Hi Ta Tlhela Hi Dyondza Buku Leyi Nge Ku Chaputa Ka Nhlavutelo
1 Tluka leri nga ni xihloko-nkulu ra buku leyi nge Ku Chaputa Ka Nhlavutelo ri tshaha Nhlavutelo 1:3 leyi nge: “Ku katekile munhu loyi a hlayaka mahungu lawa ya vuhlavuteli, ku katekile ni lava va ma yingisaka.” Namuntlha ntsako wa vanhu va Yehovha i wukulu swinene hikwalaho ka ku hetiseka ka manguva lawa ka vuprofeta lebyi nga ebukwini ya Bibele ya Nhlavutelo. Ku twisiseka ka namuntlha ka swiendlakalo swa “siku ra Hosi,” ku hlamuseriwe ebukwini leyi nge Nhlavutelo—Ku Chaputa Ka Yona Loku Hlamarisaka Ku Tshinele! (Nhlav. 1:10) Loko hi ri karhi hi yi dyondza, hi kote ku tiva swiendlakalo swa misava leswi xiyekaka, ngopfu-ngopfu leswi katsaka mfumo wa misava wa vukhongeri bya mavunwa ni ku famba ka matiko lama yaka eArmagedoni kun’we ni ku tirhisana ka Yehovha ni vanhu vakwe.
2 Eka vo tala va hina, ku dyondza buku leyi a swi nge pfuxeti mianakanyo ya hina ntsena eka tinhla leti kambisisiweke, kambe ku ta tlhela ku lulamisa langutelo ra hina ra moya ra swiendlakalo swa sweswi leswi yisaka esikwini ra Yehovha ra ku hlula valala va yena hinkwavo. Magidi lama joyineke minhlangano ya hina emalembeni mambirhi ku ya eka manharhu lama hundzeke entiyisweni ma ta pfuneka eku dyondziweni ka vunharhu ka buku leyi nge Ku Chaputa Ka Nhlavutelo eDyondzweni ya Buku ya Vandlha.
3 Tiyiseka leswaku u lunghiselela kahle, u va kona, ni ku hlanganyela hi xitalo vhiki rin’wana ni rin’wana, ku sukela hi October 3, 1994. U ta vuyeriwa ni ku katekisiwa hi laha ku fuweke loko u ri karhi u yi twisisa kahle nhlamuselo ya swiendlakalo swa misava leswi humelelaka hi ku ya hi vuprofeta lebyi rhekhodiweke ebukwini ya Nhlavutelo. Ina, hi fanele ku kambisisa mhaka yo tano hi vukheta, tanihi leswi sweswi yi nga enkarhini ku tlula rini na rini. Onge hi nga tiphina hi ntsako lowu tshembisiweke loko hi hlaya, hi yingisa ni ku anakanyisisa hi vuprofeta lebyi nyanyulaka lebyi vulavulaka hi minkarhi ya hina!