kor. 5:14, 15) Ku ta tlhela ku endla leswaku hi tekelela xikombiso xa vona lexinene hi ku rhandza van’wana swi huma embilwini.—1 Yoh. 4:11.