Nhlavutelo—Ku Chaputa Ka Yona Loku Hlamarisaka Ku Tshinele!

¹ “Wa tsaka loyi a hlayaka swi twakala ni lava twaka marito ya vuprofeta lebyi, kutani va hlayisa swilo leswi tsariweke eka byona; hikuva nkarhi lowu vekiweke wu kusuhi.” (Nhlav. 1:3) Marito wolawo ma kandziyisa nkoka wa buku ya Nhlavutelo, ngopfu-ngopfu leswi hi hanyaka enkarhini lowu vekiweke wa leswaku vuprofeta bya yona byo tala byi hetiseka. Hikwalaho, hi ta sungula ku dyondza buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! eka Dyondzo ya Buku ya Vandlha ku sukela hi vhiki ra January 8, 2007.

² Ku sukela loko hi ta va hi dyondze buku ya Nhlavutelo eka Dyondzo ya Buku ya Vandlha, swiendlakalo swa misava se swi cince ngopfu. (1 Kor. 7:31) Ku tlula kwalaho, vo tala lava veke vahuweleri va mahungu lamanene ya Mfumo endzhaku ka loko yi dyondziwile a va vanga na rona lunghelo ro hlanganyela eku dyondzeni ka ndzimana hi ndzimana ya buku ya Nhlavutelo. Ku dyondziwa ka buku leyi nge Nhlavutelo, swi fanele swi hi pfuna hinkwerhu ka hina leswaku hi tshama hi xalamukele swiendlakalo leswa ha taka.—Nhlav. 16:15.

³ Tiyimisele ku va kona vhiki rin’wana ni rin’wana. Rungula ra buku leyi ri ta hi pfuna leswaku hi tshama hi rindzile naswona marungula ya Yesu lama yaka eka mavandlha ya nkombo ma ta hi pfuna leswaku hi papalata swiyimo leswi nga ha onhaka vumoya bya hina ni ku hi tshikisa ku hlanganyela entirhweni wo chumayela.—Nhlav. 1:11, 19.

⁴ Lunghiselela Kahle: Hlaya tindzimana ta buku ya Nhlavutelo eBibeleni leti ku nga ta buriwa ha tona u nga si ya eka dyondzo ya buku. U xiya tinhla leti hlamuselaka tindzimana teto ta Bibele. Lwela ku twisisa tinhla-nkulu leswaku ti ta fikelela mbilu ya wena. (Neh. 8:8, 12) Tinyike nkarhi wo anakanyisisa u tlhela u tivutisa leswi: ‘Xana leswi swi ndzi byela yini hi Yehovha ni hi ku hetiseka ka xikongomelo xa yena? Xana ndzi nga hanya njhani hi ku pfumelelana ni xikongomelo xa yena naswona ndzi nga va pfuna njhani van’wana?’

⁵ Hi mpfhuka ‘siku ra Hosi’ ri sungula hi 1914 se ku hundze malembe ya 92. (Nhlav. 1:10) Swiendlakalo leswi hlamarisaka leswi profetiweke ebukwini ya Nhlavutelo swi ta endleka ku nga ri khale. Ku dyondza buku leyi nge Ka Nhlavutelo ku ta phyuphyisa timbilu ni mianakanyo ya hina ni ku tiyisa ripfumelo ra hina ri tshama ri langutele “nyimpi ya siku lerikulu ra Xikwembu xa Matimba Hinkwawo” ni misava leyintshwa leswi nga kwala nyongeni.—Nhlav. 16:14; 21:4, 5.