“Marungula Lama Tsakisaka” Ya Apokalipsi

“Ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni.”—NHLAVUTELO 14:6.

1. Hambileswi Timbhoni ta Yehovha ti pfumelaka leswaku buku ya Apokalipsi yi huhuteriwile, ha yini ti nga ri “mpambukwa wa vuapokalipsi”?

KU HAMBANA ni swihehlo leswi ti hehliwaka ha swona, Timbhoni ta Yehovha a hi “mpambukwa wa vuapokalipsi” kumbe “ntlawa lowu huwelelaka siku ra khombo leri taka.” Hambiswiritano, ti teka Apokalipsi kumbe buku ya Nhlavutelo yi ri xiphemu xa Rito ra Xikwembu leri huhuteriweke. Kunene, Nhlavutelo yi tamele marungula ya vuavanyisi ehenhla ka vanhu vo homboloka. Kambe loko malandza ya Xikwembu ma vulavula ni vanhu, ma kandziyisa ngopfu ntshembo wa swilo leswinene leswi hlamuseriweke eBibeleni, ku katsa ni leswi kumekaka eka Apokalipsi kumbe Nhlavutelo. Xisweswo, a ma engeteli kumbe ku hunguta swo karhi emaritweni ya vuprofeta lama kumekaka ebukwini yoleyo.—Nhlavutelo 22:18, 19.

Vatwarisi Va Marungula Lama Tsakisaka

2. Hi wahi man’wana ya matsalwa lawa Timbhoni ta Yehovha ti talaka ku ma tirhisa entirhweni wa tona wo chumayela?

² Tsalwa leri Timbhoni ta Yehovha ti talaka ku tshaha rona loko ti vulavula ni vanhu i marito ya Yesu lama nge: “Mahungu lamanene lawa ya mfumo ma ta twarisiwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14, nhlamuselo ya le hansi ya NW) Xana hi wahi “mahungu lamanene lawa ya mfumo”? Timbhoni to tala ti nga hlamula xivutiso xexo hi ku tshaha tindzimana ta Nhlavutelo ndzima 20 na 21 leti vulavulaka hi Mfumo wa Kreste wa Gidi ra Malembe kun’we ni hulumendhe ya Mfumo wakwe ni vandla ra vanhu, laha rifu, ku kolola ni maxangu swi nga ta ka ‘swi nga ha vi kona.’—Nhlavutelo 20:6; 21:1, 4.

3. Vutirheli bya le rivaleni bya Timbhoni ta Yehovha byi fambisana ni ntirho wihi?

³ Tanihi vatwarisi va marungula lawa ma tsakisaka, Timbhoni ta Yehovha kahle-kahle i vavulavuleri va murhumiwa wo fanekisela wa le tilweni, loyi ntirho wakwe na wona wu hlamuseriweke eka Nhlavutelo. “Ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo.” (Nhlavutelo 14:6) “Mahungu lamanene lama nga heriki” ma katsa xitiviso xa leswaku “mfumo [kumbe vulawuri] wa misava” se wu ve “mfumo wa Hosi ya hina ni wa Kreste wa yona,” ni leswaku “nkarhi lowu vekiweke” wa Yehovha wa “ku lovisa lava onhaka misava” se wu fikile. (Nhlavutelo 11:15, 17, 18) Xana wolawo a hi mahungu lamanene hakunene?

Leswi Nhlavutelo Yi Hi Khomeleke Swona

4. (a) Hi yihi mintiyiso ya xisekelo leyi kumekaka eka ndzima yo sungula ya Nhlavutelo? (b) I yini leswi languteriweke eka lava va swi tsakelaka ku pfuniwa hi marungula lama tsakisaka?

⁴ Ndzima yo sungula ya buku ya Nhlavutelo yi hlamusela Yehovha a ri “Alfa na Omega, . . . Loyi a nga kona ni loyi a a ri kona ni loyi a taka, wa Matimba Hinkwawo.” Naswona yi hlamusela N’wana wakwe Yesu Kreste a ri “Mbhoni yo Tshembeka,” “mativula eka lava feke” ni “Mufumi wa tihosi ta misava.” Yi tlhela yi hlamusela Yesu a ri “loyi a hi rhandzaka naswona a hi ntshunxeke eswidyohweni swa hina hi ngati yakwe.” (Nhlavutelo 1:5, 8) Xisweswo, ku sukela eku sunguleni, Nhlavutelo yi hlamusela mintiyiso ya xisekelo leyi ponisaka vutomi. Ku byeriwa marungula lama tsakisaka a swi nge va pfuni nchumu “lava tshamaka emisaveni,” handle ka loko va xixima vuhosi bya Yehovha, va va ni ripfumelo engatini ya Yesu leyi halatiweke, ni ku pfumela leswaku Yehovha u n’wi pfuxile ni leswaku Kreste sweswi i Mufumi wa misava la vekiweke hi Xikwembu.—Pisalema 2:6-8.

5. Hi xihi xikhundlha xa Kreste hi ku ya hi ndzima 2 na 3 ya Nhlavutelo?

⁵ Tindzima timbirhi leti landzelaka ti hlamusela Kreste Yesu a ri Mulanguteri wa rirhandzu la nga etilweni, wa mavandlha ya vadyondzisiwa va yena va laha misaveni. Buku-nsongwa leyi kongomisiweke emavandlheni lama hlawuriweke ya nkombo ya Vukreste lawa a ma ri kona eAsia Minor eka lembe-xidzana ro sungula C.E. a yi tamele xikhutazo ni ndzayo yo tiya leyi tirhaka ni namuntlha. Marungula lawa a ma rhumeriwa emavandlheni hakanyingi a ma sungula hi marito yo tanihi lama nge “Ndzi tiva swiendlo swa wena” kumbe “Ndzi tiva nhlomulo wa wena.” (Nhlavutelo 2:2, 9) Ina, Kreste a a swi tiva kahle leswi a swi endleka emavandlheni ya vadyondzisiwa va yena. Man’wana u ma bumabumele hikwalaho ka rirhandzu, ripfumelo, ku hisekela vutirheli, ku tiyisela ni ku tshembeka evitweni ni le ritweni rakwe. Man’wana u ma tshinyile hikwalaho ka leswi ma tshikeke rirhandzu leri a ma ri na rona eka Yehovha ni le ka N’wana wakwe ri hola, kumbe hikwalaho ka leswi ma tlheleleke emikhuveni ya ku tikhoma ko biha hi tlhelo ra rimbewu, ya ku gandzela swikwembu swa hava kumbe eka mimpambukwa ya vugwinehi.

6. Xana xivono lexi tsariweke eka ndzima 4 xi pfuna vanhu ku twisisa yini?

⁶ Ndzima 4 yi nyikela xivono lexi hlamarisaka xa xiluvelo xa le tilweni xa Yehovha Xikwembu. Hi ku komisa xi kombisa ku dzuneka ka vukona bya Yehovha ni ka muxaka wa vulawuri bya le tilweni lebyi a nga ta byi tirhisa. Valawuri lava rhwexiweke tiharhi, lava swiluvelo swa vona swi rhendzeleke xiluvelo lexikulu evuakweni hinkwabyo, va nkhinsamela Yehovha, va ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.”—Nhlavutelo 4:11.

7. (a) Xana ntsumi yi va khutaza ku endla yini lava tshamaka emisaveni? (b) Hi xihi xiphemu xa nkoka xa ntirho wa hina wa ku dyondzisa?

⁷ Xana leswi swi vula swo karhi eka vanhu namuntlha? Ina. Loko va swi lava ku hanya ehansi ka Mfumo wa Gidi ra Malembe, va fanele va yingisa leswi “ntsumi leyi hahaka empfhukeni” yi swi vulaka: “Chavani Xikwembu mi xi vangamisa, hikuva nkarhi wa ku avanyisiwa hi xona wu fikile.” (Nhlavutelo 14:6, 7) Xin’wana xa swikongomelo-nkulu swa ntirho lowu endliwaka hi Timbhoni ta Yehovha wa ku dyondzisa vanhu Bibele i ku pfuna “lava tshamaka emisaveni” leswaku va tiva Yehovha ni ku n’wi gandzela, va n’wi xixima tanihi Muvumbi, naswona va rhandza ku titsongahatela vuhosi byakwe lebyi lulameke.

Xinyimpfana Xi Faneriwa Hi Ku Fundzhiwa

8. (a) Kreste u hlamuseriwa njhani eka ndzima 5 na 6? (b) Hinkwavo lava yingisaka marungula lama tsakisaka va nga dyondza yini exivonweni lexi?

⁸ Tindzima timbirhi leti landzelaka, ku nga 5 na 6, ti hlamusela Yesu Kreste a ri Xinyimpfana lexi fanelekelaka ku pfula buku-nsongwa leyi nga ni swilemo swa nkombo, ivi, hi ririmi ro fanekisela, a hlavutela swiendlakalo leswi humelelaka enkarhini wa hina. (Ringanisa Yohane 1:29.) Marito lama nga etilweni ma byela Xinyimpfana lexi xo fanekisela ma ku: “Swa ku fanela ku teka buku-nsongwa u pfula swilemo swa yona, hikuva u tlhaviwile naswona hi ngati ya wena u xavele Xikwembu vanhu lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo, naswona u va endle va va mfumo ni vaprista eka Xikwembu xa hina, va ta va tihosi emisaveni.” (Nhlavutelo 5:9, 10) Xivono lexi xi dyondzisa leswaku exisekelweni xa ngati ya Kreste leyi halatiweke, vanhu vo karhi va tinxaka hinkwato va rhambiwile leswaku va ya va na yena etilweni, va ‘fuma misava va ri tihosi.’ (Ringanisa Nhlavutelo 1:5, 6.) Nhlayo ya vona leyi pimiweke yi paluxiwa endzhaku eka Nhlavutelo.

9. Xana Kreste u hlamuseriwa njhani eka ndzima 6?

⁹ Exivonweni xin’wana, Kreste u hlamuseriwa a ri mugadi wa hanci yo basa la rhwexiweke harhi, la yaka a ya “hlula, ni ku hetisa ku hlula ka yena.” Lexi tsakisaka, u ta herisa swilo swo biha leswi fanekiseriwaka hi vagadi lavan’wana vanharhu va tihanci ta Apokalipsi, lava ku gada ka vona hi ku tlalamba ku vangeleke vanhu nyimpi, ndlala ni rifu ku sukela eka lembe ro hlawuleka ra 1914. (Nhlavutelo 6:1-8) Ntirho wo hlawuleka wa Kreste, Xinyimpfana xa Xikwembu, wa ku ponisa vanhu ni wa ku hetisisa swikongomelo leswinene swa Yehovha, hi wona lowu kandziyisiwaka ngopfu entirhweni wa Timbhoni ta Yehovha wa ku dyondzisa vanhu Bibele.

10. (a) I rungula rihi ra nkoka leri nyikeriwaka eka ndzima 7? (b) Kreste u te yini hi lava va nyikiwaka Mfumo?

¹⁰ Ndzima 7 yi tamele marungula lama tsakisaka hakunene. Hi le bukwini ya Nhlavutelo ntsena laha hi kumaka nhlayo ya lava Yesu a va vuleke “ntlhambinyana” lowu Tata wa Xinyimpfana a wu nyikaka Mfumo. (Luka 12:32; 22:28-30) Lava va funghiwa hi Yehovha Xikwembu hi ku tirhisa moya wa yena. (2 Vakorinto 1:21, 22) Muapostola Yohane, loyi a amukeleke Nhlavutelo leyi, wa tiyisa: “Ndzi twa nhlayo ya lava funghiweke, va 144 000.” (Nhlavutelo 7:4) Endzhaku, nhlayo leyi yi tiyisekisiwa hi ndzima yin’wana yi ri ntsengo wa “lava xaviw[eke] evanhwini” leswaku va ya fuma na Xinyimpfana eNtshaveni ya Siyoni wa le tilweni. (Nhlavutelo 14:1-4) Hambileswi tikereke ta Vujagana ti nyikelaka tinhlamuselo to rharhangana ni leti nga khorwisiki malunghana ni nhlayo leyi, lexi tsakisaka, xidyondzi xa Bibele, E. W. Bullinger, xi vula leswi landzelaka hi nhlayo leyi: “Mhaka yi le rivaleni: eka ndzima leyi ku vulavuriwa hi nhlayo leyi kongomeke ni nhlayo leyi nga tiviwiki.”

11. (a) Hi wahi marungula lama tsakisaka lama kumekaka eka ndzima 7? (b) Hi wihi ntshembo wa swirho swa “ntshungu lowukulu”?

¹¹ Xana hi yihi nhlayo leyi nga tiviwiki leyi Bullinger a a vulavula ha yona? Eka ndzimana 9, muapostola Yohane u tsarile a ku: “Endzhaku ka swilo leswi ndzi languta, kutani waswivo, a ku ri ni ntshungu lowukulu, lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlavutelo 7:9) Xana ntshungu lowu wukulu i vamani, hi xihi xiyimo xa wona namuntlha emahlweni ka Xikwembu, naswona vumundzuku bya wona hi byihi? Nhlamulo ya Apokalipsi i mahungu lamanene eka lava va tshamaka emisaveni. Ha hlaya: “Lava hi lava humaka enhlomulweni lowukulu, naswona va hlantswe tinguvu ta vona to leha va ti endla to basa hi ngati ya Xinyimpfana.” Hikwalaho ka ripfumelo leri va nga na rona engatini ya Kreste leyi halatiweke, va ta sirheleriwa hi nkarhi wa ‘nhlomulo lowukulu.’ Kreste “[u ta] va kongomisa eminseledyaneni ya mati ya vutomi. Kutani Xikwembu xi ta sula mihloti hinkwayo ematihlweni ya vona.” (Nhlavutelo 7:14-17) Ina, timiliyoni ta vanhu lava hanyaka namuntlha ti nga va swirho swa ntshungu wa ntsandza-vahlayi lowu nga ta pona makumu ya mafambiselo lama hombolokeke ya swilo ya namuntlha. Tanihi malandza ya Hosi Yesu Kreste enkarhini wa Mfumo wakwe wa Gidi ra Malembe, va ta kongomisiwa hi yena leswaku va kuma vutomi lebyi nga heriki emisaveni. Xana sweswo a hi mahungu lamanene?

“Ku Avanyisa Ka Yena I Ka Ntiyiso Naswona Ku Lulamile”

12, 13. (a) Xana tindzima 8 ku ya ka 19 ti tamele yini? (b) Ha yini vanhu va timbilu letinene va nga fanelanga va hetiwa matimba hi vuprofeta byo tano?

¹² Tindzima 8 ku ya ka 19 hi tona ngopfu-ngopfu ti endlaka leswaku buku ya Apokalipsi kumbe Nhlavutelo, yi tiveka yi ri buku leyi profetaka makhombo yo chavisa. Ti ni marungula ya ku avanyisa ka vukari (loku fanekiseriwaka hi ku biwa ka tinanga, makhombo ni minkambana ya vukari bya Xikwembu) lama kongomisiweke eka swiphemu swo hambana-hambana swa mafambiselo ya swilo ya Sathana. Ku avanyisa loku ku ta rhanga ku kongomisiwa eka vukhongeri bya mavunwa (“Babilona Lonkulu”), ivi ku landzela mafambiselo ya politiki lama lwisanaka ni Xikwembu, lama fanekiseriwaka hi swivandzana.—Nhlavutelo 13:1, 2; 17:5-7, 15, 16.a

¹³ Tindzima leti ti vulavula hi ku basisiwa ka matilo, laha Sathana ni madimona yakwe va hlongoleriwaka emisaveni. Hi tona ntsena ti swi vekaka erivaleni leswaku ha yini ku ve ni maxangu lamakulu swinene emisaveni ku sukela hi 1914. (Nhlavutelo 12:7-12) Nakambe, hi ndlela yo fanekisela, ti hlamusela ni ku lovisiwa ka mafambiselo ya Sathana ya swilo ya misava leyi lama hombolokeke. (Nhlavutelo 19:19-21) Xana vanhu va timbilu letinene va fanele va tsemiwa nhlana hi swiendlakalo sweswo leswi hlamarisaka? E-e, hikuva loko Xikwembu xi tsema timhaka, vandla ra le tilweni ri huwelela ri ku: “Dzunisani Yah! Ku ponisiwa ni ku vangama ni matimba i swa Xikwembu xa hina, hikuva ku avanyisa ka xona i ka ntiyiso, ku lulamile.”—Nhlavutelo 19:1, 2.

14, 15. (a) Xana mafambiselo ya swilo ya namuntlha lama hombolokeke ma ta herisiwa njhani hi ku lulama? (b) Ha yini xiphemu lexi xa Apokalipsi xi fanele xi tsakisa vanhu va timbilu letinene?

¹⁴ Yehovha a nge tisi mafambiselo ya swilo lama lulameke a nga rhanganga hi ku susa lava onhaka misava. (Nhlavutelo 11:17, 18; 19:11-16; 20:1, 2) Hambiswiritano, a ku na munhu kumbe tiko ra politiki leri nga ni mfanelo kumbe matimba ya ku endla sweswo. I Yehovha ntsena kun’we ni Hosi tlhelo Muavanyisi loyi a n’wi vekeke, Kreste Yesu, lava nga endlaka sweswo hi ku lulama.—2 Vatesalonika 1:6-9.

¹⁵ Hilaha Apokalipsi yi kombisaka kahle hakona, Yehovha u ni xikongomelo xa ku herisa mafambiselo ya namuntlha ya swilo lama hombolokeke. Mhaka leyi yi fanele yi tsakisa vavanuna ni vavasati lava “va nga ni nhlomulo, lava va konyaka hikwalaho ka swilo hinkwaswo leswi nyenyetsaka leswi endliwaka.” (Ezekiyele 9:4) Leswi swi fanele swi dzikisa xilaveko xa xihatla emianakanyweni ya vona, xa ku yingisa xirhambo lexi ntsumi yi xi vuleke loko yi hangalasa marungula lama tsakisaka yi ku: “Chavani Xikwembu . . . hikuva nkarhi wa ku avanyisiwa hi xona wu fikile, gandzelani Loyi a endleke tilo ni misava.” (Nhlavutelo 14:7) Onge vanhu vo tano va nga gandzela ni ku tirhela Yehovha, hi ku khomisana ni Timbhoni takwe, “[leti] hlayisaka swileriso swa Xikwembu naswona [ti] nga ni ntirho wa ku nyikela vumbhoni mayelana na Yesu.”—Nhlavutelo 12:17.

Mfumo Wo Hlawuleka Wa Gidi Ra Malembe

16. (a) Ha yini tikereke ta Vujagana ti honise ntshembo wa Mfumo wa Gidi ra Malembe? (b) Ha yini Timbhoni ta Yehovha ti pfumela leswaku xikhongelo xa xikombiso xi ta hlamuriwa?

¹⁶ Tindzima 20 ku ya ka 22 ta buku ya Nhlavutelo ti tamele xisekelo xa Matsalwa xa ku langutela Mfumo wa Gidi ra Malembe. Lexi hi xona ntsena xiphemu xa Bibele lexi hi ku kongoma xi vulavulaka hi nkarhi wa gidi ra malembe lowu nga ta va masungulo ya ntsako lowu nga heriki etilweni ni le misaveni. Tikereke ta Vujagana ti honise ntshembo wa Mfumo wa Gidi ra Malembe. Tanihi leswi tikereke ti dyondzisaka leswaku lavo lulama va ya etilweni kasi lavo biha va ya etiheleni, a ti dyondzisi hi ta ku va misava yi hundzuka paradeyisi. Xikhongelo xa xikombiso xo kombela leswaku “ku rhandza [ka Xikwembu] ku endliwa emisaveni, hilaha ku endliwaka hakona etilweni,” i xa hava eka swirho swo tala swa tikereke ta Vujagana. (Matewu 6:10, New International Version) Kambe a swi tano hi Timbhoni ta Yehovha. Ti pfumela hi mbilu hinkwayo leswaku Yehovha Xikwembu a nga yi endlanga “swa hava” misava, kambe u yi endlele leswaku “ku akiwa eka yona.” (Esaya 45:12, 18) Xisweswo, vuprofeta bya khale, xikhongelo xa xikombiso ni ntshembo lowu kumekaka eka Apokalipsi malunghana ni Mfumo wa Gidi ra Malembe, hinkwaswo ka swona swa pfumelelana. Hi nkarhi wa Mfumo wakwe wa Gidi ra Malembe, Kreste u ta tiyisekisa leswaku ku rhandza ka Yehovha ku endliwa emisaveni, hilaha ku endliwaka hakona etilweni.

17. I yini lexi kombisaka leswaku xiga lexi nge “malembe ya 1 000” xi fanele xi tekiwa hi ku kongoma?

¹⁷ Xiga lexi nge “malembe ya 1 000” xi humelela minkarhi ya tsevu eka tindzimana to sungula ta nkombo ta Nhlavutelo ndzima 20. Lexi xiyekaka hi leswaku hi Xinghezi xi tirhisiwa minkarhi ya mune xi ri ni xirhangi “the,” leswi kombaka leswaku xi kombetela eka gidi ra malembe ra xiviri, ku nga ri nkarhi lowu nga hikiwangiki, hilaha vahlamuseri vo tala eka Vujagana va dyondzisaka hakona. Xana ku ta endleka yini hi nkarhi wa Mfumo wa Gidi ra Malembe? Xo sungula, Sathana a nge he koti ku endla nchumu enkarhini wolowo hinkwawo. (Nhlavutelo 20:1-3; ringanisa Vaheveru 2:14.) Lawa i mahungu lamanene hakunene!

18. (a) Ha yini Mfumo wa Gidi ra Malembe wu nga vuriwaka “siku” ra ku avanyisa? (b) Ku ta humelela yini loko ku hela malembe ya gidi?

¹⁸ Tanihi leswi “matimba ya ku avanyisa” ma nga ta nyikiwa lava va nga ta va “tihosi swin’we na yena [Kreste] ku ringana malembe wolawo ya 1 000,” kahle-kahle nkarhi lowu i “siku” ro avanyisa ra malembe ya gidi. (Nhlavutelo 20:4, 6; ringanisa Mintirho 17:31; 2 Petro 3:8.) Lava feke va ta pfuxiwa, naswona vona, swin’we ni lava nga ta pona ‘nhlomulo lowukulu,’ va ta avanyisiwa hi ku lulama hi ku ya hi mintirho kumbe swiendlo swa vona swa nkarhi wolowo. (Nhlavutelo 20:12, 13) Loko ku hela gidi ra malembe, Sathana u ta ntshunxiwa nkarhinyana leswaku a ringa vanhu ro hetelela, ivi endzhaku ka swona, a loviseriwa makumu swin’we ni madimona yakwe na mani na mani loyi a xandzukaka emisaveni a landzela yena. (Nhlavutelo 20:7-10) Mavito ya vanhu lava nga ta hlula ndzingo lowu ma ta tsariwa ma nga ha suriwi “ebukwini ya vutomi,” kutani va hanya hilaha ku nga heriki va tsakile, va tirhela Yehovha ni ku n’wi gandzela emisaveni leyi nga paradeyisi.—Nhlavutelo 20:14, 15; Pisalema 37:9, 29; Esaya 66:22, 23.

19. (a) Ha yini hi nga tiyisekaka leswaku switshembiso swo hlamarisa leswi tameriweke hi buku ya Nhlavutelo swi ta hetiseka hakunene? (b) Ku ta kambisisiwa yini eka xihloko lexi landzelaka?

¹⁹ Wolawo i marungula lama tsakisaka lama tameriweke hi Apokalipsi. A ko va switshembiso swa hava leswi tshembisiweke hi munhu. Muapostola Yohane u tsarile a ku: “Loyi a tshameke exiluvelweni a ku: ‘Waswivo, ndzi endla swilo hinkwaswo swi va leswintshwa.’ A tlhela a ku: ‘Tsala, hikuva marito lawa ma tshembekile, i ya ntiyiso.’” (Nhlavutelo 21:5) Xana hi fanele hi endla yini leswaku na hina hi vuyeriwa loko ku hetiseka marungula lawa ma tsakisaka? Buku ya Nhlavutelo yi tamele switsundzuxo swo tala eka lava va lavaka ku tsakisa Xikwembu. Ku landzela switsundzuxo swo tano swi ta hi nyika ntsako lowukulu ngopfu, sweswi ni hilaha ku nga heriki, hilaha xihloko lexi landzelaka xi nga ta kombisa hakona.

[Tinhlamuselo ta le hansi]

Tinhla Ta Mpfuxeto

◻ Hi yihi mintiyiso ya xisekelo leyi kumekaka eka Nhlavutelo tindzima 4 ku ya ka 6, leyi nga xisekelo-nkulu xa marungula lama tsakisaka?

◻ Hi wahi marungula lama tsakisaka lama kumekaka eka Nhlavutelo ndzima 7?

◻ Ha yini vanhu va timbilu letinene va nga fanelanga va hetiwa matimba hi marungula ya vuavanyisi lama kumekaka eka Nhlavutelo?

◻ Mfumo wa Gidi ra Malembe wu ta va “siku” ra ku avanyisa hi tindlela tihi?

[Xifaniso lexi nga eka tluka 10]

Hosi Yesu Kreste u ta herisa nyimpi, ndlala ni rifu hi ku helela emisaveni