Landzela Ku Tsakela Handle Ko Hlwela

¹ “Xinamu xi dlele nkwahle.” Vo tala va tolovelane na wona marito lawa lama khutazaka leswaku swilo swa nkoka swi endliwa hi ku hatlisa. Ntokoto lowu landzelaka wu kombisa leswaku nsinya lowu wa nawu hi nga wu tirhisa ni le vutirhelini bya hina.

² Makwerhu un’wana wa xisati u fambisele munhu un’wana buku ivi a tshembisa leswaku u ta vuya. Hi xihoxo makwerhu un’wana wa xisati a nghena ekaya leri fanaka endzhaku ka awara. Munhu yoloye a ta enyangweni a khome buku kutani a n’wi byela a ku: “Loko u vula leswaku u ta vuya, a ndzi ehleketanga leswaku u ta hatlisa hi ndlela leyi, kambe nghena, ndzi yi lunghekerile dyondzo ya mina.”

³ Hambi leswi riendzo ro tano ra ku vuyela hi ku hatlisa, ri nga tolovelekanga, ntokoto lowu wu kandziyisa xilaveko xa ku xalamukela ku landzela ku tsakela loku hi ku kumaka evutirhelini bya hina handle ko hlwela swi nga fanelanga. Hi March hi ta va hi fambisa buku leyi nge Ku Chaputa Ka Nhlavutelo. Swiendlakalo swa misava swi swi kombisa kahle leswaku buku leyi leyi hlamuselaka buku yo hetelela ya Matsalwa ya Vukriste ya Xigriki, yi le nkarhini swinene ku fana ni phepha-hungu, xiya-ni-moya ni swiviko swa mahungu swa thelevixini swa namuntlha malunghana ni swiendlakalo swa misava leswi khumbaka vutomi bya vanhu hinkwavo hi ku kongoma.

⁴ Vanhu Va Lava Mpfuno Lowu Engetelekeke: Leswaku hi pfuna vanhu va twisisa rungula leri nga ebukwini leyi ni ku twisisa leswaku ri khumba vutomi ni vumundzuku bya vona, hi fanele hi hlela riendzo ro vuyela, ngopfu-ngopfu emasikwini ma nga ri mangani ya le ndzhaku ka riendzo ro sungula. Hi nga swi endlisa ku yini leswi? Ku tivisa munhu leswaku u ta vuya swi nga ha pfuna ku vona mpimo wa ku tsakela ka yena.

⁵ Pfula Ndlela Ya Riendzo Ro Vuyela: A hi nkarhi hinkwawo swi olovaka emisaveni ya namuntlha ku endla ntwanano wa nkarhi wo karhi, naswona n’wini wa muti a nga ha rivala ku hlayisa nkarhi lowu vekiweke. Hambi swi ri tano, loko u xiya nkarhi wa riendzo ro tano ro vuyela hi vukheta kutani u tiyiseka leswaku u endla riendzo—hi masiku ma nga ri mangani loko swi koteka—u ta va u hetisisa vutihlamuleri bya wena byo teka nkarhi lowu vekiweke wu ri wa nkoka. Loko munhu a nga ri kona ekaya, tiyiseka leswaku u hambeta u ringeta ku n’wi kuma. A nga ha khutazeka leswaku a teka riendzo ra wena ri ri ra nkoka loko a vona ku tiyimisela ka wena leswaku u n’wi kuma ekaya.

⁶ Tanihi leswi hi nga tiyisekiki ngopfu hi ku tsakela loku kombisiwaka hi munhu loko hi endla riendzo ro sungula, n’wi tsale ehansi leswaku u ta tlhela u vuya hambi loko a tikomba a nga ri na mhaka ngopfu. Swa pfuna ku landzela ku tsakela ko tano handle ko hlwela. U nga ha va u pfuxe ku tsakela ka munhu ebukwini leyi nge Ku Chaputa Ka Nhlavutelo, kutani loko u vuyela u nga hlamarisiwa ngopfu hi ndlela leyi u amukeriwaka kahle ha yona. Kutani tiyiseka leswaku u landzela ku tsakela handle ko hlwela!