Nhlavutelo—Ku Paluxiwa Ka Swihundla

¹ Buku ya Nhlavutelo i khale yi ri xihundla. Hi malembe xidzana yo tala vadyondzi va Bibele a a va lava ku paluxa swihundla swa yona, kambe va nga humeleli. Kambe rungula leri huhuteriweke hi Xikwembu eka Nhlavutelo a ri nga endleriwanga leswaku ri tshama ri ri xihundla hi laha ku nga heriki. I xiyenge xa Rito ra Xikwembu lexi hi faneleke hi xi twisisa. (2 Tim. 3:16, 17) Lexi tsakisaka Xikwembu xi paluxa Nhlavutelo tanihi leswi vuprofeta bya yona lebyi nyanyulaka byi hetisekaka esikwini ra hina. Tanihi leswi Yehova a tirhiseke Yohane leswaku a vula swivono leswi eka Vakriste-kulobye, namuntlha U tirhisa ‘nandza wo tshembeka’ leswaku a paluxa nhlamuselo ya vuprofeta lebyi byo nyanyula.—Mat. 24:45-47; Nhlav. 1:1-3.

² Nyiko Ya March: Buku leyi nge Nhlavutelo—Ku Chaputa Ka Yona Loku Hlamarisaka Ku Tshinele! yi va dyondzisile ni ku va khutaza swinene vanhu va Xikwembu. Kambe ha yini yi fanele yi tsakisa vanhu ensin’wini ya ka n’wina? Hikuva buku leyi yo tsakisa yi vulavula hi swiendlakalo swo hetelela leswi hlamuseriweke ebukwini ya Bibele ya Nhlavutelo leswi humelelaka emasikwini lawa ya makumu. Xana vanhu lava ehleketeka kahle a va byi tsakeli vumundzuku hi laha byi paluxiwaka ha kona hi Xikwembu? Hambi leswi buku ya Bibele ya Nhlavutelo yi kombisaka ku avanyisa ko lulama ka Xikwembu, yi tlhela yi nyika mintshembo ya mikateko leyi hlamarisaka ya nkarhi lowu taka. (Nhlav. 21:1-5) Ku twisisa rungula ra yona leri huhuteriweke swi hi pfuna ku vona nkarhi lowu hi hanyaka eka wona ni ku hi kombisa xihatla xo endla ku rhandza ka Xikwembu.

³ Xana buku leyi nge Ku Chaputa Ka Nhlavutelo yi nonon’hwa ngopfu leswaku vanhu va yi twisisa? Swi tikomba onge vo tala va yi kume yi nga nonon’hwi ngopfu. Xiya tin’wana ta tinhlamuselo to tala leti endliweke hi vahlayi va buku leyi. Munhu un’wana u te: “Rungula leri i ra matimba. Kambe ra tsakisa. Ndza ri rhandza.” Mufundhisi un’wana u te: “A ndzi nga yi tivi kumbe a ndzi nga si tshama ndzi hlaya buku yin’wana leyi nyanyulaka swinene ku fana ni buku leyi!” Munhu un’wana loyi a heteke ku yi hlaya ku nga si hela vhiki u hlamuserile: “Sweswi mahlo ya mina ma xile entiyisweni. Ndzi lava ku cinca vutomi bya mina hinkwabyo.” Entiyisweni, vanhu vo tala va kuma ntsako loko va hlaya buku ya Bibele ya Nhlavutelo ro sungula evuton’wini bya vona kutani va yi twisisa ni ku sungula ku hlayisa marito ya yona.

⁴ Bumabumela Buku Leyi Nge Ku Chaputa Ka Nhlavutelo Eka Van’wana: Loko u va ni mabulo ya Matsalwa ni van’wana hi March, u nga kanakani ku komba vanhu lava tsakelaka buku leyi nge Ku Chaputa Ka Nhlavutelo. Byela lava tsakelaka ku yi hlaya leswaku va nga ha fungha swiyenge swa buku leyi leswi va nga swi twisisiki, kutani loko u vuya, u ta burisana na vona hi tinhla teto. Leyi ku nga ha va ndlela ya ku vona mpimo wa ku tsakela ka vona ni ku endla xisekelo lexi engetelekeke xa riendzo ro vuyela.

⁵ Malunghana ni ntirho wa yindlu ni yindlu, vo tala va humelerile eku fambiseni ka buku leyi nge Ku Chaputa Ka Nhlavutelo hi xitshuketa eka maxaka, vanghana ni le ka lava va xaviselanaka na vona. Kombisa ndlela leyi wena hi wexe u pfuniweke ha yona hi swifaniso leswi sasekeke, tichati leti pfunaka ni swipfuneto swin’wana leswi hlamarisaka swo dyondzisa ebukwini leyi. Leswi swi nga ha khutaza van’wana leswaku va langutisisa buku ya Nhlavutelo, hambi loko va tshame va anakanya leswaku swi tika ngopfu ku yi twisisa.

⁶ Vona lunghelo ronghasi leri hi nga na rona ro tiva swiendlakalo swa nkarhi lowu taka leswi paluxiwaka ebukwini ya Nhlavutelo ni leswi hlamuseriwaka hi nhlengeletano ya Xikwembu namuntlha! Leswi hi nyikiweke vutivi byo tano, ku hambana ni vatsari va le sikwini ra Yesu ni vafundhisi va namuntlha, hi nga tsandzeki ku twarisa kumbe ku paluxa nhlamuselo ya Rito ra Xikwembu eka lava nga ta yingisela. (Ringanisa Luka 11:52.) Loko hi endla tano, ha tshemba leswaku vo tala swinene va ta kuma ntshembo wa vutomi lebyi nga heriki emisaveni leyintshwa ya Xikwembu kutani va hlanganyela na hina eku endleni ka ku rhandza ka Muvumbi wa hina.—Nhlav. 4:11.