Dyondzo 19
Ku Tirhisa Xikolo Leswaku U Antswisa Vutirheli Bya Nsimu
1. Loko hi lunghiselela tinkulumo ta hina ta swichudeni, i xikongomelo xihi xa xikolo lexi hi faneleke ku xi tsundzuka?
1 Xin’wana xa swikongomelo leswikulu swa Xikolo xa Vutirheli bya le Tilweni i ku hi pfuna ku va lava humelelaka swinene evutirhelini bya nsimu. Tsundzuka sweswo loko u lunghiselela swiavelo swa wena. U nga tsakeli ku kuma vutivi ntsena, kambe ni ndlela leyi vutivi byebyo u nga byi tirhisaka ha yona eku chumayeleni ni le ku dyondziseni ka wena evutirhelini bya nsimu.
2. Ku titoloveta tinkulumo ta swichudeni ku nga endlisiwa ku yini leswaku ku nyikela vumbhoni?
2 Van’wana va tirhisa swiavelo swa vona hi ndlela leyinene ni leyi kongomeke hi ku titoloveta swona ku ri ni vanghana va vona, vaakelani, mathicara ya xikolo, swirho swa ndyangu leswi nga riki vapfumeri ni van’wana lava nga ta yingisa. Leswi swi hetisisa swilo swo hlayanyana. Xichudeni xi nga vona n’wangulo wa van’wana, kutani xi nga endla mindzulamiso leswaku xi antswisa nkulumo. Nakambe, leswi swi nga endla munhu loyi un’wana a tsakela Bibele loko a xiya rungula ra ntikelo leri nyikeriwaka. Leyi yi nga va ndlela yo n’wi rhamba leswaku a va kona exikolweni xa vutirheli. Vanhu vo tala va sungule ku ya eHolweni ya Mfumo hi ndlela leyi. Mbhoni yin’wana eJapani yi titolovete xiyenge xa yona xa nongonoko wa xikolo xa vutirheli emahlweni ka xirho xa kereke lexi yi xi endzeleke hi laha ku hlawulekeke. Nhloko-mhaka ya yena a yi ku, “Vanhu va Xikwembu va lerisiwa ku huma ‘eBabilona.’” Wansati loyi u kombise ku tsakela naswona u pfumerile ku va ni dyondzo ya Bibele.
3. I yini lexi nga ta hi endla hi tirhisa leswi hi swi twaka exikolweni evutirhelini bya nsimu?
3 Anakanya hi ntirho wa nsimu. Exikolweni xa vutirheli u twa rungula lero tala lerinene, naswona xiyenge lexikulu xa rona xi nga tirhisiwa hi ku kongoma evutirhelini bya nsimu. Eka nongonoko lowu hi bula hi timhaka to tanihi swivangelo swo tshemba Bibele, tinhlamulo ta swivutiso swa tidyondzo ta vukhongeri, ku hetiseka ka vuprofeta bya Bibele, tinhlamuselo ta matsalwa yo karhi ni ndlela leyi misinya ya milawu ya Bibele yi nga tirhisiwaka ha yona evuton’wini bya siku na siku. Lava ku kuma minkarhi leyi ku pfulekeleke leswaku u tirhisa rungula leri entirhweni wa nsimu. A wu boheki ku rindzela un’wana leswaku a ku vutisa xivutiso ehenhleni ka rona. Loko swi fanela, sungula mhaka ya kona hi wexe. Leswi swi ta dzikisa rungula leri emiehleketweni ya wena n’wini naswona swi ta ku endla loyi a humelelaka swinene evutirhelini.
4. Xikolo xi nga hi pfunisa ku yini ku antswisa ku tirhisa ka hina ka Bibele?
4 Ku tirhisiwa loku kongomeke ka Bibele i xiyenge lexikulu xa ntirho wa hina. Kambe vahuweleri van’wana va nonon’hweriwa hi ku pfula matsalwa lama faneleke hi ku hatlisa. Xana swi tano eka wena? Loko swi ri tano, xikolo xi nga ku pfuna ku endla nhluvuko lowukulu. Hi ndlela yihi ke? Pfula Bibele ya wena loko xivulavuri xin’wana ni xin’wana exikolweni xa vutirheli xi pfula ya xona. Loko xivulavuri xi hlaya tsalwa, ri languti eBibeleni ya wena nkarhi na nkarhi. Loko u languta tindzimana hi ku phindha-phindha, u ta ti tiva kahle naswona u ta swi tiva leswaku ti kumeka kwihi. Leswi swi lavekaka i ku titoloveta, naswona u nga kuma ku titoloveta koloko, hayi loko u ri evutirhelini bya nsimu ntsena, kambe vhiki na vhiki loko u va kona exikolweni. Nakambe, u nga pfuneka eka dyondzo leyi endliwaka hi swivulavuri hinkwaswo. Va hlawula tindzimana leti kongomeke swinene eka tinhloko-mhaka leti va averiweke tona. Loko u landzela swivulavuri, ha yini u nga khwatihati xiyenge-nkulu xa tindzimana leti u anakanyaka leswaku u nga lava ku ti tirhisa evutirhelini bya wena n’wini? Nakambe u nga lava ku ti tsala kun’we ni nhloko-mhaka endzeni ka xifunengeto xa Bibele ya wena. Hi ndlela leyi u ta swi kuma swi olova ku tirhisa leswi u swi dyondzaka exikolweni evutirhelini bya nsimu.
5, 6. Ku tirhisa maandlalelo ya xiviri etinkulumeni ta hina swi ta hi pfunisa ku yini?
5 Loko u lunghiselela nkulumo ya wena, ku hlawula maandlalelo hi vukheta na kona ku ta ku pfuna ku xiya mimpfuno ya xikolo evutirhelini bya wena bya nsimu. Loko swi koteka, tirhisa swiyimo leswi ku hlanganiwaka na swona hakunene evutirhelini. Minkarhi yin’wana u nga ha kuma leswaku nkulumo ya wena yi fanela rungula ra yindlu na yindlu kumbe ku nyikela vumbhoni bya xitshuketa. Hi minkarhi yin’wanyana ri nga va leri tirhaka swinene tanihi bulo ra riendzo ro vuyela. Kumbexana ku nga va bulo leri titshegaka hi yinhla leyi ku nga ta buriwa ha yona edyondzweni ya le kaya ya Bibele. Nkarhi na nkarhi ringeta ku endla leswaku xiyimo xi va xa xiviri. U nga engetela eka ntiyiso wa nkulumo ya wena hi minkarhi yin’wana hi ku kunguhata leswaku n’wini wa muti a landzula leswi u swi vulaka. Kutani u nga kombisa ndlela yo hlangavetana ni xiyimo xexo. Tinkulumo leti fanelaka swiyimo swa vutirheli bya nsimu a hi minkarhi hinkwayo ti fanelaka ku yisa eku humeleleni ka xihatla; nakambe i swa nkoka ku kombisa ndlela yo hlangavetana ni ku pfumala ku tsakela.
6 Loko u averiwe xiyenge xa n’wini wa muti, na wena u nga pfuneka malunghana ni vutirheli bya nsimu. Tirhisa nkarhi lowu ku ringeta ku twisisa ndlela leyi vini va miti va ehleketaka ha yona, ni mhaka leyi va pfuxaka minjhekanjhekisano ha yona. Ku yimela ka wena ka n’wini wa muti wo tano hi xiviri, ni ku xiya ndlela leyi xivulavuri xa xichudeni xi hlangavetanaka ni xiyimo ha yona, swi ta ku letela leswaku u va loyi a humelelaka evutirhelini.
7. Leswaku hi hambeta hi endla nhluvuko, hi le ka yinhla yihi laha hi nga lavaka ku antswisa kona evutirhelini bya hina, evhikini rin’wana ni rin’wana?
7 Loko nkulumo yi sekeriwe eka Buku Yo Letela Ya Xikolo Xa Vutirheli Bya Le Tilweni, kambisisa vuleteri hi langutelo ro antswisa vutirheli bya wena n’wini, hambi i bya yindlu hi yindlu kumbe kun’wanyana. Ha yini u nga endli sweswo yinhla leyikulu yo endla nhluvuko evutirhelini bya wena vhiki rero? Hi xikombiso, loko nkulumo yi vulavula hi xilaveko xa nhloko-mhaka, tivutise loko rungula ra wena evutirhelini bya nsimu ri ri na nhloko-mhaka hakunene. Xana u yi endla yi xiyeka swinene lerova vini va miti va yi dzikisa emiehleketweni endzhaku ka loko u vulavule na vona? Loko swi nga ri tano, tirhela ehenhla ka swona vhiki rero. Nakambe, u ta twa rungula leri vulavulaka hi ku hlaya ni ku tirhisa matsalwa. Loko u yingisela nkulumo leyi, kambisisa ku tirhisa ka wena n’wini ka matsalwa. Xana u ma hlayela n’wini wa muti handle ko ma hlamusela? U ti hlanganisa njhani tindzimana ni nhloko-mhaka ya wena? U ma tirhisa njhani eka n’wini wa muti? Nkambisiso wo tano wu nga pfuna ku antswisa ku hlaya ni ku tirhisa ka wena matsalwa. Xana nkulumo yi vulavula hi ku tirhisa swifaniso? U nga antswisa ku tirhisa ka wena swifaniso hi ndlela yihi? Kumbexana nkulumo ya kona yi ta hlamusela hi madyondziselo eka dyondzo ya le kaya ya Bibele. Lavisisa tindlela ta wena n’wini ku vona ndlela leyi u nga tirhisaka mhaka yoleyo ha yona eku dyondziseni ka dyondzo ya wena ya le kaya ya Bibele, kutani u swi endla vhiki rero. Hi ndlela leyi, u ta va u tirhisa leswi u swi dyondzaka eka Xikolo xa Vutirheli bya le Tilweni leswaku u kurisa vutirheli bya wena bya nsimu.
8. Loko hi ri entirhweni wa nsimu, hi nga tilaya njhani hi ndlela leyi pfunaka?
8 Kambisisa rungula ra wena n’wini. Exikolweni nkarhi na nkarhi u twa ndzayo yi nyikeriwa kutani u xiya mimpfuno ya yona. Mulanguteri wa xikolo a nga ha va a nga ri na wena emutini evutirhelini bya nsimu, kambe ha yini u nga swi endli mukhuva ku tilaya? Loko u heta ku vulavula ni n’wini wa muti kutani u ya ekaya leri landzelaka, tivutise: I yini lexi a ndzi fanele ndzi xi endlile leswaku ndzi humelela swinene? Hi vutivi lebyi ndzi nga na byona sweswi, loko a ndzo endla riendzo rero nakambe, i yini lexi a ndzi ta xi endla hi laha ku hambaneke? Nkambisiso wo tano wu nga ku pfuna siku rero, hikuva u nga hlangana ni xiyimo lexi fanaka ekaya rin’wana. Loko u swi endla mukhuva ku kambisisa marungula ya wena loko u tirha, nhluvuko wu ta tshama wu ri kona. Kavula, loko u tirha ni muhuweleri un’wana, u nga tlhela u kombela swiringanyeto eka loyi u fambaka na yena.
9, 10. Ku nga endliwa yini eminongonokweni ya le kaya ya ku titoloveta leswaku swi hi pfuna ku tirhisa leswi hi swi dyondzaka laha ensin’wini?
9 Ndlela leyinene ngopfu yo antswisa ku humelela ka marungula ya wena i ku titoloveta wona ni van’wana, kutani mi ma kambisisa swin’we. U nga endla leswi ni swirho swa ndyangu wa wena n’wini kumbe ni van’wana ebandlheni. Va kombele leswaku va teka xiyenge xa vini va miti, va pfuxa minjhekanjhekisano leyi tolovelekeke. Loko minjhekanjhekisano yi pfuxiwa, hlangavetana na yona loko u tiva ndlela ya kona. Loko u nga swi koti, yima kutani u kuma swiringanyeto eka lava nga kona. Kutani yana emahlweni, u tirhisa yin’wana ya mianakanyo leyi nyikeriweke. Loko u heta, kambisisani kun’we ku humelela ka leswi swi endliweke. Minongonoko yo tano ya ku titoloveta ekaya yi nga pfuna ku antswisa rungula ra wena, naswona yi tlhela yi ku nyika nkarhi wo lulamisa swihoxo u nga si huma u ya ensin’wini. Yi nga ku pfuna ku ndlandlamuxa misinya ya milawu leyi dyondziweke exikolweni evutirhelini bya wena bya nsimu. Tsundzuka, muapostola Pawulo u vule leswaku vanhu lava vupfeke hi lava “miehleketo ya vona yi vupfeke, lava toloveleke ku hlawula leswinene eka leswo biha.” (Vahev. 5:14) Ndlela yin’wana yo kurisa matimba ya ku twisisa i ku ma tirhisa eminongonokweni yo titoloveta.
10 Xikolo xa Vutirheli bya le Tilweni hi rin’wana ra malunghiselelo layo tala ya Yehova ya ku hanana, yo hi letela. Loko hi dyondza ni ku tirhisa tidyondzo ta xona hi ku chivirika hi ta swi kota ku vula ni muprofeta hi ku: “Hosi, Yehova, u ndzi nyikile ririmi ra mudyondzisi leswaku ndzi ta kota ku tiyisa hi rito ra mina loyi a heleke mbilu; ri xa ni mpundzu, a pfuxa ndleve ya mina leswaku ndzi n’wi yingisa hi laha ku yingisaka vadyondzisiwa.”—Esa. 50:4.