Hambeta U Vula U Ku: “Tana!”
1 Mawaku lunghiselelo ro xonga leri Yehovha a ri endleke hi nkutsulo wa gandzelo ra Yesu! Eka rona hi kuma xisekelo xa swilo hinkwaswo leswi lavekaka leswaku vanhu va tsaka hakunene. (Yoh. 3:16) Hambi swi ri tano, a hi vangani lava nga tiva ni ku pfumela ntiyiso lowu hi laha ku tiyeke. Nakambe hi ku khathalela ka yena vanhu hi rirhandzu, Yehovha u hlele leswaku mahungu lawa lamanene ma twarisiwa eka vanhu hinkwavo. Hi N’wana wakwe, Yesu Kreste, u hi nyike hinkwerhu nkarhi wo kuma ntsako ni ntshembo wa vutomi lebyi nga heriki.—Yoh. 17:3.
2 Ku ringana malembe ya magidi mambirhi, Loyi a a ta kutsula vanhu exidyohweni ni rifu a a nga tiviwi. A ku ri “xihundla lexi a xi fihlekile” ku fikela loko Kreste Yesu a ta ivi ‘a humesa ku vonakala ehenhla ka vutomi ni ku bula hi mahungu lamanene.’ (Rhom. 16:25; 2 Tim. 1:10) Valandzeri va Yesu va sungule ku huwelela mahungu lawa lamanene eka lembe xidzana ro sungula; sweswi hina lava hi hanyaka eminkarhini ya sweswi hi ni lunghelo lerikulu ro twarisa mahungu lamanene lama fanaka. Loko hi chumayela rungula ra Mfumo, hi hlanganyela na Yehovha Xikwembu, Yesu Kreste ni vamakwavo va Kreste, lava rhambaka vanhu va mahanyelo hinkwawo hi ku vula va ku: “‘Tana!’ . . . [u] nw[a] mati ya vutomi [u] nga hakeli.”—Nhlav. 22:17.
3 Ina, a hi hinkwavo lava nga yingisa mahungu lawa lamanene. A hi vangani lava yingisisaka. Van’wana va papalata malandza ya Xikwembu hi mbilu yo biha, lava va va rhambelaka leswaku va ta kuma mati ya ntiyiso lama nyikaka vutomi. Hambi swi ri tano, hi ntamu lowu humaka eka Yehovha, ha phikelela entirhweni lowu. Ha swi tiva leswaku ku tiyimisela ka hina ku vula ntiyiso ni ku pfuna lava va nga ta yingisa, swi tsakisa Yehovha naswona swi tisa mikateko ya yena.
4 Evutirhelini bya hina hi March, hi ta khutaza valavi va ntiyiso leswaku va hlaya buku leyi nge Ku Chaputa Ka Nhlavutelo ni ku tsakela ntshembo lowu yi wu nyikaka. Va ta kuma mikateko yo tala hi ku endla tano. Ku tlula kwalaho, buku ya Nhlavutelo yi vulavula hi vumundzuku—vumundzuku bya vona ni bya hina. Van’wana lava sweswi va nga malandza ya Yehovha lama tinyiketeleke va sungule ku tsakela ntiyiso endzhaku ko hlaya tinhlamuselo ta buku ya Nhlavutelo eka yin’wana ya tibuku ta Sosayiti. Leswi hina ha ha ku dyondzaka buku leyi nge Ku Chaputa Ka Nhlavutelo hi vuenti, hi nga vona nkoka wa yona eka vanhu va timbilu letinene lava nga ni ndlala ya ntiyiso. Loko hi kuma vanhu vo tano evutirhelini bya hina, hi ta lwela ku komba yinhla-nkulu yin’we kumbe timbirhi leti humaka ebukwini leyi nge Ku Chaputa Ka Nhlavutelo leswaku hi va komba nkoka wa yona. Swin’wana swa swona, hi nga kombisa tinhlamuselo ta yona leti kongomeke ta vuprofeta bya Bibele leti hetisekeke eka lembe xidzana leri ra vu-20, tanihi ku gada loku xiyekaka ka tinhenha ta tihanci to fanekisela loku hlamuseriwaka eka ndzima ya vutsevu ya Nhlavutelo.
5 Swi fanerile swinene leswaku hina hi vulavula hi malunghiselelo ya Yehovha ya rirhandzu lawa xi ma endlelaka vanhu loko hi lunghiselela ku tlangela Xitsundzuxo xa rifu ra Kreste hi April 6. Ku nga khathariseki leswaku vanhu va yingisa kumbe a va yingisi, ha phikelela eka xiavelo xa hina lexi hi nyikiweke hi Xikwembu leswaku hi humesa xirhambo lexi tsakisaka eka un’wana ni un’wana la swi tsakelaka hi ku: “‘Tana!’ . . . [u] nw[a] mati ya vutomi [u] nga hakeli.”