Ku Dyondzisiwa Hi Yehova

1 Muprofeta Esaya u te: “Hosi, Yehova, u ndzi nyikile ririmi ra mudyondzisi leswaku ndzi ta kota ku tiyisa hi rito ra mina loyi a heleke mbilu.” (Esa. 50:4) Ndlela yin’wana leyi Yehova a endlaka leswi ha yona i ku tirhisa ndzetelo lowu nyikeriwaka hi Xikolo xa Vutirheli bya le Tilweni. Hambi swi ri tano, matshalatshala ya munhu hi xiyexe ma ha laveka. Theocratic Ministry School Guidebook eka tluka 39 ya xiya: “Ku nga khathariseki leswaku i minkarhi yo tala ku fikela kwihi leyi u tameleke muxaka wo karhi wa xiavelo ha yona, ku lunghiselela nkarhi hinkwawo i ka nkoka.” Leswi swi tirha eka hina hinkwerhu, hambi hi na tin’hwetinyana hi ri exikolweni kumbe ku sukela xikolo xi sungurile hi 1943.

2 Swichudeni hinkwaswo swi fanele ku lunghiselela hi rixaladza. Leswi swi katsa ku xiya nkarhi. Switsundzuxo leswi nga eka Xiyimiso xa Xikolo xa Vutirheli bya le Tilweni swi ri: “A ku na nkulumo leyi faneleke ku tlula nkarhi.” Loko makwerhu loyi a tamelaka Nkulumo No. 1 nkarhi na nkarhi a tlula nkarhi, u fanele ku nyikiwa ndzayo etlhelweni. Mulanguteri wa xikolo nakambe u fanele ku sungula nhlangano hi nkarhi ni ku xiya switsundzuxo malunghana ni nkarhi lowu vekiweke wa ndzayo ni swibumabumelo swa yena. Hi kombela u xiya leswaku buku leyintshwa leyi nge “Matsalwa Hinkwawo” yi ta tirhisiwa.

3 Hinkwavo va nga vuyeriwa ngopfu eka xiphemu xa tinhla ta Bibele. Ha tsundzuxiwa leswaku leswi a ku fanelanga ku va mpfuxeto wa mhaka leyi averiweke ntsena. Xivulavuri xi fanele ku pfuna vayingiseri ku twisisa leswaku ha yini rungula ri ri ra nkoka eka hina naswona hi ndlela yihi.

4 Eka Nkulumo No. 3, mavekelo yo tala ma tirhisiwile hi ku humelela loku hambanaka. Kambe ku tsundzuka xin’wana xa swikongomelo leswikulu swa xikolo, lexi xi nga ta hi pfuna ku twarisa ntiyiso hi ku kongoma na hi ku twisiseka, ku bumabumeriwa leswaku mavekelo ma katsa nsimu kumbe ku veka vumbhoni hi xitshuketa.

5 Nkulumo No. 4, loko yi tekiwe eka buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, yi ta averiwa swichudeni leswintshwa kumbe leswintsongo. Kavula, xichudeni lexi averiweke xi fanele xi swi kota ku hlaya. Tinkulumo leti ti ta cinca-cincana vhiki rin’wana ni rin’wana ni rungula leri humaka eka buku leyi nge Reasoning. Eka Nkulumo No. 3 na Nkulumo No. 4, xichudeni xi fanele ku tirhisa xihloko lexi kombisiweke.

6 Vuxiyaxiya bya laveka loko swi ta eku nghenisiweni ka mhaka leyi engetelekeke. Timhaka tin’wana leti averiweke ti nga katsa ndzimana yin’we kumbe timbirhi ntsena. Kambe mhaka leyi yi nga ha nyikeriwa hi laha ku humelelaka hi nkarhi lowu nyikiweke hi ku hlaya ni ku hlamusela Matsalwa, ku tirhisa swikombiso ni swin’wana. Hi ntolovelo, a swi hi bohi ku nghenisa mhaka leyi nga ehandle ka leyi averiweke. Vayingiseri va fanele va swi kota ku ku landzela eka buku leyi nkulumo yi sekeriweke eka yona.

7 Xikwembu lexi hi xi gandzelaka xi nyikela xihlovo xa vutlhari ni vutivi lebyi nga onhakiki. (Varhoma 11:33) Hambi ku ri endzhaku ka nkarhi wa magidi ya malembe, ha ha ta va ni swo tala swo swi dyondza. Vuswikoti bya hina byo dzunisa Tata wa hina wa le tilweni ni ku tamela swiphiqo swa vutomi kun’we ni ku aneriseka ni ntsako wa hina swi ta andza hi ku ya hi mpimo wa matshalatshala lawa hi ma endlaka ku nghenisa vutlhari bya Xikwembu. Kutani ke, swi endle ku tiyimisela ka wena ku vuyeriwa hi xitalo eka lunghiselelo leri Mudyondzisi Lonene wa hina a hi endleleke rona hi ku va kona nkarhi na nkarhi eka Xikolo xa Vutirheli bya le Tilweni. Onge ku gingiriteka ka wena eku lunghiseleleni ni ku hlanganyela eXikolweni xa Vutirheli bya le Tilweni hi 1991 swi nga ku pfuna ku hetisisa leswi.