Ndzima 1

Ku Chaputa Loku Tsakisaka Ka Nhlavutelo!

1. Hi swi tivisa ku yini leswaku Xikwembu xi lava leswaku hi va lava tsakeke?

NHLAVUTELO EKA YOHANE—buku leyi tsakisaka ya Bibele yi gimeta rungula leri humaka eka Xikwembu hi ndlela leyi tsakisaka. Ha yini hi vula leswaku hi ndlela leyi “tsakisaka”? Phela, Mutsari wa Bibele u hlamuseriwa tanihi “Xikwembu lexi tsakeke,” lexi tamerisaka lava xi rhandzaka “mahungu lamanene lama vangamaka.” Xi lava leswaku na hina hi tsaka. Hi yona mhaka leyi eku sunguleni ka yona buku ya Nhlavutelo yi hi tiyisekisaka yi ku: “Wa tsaka loyi a hlayaka . . . marito ya vuprofeta lebyi.” Eka ndzima ya yona yo hetelela hi byeriwa leswi: “Wa tsaka munhu un’wana ni un’wana la hlayisaka marito ya vuprofeta bya buku-nsongwa leyi.”—1 Timotiya 1:11; Nhlavutelo 1:3; 22:7.

2. Hi fanele hi endla yini leswaku hi kuma ntsako lowu buku ya Nhlavutelo yi wu tshembisaka?

² Xana hi nga wu kuma njhani ntsako ebukwini ya Nhlavutelo? Hi nga wu kuma hi ku lavisisa tinhlamuselo ta swikombiso, kumbe swifaniso swa yona leswi hlamuseriwaka hi ndlela leyi twisisekaka kutani hi endla leswi yi hi dyondzisaka swona. Ku nga ri khale, matimu lama pfilunganeke ya vanhu ma ta hela hi ndlela leyi tsemaka nhlana loko Xikwembu na Yesu Kreste va avanyisa mafambiselo yo homboloka ya namuntlha, va ma siva hi “tilo lerintshwa ni misava leyintshwa” laha ‘rifu ri nga ta va ri nga ha ri kona.’ (Nhlavutelo 21:1, 4) Xana a swi tano leswaku hinkwerhu ka hina ha swi lava ku hanya emisaveni yo tano leyintshwa, hi ku rhula ka ntiyiso ni nsirhelelo? Hi nga swi kota loko hi aka ripfumelo ra hina hi ku dyondza Rito ra Xikwembu, ku katsa ni vuprofeta lebyi khutazaka bya buku ya Nhlavutelo.

Xana Apokalipsi I Yini?

3. Xana vanhu vo tala va ehleketa leswaku Apokalipsi na Armagedoni swi vula yini?

³ Xana buku ya Nhlavutelo a yi tlheli yi vuriwa Apokalipsi? Hakunene swi tano, hikuva rito leri nge “nhlavutelo” ri hundzuluxeriwe hi Xitsonga ri huma eka rito leri nge a·po·kaʹly·psis eka tsalwa ra Xigriki. Vanhu vo tala va fanisa Apokalipsi ni ku lovisiwa ka misava hi matlhari ya nyutliya. Le Texas, eU.S.A., ku nga doroba leri a ku endliwa tibomo to tala ta nyutliya, vanhu va vukhongeri a va tala ku vula va ku, “Ku ta rhanga ku lovisiwa hina.” Ku vikiwa leswaku vafundhisi endhawini leyi a va “kholwa leswaku nyimpi ya Armagedoni a yi nge papalateki naswona yi ta tlhekeka ku nga ri khale ni leswaku nyimpi yo hetelela exikarhi ka mavuthu lamanene ni layo biha, ku nga mavuthu ya Xikwembu ni ya Sathana yi ta humelela tanihi ndzoviso wa matlhari ya nyutliya.”a

4. Kahle-kahle rito leri nge “apokalipsi” ri vula yini, naswona ha yini swi fanerile leswi buku yo hetelela ya Bibele yi thyiweke vito ra “Nhlavutelo”?

⁴ Kambe, kahle-kahle apokalipsi i yini? Hambileswi tidikixinari ti hlamuselaka rito leri hi ku tirhisa marito yo tanihi “ku mbumburheriwa ka misava hinkwayo hi xihatla,” kahle-kahle rito ra Xigriki leri nge a·po·kaʹly·psis ri vula “ku paluxa” kumbe “ku funungula.” Xisweswo, swi fanerile leswi buku yo hetelela ya Bibele yi thyiweke vito ra “Nhlavutelo.” Eka yona a hi kumi rungula leri hundzeletaka ku lovisiwa ka misava, kambe hi paluxeriwa tidyondzo ta Bibele leti humaka eka Xikwembu, leti faneleke ti endla leswaku hi va ni ntshembo lowu tiyeke ni ripfumelo leri nga tsekatsekiki.

5. (a) Xana i vamani lava nga ta lovisiwa eArmagedoni, naswona i vamani lava nga ta pona? (b) Hi byihi vumundzuku lebyinene lebyi nga ta kumiwa hi lava nga ta pona enyimpini ya Armagedoni?

⁵ I ntiyiso leswaku ebukwini yo hetelela ya Bibele, Armagedoni yi hlamuseriwa tanihi “nyimpi ya siku lerikulu ra Xikwembu xa Matimba Hinkwawo.” (Nhlavutelo 16:14, 16) Kambe a yi nge fani nikatsongo ni ku lovisiwa ka misava hi matlhari ya nyutliya! Kumbexana ndzoviso wo tano wu ta vula ku lovisiwa ka xin’wana ni xin’wana lexi hanyaka emisaveni. Kambe, Rito ra Xikwembu ra hi tiyisekisa leswaku ku ta lovisiwa vanhu vo homboloka, lava kanetaka Xikwembu—va lovisiwa hi matimba lama lawuriwaka hi Xikwembu. (Pisalema 37:9, 10; 145:20) Ntshungu lowukulu wa vanhu, lowu humaka eka matiko hinkwawo, wu ta pona loko Xikwembu xi tisa ndzoviso wa xona wo hetelela hi nyimpi ya Armagedoni. Kutani Kreste Yesu u ta risa a tlhela a kongomisa ntshungu wolowo evuton’wini lebyi nga heriki emisaveni leyi nga paradeyisi. Xana wa swi lava ku va un’wana wa lava ntshungu wolowo? Lexi tsakisaka hi leswaku buku ya Nhlavutelo yi kombisa leswaku u nga va un’wana wa vona!—Nhlavutelo 7:9, 14, 17.

Ku Lavisisa Swihundla Swa Xikwembu

6. Emalembeni lama hundzeke, hi tihi tibuku leti kandziyisiweke hi Timbhoni ta Yehovha leti pfuneke ku hlamusela buku ya Nhlavutelo?

⁶ Ku sukela hi 1917, Nhlengeletano ya Watch Tower yi kandziyise buku leyi nge The Finished Mystery. Leyi a ku ri nhlamuselo ya ndzimana hi ndzimana ya tibuku ta Bibele ta Ezekiyele na Nhlavutelo. Kutani, loko swiendlakalo swa misava swi ri karhi swi cinca hi ku pfumelelana ni ku hetiseka ka vuprofeta bya Bibele, hi 1930 ku lunghiseleriwe buku ya tivholumo timbirhi hi nkarhi lowu faneleke leyi nge Light. Leswi swi pfune leswaku buku ya Nhlavutelo yi hlayeka hi ku olova. Ku vonakala ku hambetile ku ‘voningela lavo lulama,’ lerova hi 1963 Timbhoni ta Yehovha ti kandziyise buku ya matluka ya 704 leyi nge “Babylon the Great Has Fallen!” God’s Kingdom Rules! Yi ma hlamusele hi vuenti matimu ya ku sungula ni ku wa ka Babilona Lonkulu, ku nga mfumo wa misava hinkwayo wa vukhongeri bya mavunwa, naswona yi gimete hi nhlamuselo ya tindzima to hetelela ta kaye ta buku ya Nhlavutelo. Loko ‘ndlela ya lavo lulama yi ya yi vonakala,’ ngopfu-ngopfu emintirhweni leyi khumbaka vandlha, ku humesiwe buku yin’wana hi 1969, ya matluka ya 384, leyi nge “Then Is Finished the Mystery of God,” leyi hlamuseleke tindzima ta 13 to sungula ta buku ya Nhlavutelo.—Pisalema 97:11; Swivuriso 4:18.

7. (a) Ha yini Timbhoni ta Yehovha ti kandziyise buku leyi ya Nhlavutelo? (b) Hi swihi swipfuneta-ku-dyondza leswi kumekaka ebukwini leyi leswi nga ta pfuna vahlayi?

⁷ Ha yini ku tlhele ku kandziyisiwa buku yin’wana ya Nhlavutelo enkarhini wa hina? Rungula ro tala leri ana se ri kandziyisiweke malunghana ni buku ya Nhlavutelo ri ni vuxokoxoko byo tala, naswona a swi koteki ku ri hundzuluxela ni ku ri kandziyisa emisaveni hinkwayo hi tindzimi to tala. Hi yona mhaka leyi swi vonakeke swi fanerile ku kandziyisa buku yin’we leyi hlamuselaka buku ya Nhlavutelo hi ndlela leyi swi nga olovaka ku yi kandziyisa hi tindzimi to tala. Nakambe, ebukwini leyi, ku humesiwe swipfuneta-ku-dyondza, ku katsa ni swifaniso, tichati ni nkomiso wa rungula ro karhi, leswi nga pfunaka vahlayi leswaku va ri twisisa kahle rungula leri tameriweke hi vuprofeta lebyi tsakisaka swonghasi.

8. Hi xihi xivangelo lexikulu lexi endleke leswaku ku kandziyisiwa buku leyi?

⁸ Kasi xivangelo xin’wana lexikulu lexi endleke leswaku ku kandziyisiwa buku leyi i xilaveko xo fambisana ni ntiyiso wa sweswi. Yehovha u hambeta a yi voningela hilaha ku engetelekeke nhlamuselo ya leswi Rito rakwe ri vulaka swona, naswona hi fanele hi langutela leswaku matwisiselo ya hina ya buku ya Nhlavutelo swin’we ni vuprofeta byin’wana swi ta ya swi antswisiwa loko nhlomulo lowukulu wu ri karhi wu tshinela. (Matewu 24:21; Nhlavutelo 7:14) I swa nkoka leswaku hi tshama hi ri ni vutivi lebyinene. Hi fanele hi endla leswi muapostola Petro a swi tsaleke loko a vulavula hi vuprofeta bya Xikwembu, a ku: “Mi endla kahle loko mi nyikela nyingiso eka rona ku fana ni le ka rivoni leri voningaka endhawini ya munyama, kukondza ku va vurhonga, kutani nyeleti ya nimixo yi tsuvuka etimbilwini ta n’wina.”—2 Petro 1:19.

9. (a) Hi ku pfumelelana ni vuprofeta byin’wana, xana buku ya Nhlavutelo yi vula leswaku i yini leswi Xikwembu xi nga ta swi tumbuluxa? (b) Xana i yini misava leyintshwa naswona u fanele u endla yini leswaku u pona kutani u hanya eka yona?

⁹ Buku ya Nhlavutelo yi pfumelelana ni vuprofeta byin’wana byo tala bya Bibele, lebyi xi vekaka erivaleni xikongomelo xa Yehovha Xikwembu xo tumbuluxa matilo lamantshwa ni misava leyintshwa. (Esaya 65:17; 66:22; 2 Petro 3:13; Nhlavutelo 21:1-5) Rungula ra yona hi ku kongoma ri tsaleriwe Vakreste lava totiweke, lava Yesu a va xaveke hi ngati yakwe leswaku va ta fuma na yena ematilweni lamantshwa. (Nhlavutelo 5:9, 10) Hambiswiritano, mahungu lawa lamanene ma ta tlhela ma tiyisa ripfumelo ra vanhu va timiliyoni lava languteleke vutomi lebyi nga heriki ehansi ka Mfumo wa Kreste. Xana u un’wana wa vona? Loko swi ri tano, buku leyi ya Nhlavutelo yi ta tiyisa ntshembo wa wena wo hanya eParadeyisini, ku nga misava leyintshwa, laha u nga ta tiphina hi ku rhula, rihanyo lerinene ni malunghiselelo ya ntsandza-vahlayi ya Xikwembu, lama nga ta va kona hi masiku. (Pisalema 37:11, 29, 34; 72:1, 7, 8, 16) Loko u lava ku pona u nghena emisaveni yoleyo leyintshwa, i swa xihatla, entiyisweni swa boha leswaku sweswi u yi yingisa swinene nhlamuselo leyi nga erivaleni ya buku ya Nhlavutelo ya ku chaputa loku nga kwala nyongeni.—Sofaniya 2:3; Yohane 13:17.

[Nhlamuselo ya le hansi]

[Xifaniso lexi tataka tluka hinkwaro lexi nga eka tluka 7]