Endla Nhluvuko Loko U Ri Karhi U Chumayela
1 Tata wa hina la nge matilweni wa tsaka loko malandza ya yena ma tiyisa vuxaka bya wona na yena. Sweswo swi katsa ku va muhuweleri wa mahungu lamanene la wupfeke ni la nga ni vuswikoti byo dyondzisa. Pawulo u khutaze Timotiya loyi a a ri mulanguteri leswaku a hambeta a tirha hi matimba leswaku ku ya emahlweni ka yena ku vonaka. (1 Tim. 4:13-15) Hinkwerhu hi fanele hi lwela ku antswisa ndlela leyi hi chumayelaka ha yona hambiloko ku ri khale hi ri vahuweleri.
2 Tivekele Tipakani: Nhluvuko wu endliwa hi ku tivekela tipakani. Hi tihi tipakani tin’wana leti hi nga tivekelaka tona? Hi nga ha ringeta ku va ni vutshila byo tirhisa Bibele tanihi banga ra hina ra moya. (Efe. 6:17) Kumbexana hi nga ha antswisa ndlela yo karhi yo vula mahungu lamanene yo fana ni ku chumayela exitarateni, ku chumayela hi riqingho kumbe ku chumayela etindhawini ta mabindzu. Kumbe hi antswisa emhakeni yo endla maendzo yo vuyela leswaku ma hetelela ma ri tidyondzo ta Bibele. Pakani yin’wana leyinene i ku antswisa ndlela yo sungula tidyondzo ta Bibele.
3 Leswi Nga Hi Pfunaka: Minhlangano ya vandlha, ngopfu-ngopfu Xikolo xa Vutirheli bya le Tilweni ni Nhlangano wa Ntirho, yi hleriwe ku hi pfuna leswaku hi antswisa ndlela leyi hi chumayelaka ha yona. Hi ta vuyeriwa ngopfu loko hi hambeta hi tinyika nkarhi wo lunghiselela minhlangano leyi ni ku nga xwi eka yona, hi tlhela hi tirhisa leswi hi swi dyondzaka.—2 Kor. 9:6.
4 Nakambe hi fanele hi pfunana leswaku hi endla nhluvuko. (Swiv. 27:17) Ku yingiserisisa lava hi fambaka na vona ensin’wini loko va ri karhi va chumayela, swi ta hi pfuna leswaku hi endla nhluvuko. Ku engetela kwalaho, mulanguteri wa dyondzo ya buku ya vandlha a nga hlela leswaku hi pfuniwa. Hi nga pfuneka ngopfu loko ho famba ni phayona kumbe muhuweleri la nga ni ntokoto ensin’wini, hikuva hi ta kota ku antswisa ndlela ya hina yo chumayela ni ku va lava tsakeke. Xana ku ni muhuweleri la ha ku sungulaka ku chumayela entlaweni wa hina wa dyondzo ya buku? Loko a ri kona, hi nga ha n’wi rhamba leswaku hi famba na yena ensin’wini.
5 Ntirho wa nkoka swinene lowu endliwaka namuntlha i wa ku chumayela mahungu lamanene ya Mfumo. Loko hi ri karhi hi endlela Yehovha ‘xitlhavelo xa hina xa ku dzunisa,’ hi lava ku n’wi endlela lexinene hilaha hi nga kotaka hakona. (Hev. 13:15) Loko hi lwela ku endla nhluvuko entirhweni wa hina wo chumayela, hi ta va vatirhi ‘lava nga riki na nchumu wo khomiwa hi tingana ha wona, lava ri tamelaka khwatsi rito ra ntiyiso.’—2 Tim. 2:15.