Hi Fanele Hi Tlhelela Endzhaku Ka Nkarhi Wo Tanihi Kwihi Eka Vanhu Lava Tsakelaka?
1. I yini leswi katsekaka eku endleni ka vadyondzisiwa?
1 Ku endla vadyondzisiwa swi katsa ku tlhelela eka vanhu hinkwavo lava navelaka ku dyondza hi malunghiselelo ya Yehovha ni Mfumo wakwe. (Mat. 28:19, 20) Leswaku hi ma endla nkarhi muni maendzo yo vuyela swi ya hileswaku hi xi hlele njhani xiyimiso xa hina swin’we ni nkarhi lowu vanhu lava tsakelaka va hi vekelaka wona. Ha yini hi fanele hi tlhelela hi ku hatlisa endzhaku ka riendzo ro sungula?
2, 3. Ha yini hi fanele hi tlhelela hi ku hatlisa eka vanhu va timbilu letinene?
2 Ha Yini Hi Tlhelela Hi Ku Hatlisa? Ntirho wo chumayela “mahungu lamanene lawa ya mfumo” wu le kusuhi ni ku hela naswona makumu ya mafambiselo lawa ya swilo se ya kwala nyongeni. (Mat. 24:14; 1 Pet. 4:7) Kutani leswi vanhu va timbilu letinene va ha pfulekeriweke hi “siku ra ku ponisiwa,” hi fanele hi yingisa xileriso xo ‘chumayela rito hi xihatla’ naswona leswi swi katsa ku tlhelela eka vona hi ku hatlisa leswaku hi ya hlakulela ku tsakela loku va ku kombiseke.—2 Kor. 6:1, 2; 2 Tim. 4:2.
3 Sathana u tiyimisele ku herisa mbewu yin’wana ni yin’wana ya Mfumo leyi hi yi byalaka eka vanhu va timbilu letinene. (Mar. 4:14, 15) Minkarhi yo tala vanhu lava kombiseke ku tsakela va hlekuriwa hi swirho swa mindyangu, vatirhi-kulorhi ni hi vanhu van’wana. Ku tlhelela hi ku hatlisa eka vanhu volavo swi hi pfuna ku hlakulela ku tsakela loku va ku kombiseke, vanhu van’wana va nga si va chela moya wo biha.
4. I yini leswi hi nga swi endlaka eka riendzo ro sungula leswaku hi pfula ndlela yo endla riendzo ro vuyela?
4 Pfula Ndlela Yo Tlhela U Vuya: Loko u bula ni munhu eka riendzo ro sungula, tiyiseka leswaku u endla malunghiselelo yo tlhela u n’wi endzela. N’wi vutise xivutiso lexi u nga ta xi hlamula eka riendzo ro vuyela. I swa nkoka ku hlayisa tirhekhodo ta hina emhakeni leyi. Loko xiyimiso xa wena xi ku pfumelela, u nga kombela ku ta n’wi vona hi siku leri landzelaka kumbe hi ku hatlisa endzhaku ka rona. Loko munhu yoloye u hlangane na yena hi mahelo-vhiki naswona a tirha exikarhi ka vhiki, kumbexana u nga hlela ku n’wi endzela hi mahelo-vhiki lama landzelaka. Loko u tshembise ku tlhela u vuya, tiyiseka leswaku wa tlhelela.—Mat. 5:37.
5. Ku tlhelela hi ku hatlisa eka vanhu lava kombiseke ku tsakela swi nga hi pfuna njhani leswaku hi hetisisa xileriso xa Yesu xo endla vadyondzisiwa?
5 Hi ni swivangelo leswi twalaka swo tlhelela hi ku hatlisa eka vanhu lava kombiseke ku tsakela. Kutani pfula ndlela yo tlhela u vuyela naswona u tlhelela hi ku hatlisa hikuva “nkarhi lowu seleke wu komile.” (1 Kor. 7:29) Loko hi endzela vanhu lava kombiseke ku tsakela rungula ra Mfumo hi ku hatlisa, matshalatshala ya hina ma ta va ni vuyelo lebyinene.