Pfuna Van’wana Ku Va Ni Vuswikoti Eku Tirhiseni Ka Rito Ra Xikwembu
1 Yehova u endle malunghiselelo lamakulu yo hi letela leswaku hi humelela eku endleni ka vutirheli bya munhu hi xiyexe. Hi ku tirhisa leswi a swi lunghiseleleke, ‘minkondzo ya hina ya tiyisiwa.’ (Ps. 37:23) Tanihi xikombiso, ku lava ku va malembe ya 50 Xikolo xa Vutirheli bya le Tilweni a xi nyikela ndzetelo lowu humelelaka eka vutshila byo vulavula ni ku dyondzisa. Leswi swi engeteriwe hi Nhlangano wa Ntirho wa vhiki na vhiki, tinkulumo ta wona leti tirhaka, minkombiso ni minkarhi yo bula.
2 Ha vuyeriwa hi maendzo ya nkarhi na nkarhi ya valanguteri va xifundza. Mulanguteri wa ntirho u endzela ntlawa wun’wana ni wun’wana wa dyondzo ya buku ni ku nyikela xikhutazo xa rirhandzu leswaku a hi pfuna hi antswisa vuswikoti bya hina evutirhelini bya le rivaleni. Kun’we ni leswi hinkwaswo, nkarhi wun’wana ni wun’wana loko hi hlanganela ntirho wa nsimu, timinete ta khume ta ndzayo leyi tirhaka ti nyika xikhutazo ni swiringanyeto leswi nga tirhisiwaka swa siku rero. (Vahev. 10:23-25) Malunghiselelo yo tano hi ku tirhisa nhlengeletano ya yena ma kombisa nkhathalelo wa rirhandzu wa Yehova eka lava a va leriseke ku chumayela mahungu lamanene.
PFUNA VANTSHWA NI SWICHUDENI SWA BIBELE
3 Vahuweleri lavantsongo ni lavantshwa va lava mpfuno wa nkarhi na nkarhi wa munhu hi xiyexe evutirhelini bya le rivaleni. Hambi loko hinkwerhu ho nyikela mpfuno wa nkarhi na nkarhi, vutihlamuleri lebyikulu byi le ka vatswari ni lava va fambisaka tidyondzo ta Bibele ni vanhu volavo. (Vagal. 6:6; Vaef. 6:4) Ku humelela eku tirhiseni ka Bibele a swi ti hi ku tiendlekela, hi ku hundza ka nkarhi ni mpimo wa ntokoto. Ku ri na sweswo, ku na xilaveko xa mpfuno ni ndzetelo wa rirhandzu wa munhu hi xiyexe lowu hambetaka.
4 Mpfuno wa munhu hi xiyexe wu fanele ku sungula munhu a nga si hlanganyela hi xiviri evutirhelini. Pfuxeta Mhaka Yo Vulavurisana. Pfuna lava fanelaka ku hlanganyela evutirhelini ku vumba mhaka yo olova. Kumbexana va nga tirhisa rin’wana ra matsalwa lama ringanyetiweke ku kondza va kuma ntokoto ni xivindzi. Loko mi tirha swin’we ensin’wini, tinyike nkarhi exikarhi ka tindlu ku nyika xibumabumelo ni ku nyikela swiringanyeto swa musa swa ndlela yo endla nhluvuko ha yona. Tshikilela xilaveko xo hlayisa langutelo ra xikhongelo minkarhi hinkwayo.—Vaef. 6:18, 19.
5 Hambi leswi maphayona yo tala ya nkarhi hinkwawo ni vahuweleri van’wana lava nga ni ntokoto va hlanganyelaka evutirhelini ngopfu-ngopfu hi mahelo-vhiki, mawaku ku saseka ka swona loko vahuweleri lava va humelelaka vo tlhela va hlela swiyimiso swa vona leswaku va kota ku seketela ntirho wa nsimu wa mahelo-vhiki nkarhi na nkarhi. Ku tinyiketela ka vona ko tano ka munhu hi xiyexe ku ta tlangeriwa swinene hi van’wana lava a va ta lava ku endla nhluvuko hi ku tirha na vona evutirhelini.—Ekl. 4:9, 10.
6 Na hina hinkwerhu a a hi ri vantshwa, naswona hi nga ri na ntokoto evutirhelini. Vo tala va hina va kume xikhutazo ni ndzetelo eka vahuweleri ni maphayona lama nga ni ntokoto swinene. Vuswikoti bya hina bya sweswi ni ntsako lowu engetelekeke evutirhelini i vuyelo lebyi kongomeke bya mpfuno wolowo. (Swiv. 27:17; Mintirho 20:35) Onge ku tlangela ka hina ka leswi Yehova a hi endleleke swona hi ndzetelo lowu tirhaka evutirhelini ku nga hi susumetela ku tiendla hi kumeka ku pfuna van’wana leswaku va va ni vutshila eku tirhiseni ka Rito ra Yehova.