Ku Endla Nhluvuko Evutirhelini

1 Ku na xivulavulelo xa khale ehenhleni ka nhluvuko lexi nge: “Sungula laha u nga kona. Kambe u nga yimi laha u nga kona.” Xivulavulelo xexo xi tirha swonghasi eku endleni ka nhluvuko evutirhelini! Loko u sungula evutirhelini, u nga ha va u kote ku nyikela mhaka yo koma ntsena ya rungula ra Mfumo. Kambe loko malembe ma nga ri mangani ma hundzile, naswona u nga sukanga eka xiyimo xexo, u yime laha a wu ri kona, xana u nga endla yini?

2 Goza ro sungula i ku kombela Yehova leswaku u kuma vutlhari lebyi lavekaka ku dyondzisa hi vutshila. (Swiv. 15:14; Yak. 1:5) Goza ra vumbirhi i ku tirha hi ku pfumelelana ni xikhongelo xa wena. Veka nkarhi wo languta marungula lama nga ebukwini leyi nge Reasoning etlhelo. Kuma leri u vonaka leswaku u nga ri tirhisa hi laha ku humelelaka, naswona u phindha-phindha rungula ku kondza u ri twisisa kahle. Goza ra vunharhu i ku famba ni vamakwerhu va wena ensin’wini leswaku u tirhisa mhaka leyi u yi lunghiseleleke.

VANGHANA LAVA NGA TA KU PFUNA

3 U nga ha va u ku, ‘Sweswo swa olova ku swi vula ku nga ri ku swi endla.’ I ntiyiso, kambe hi yo mhaka leyi ha yona u nga ni vanghana lava nga ta ku pfuna. Loko u ri muntshwa, vulavurisana ni vatswari va wena kumbe vahuweleri lava nga ni ntokoto lava nga vatirheli lava vekaka mihandzu. Va vutise swiringanyeto leswi u nga vulavurisanaka ni vanhu emakaya ha swona. Va nga ha ringanyeta minkarhi yo titoloveta laha u nga ringetaka ku nyikela mhaka ya wena kona. Va nga teka xiphemu xa n’wini wa muti, va tlakusa ku kaneta loku tolovelekeke loku kumiwaka emakaya. Hi ku titoloveta u nga dyondza ku vulavula ni vanhu hi vutshila.

4 U na vanghana van’wana lava nga ku pfunaka. Ku na maphayona lama dyondzeke tindlela ta ku dyondzisa hi ntokoto na hi ku hlanganyela eka Xikolo xa Ntirho wa Vuphayona. Mufambisi wa dyondzo ya n’wina ya buku kumbe mulanguteri wa ntirho na vona va nga ha va eka xiyimo xo tirha na wena hi yindlu na yindlu naswona va kombisa ndlela yo vulavula ni ku ehleketisisa ni vanhu hi laha ku engetelekeke ha yona.

KU LANDZELELA KU TSAKELA LOKU KOMBISIWEKE

5 Hi tsakela ku nyikela mpfuno lowu engetelekeke wa moya eka vanhu lava amukelaka tibuku ta hina. Sweswo swi vula leswaku hi fanele ku tlhelela hi ya pfuxa ku tsakela loku engetelekeke. U nga si endla riendzo ro vuyela, pfuxeta leswi u swi vuleke eka riendzo ro sungula leswaku u ta kurisa mhaka leyi pfuxeke ku tsakela ka vona hi laha ku humelelaka. Nakambe, tsundzuka leswaku loko hi byala ni ku cheleta, i Yehova loyi a mirisaka. Kombela nkongomiso wa yena u nga si endla riendzo. (1 Vakor. 3:6; 2 Vakor. 9:10) Loko hi pfuna van’wana ku dyondza, hi endla nhluvuko wa munhu hi xiyexe.

6 Goza rin’wana ra nkoka leri landzelaka i ku sungula ni ku fambisa dyondzo ya Bibele. Loko u nga si fikelela xiyimo xexo eka nhluvuko wa wena wa vutirheli, hambeta u tshinelela Yehova hi xikhongelo ivi u n’wi kombela a ku pfuna u kuma ni ku phamela munhu la fanaka ni nyimpfu. Swi ta ku pfuna ku xiya ndlela leyi mudyondzisi la humelelaka a fambisaka dyondzo ya Bibele ha yona, kutani u tekelela tindlela ta yena to dyondzisa. Nakambe, pfuxeta rungula ehenhleni ka ku dyondzisa ro tanihi leri kumekaka eka The Watchtower ya August 1, 1984, matluka 8-17. Xisweswo hi ku tilunghiselela, u ta lunghekela ku fambisa dyondzo loko swikhongelo swa wena swi hlamuriwa.

VEKA NI KU FIKELELA TIPAKANI

7 Ku fikelela tipakani ta ku dyondzisa loku humelelaka swinene, ku endla maendzo yo vuyela ni ku fambisa tidyondzo swi teka nkarhi. Xana u nga tivekela pakani yin’wana, liya ya ku va phayona ra nkarhinyana kumbe ra nkarhi na nkarhi? Tanihi leswi u yaka emahlweni u endla nhluvuko evutirhelini, u nga va xihlovo xa xikhutazo eka van’wana. Mikateko yo tala leyi humaka eka Yehova yi nga va ya wena loko u nga yimi laha u nga kona kambe u endla nhluvuko hakantsongo-ntsongo.