Maphayona Ma Pfuna Van’wana
1 Yesu u te: “Hakunene, ntshovelo i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” Tanihi leswi vatshoveri va lembe-xidzana ro sungula a va nga talanga ni leswi a va ri ni nsimu leyikulu ya ku yi hlanganisa, Yesu a ta va a va lerise ku fikelela vo tala hi mahungu lamanene hilaha swi nga kotekaka hakona hi ku va rhumela hi un’we-un’we. Ematshan’weni ya sweswo, u “va rhum[e] hi vambirhi-mbirhi.” (Luka 10:1, 2) Ha yini a va rhume hi vambirhi-mbirhi?
2 Vadyondzisiwa volavo a va ri lavantshwa naswona a va nga ri na ntokoto. Hi ku tirha swin’we a va ta dyondzisana ni ku khutazana. Hilaha Solomoni a swi vekeke hakona, “v̌ambirhi v̌a tlula uṅwe.” (Ekl. 4:9, 10) Hambiloko moya lowo kwetsima wa ha ku chuluriwa hi Pentekosta ya 33 C.E., Pawulo, Barnaba ni van’wana va fambe ni vapfumeri-kulobye evutirhelini. (Mint. 15:35) Mawaku lunghelo leri va veke na rona loko van’wana va leteriwa hi xiviri hi vavanuna vo tano lava nga ni vuswikoti!
3 Nongonoko Lowunene Ngopfu Wa Ndzetelo: Ku fana ni vandlha ra lembe-xidzana ro sungula, vandlha ra Vukreste ra manguva lawa i nhlengeletano leyi chumayelaka. Nakambe ra hi letela. Ha un’we-un’we, ku navela ka hina loku humaka embilwini ku fanele ku va ku twarisa mahungu lamanene hilaha ku humelelaka hilaha swi nga kotekaka hakona. Leswaku vahuweleri lavo tala va antswisa vuswikoti bya vona, mpfuno wa kumeka.
4 Exikolweni xa Vutirheli bya Mfumo xa sweswinyana, Sosayiti yi tivise nongonoko wa maphayona wa ku pfuna van’wana evutirhelini bya nsimu. Xana ku ni xilaveko xa ntirho lowu? Ina, xi kona. Vahuweleri vo tlula miliyoni va khuvuriwile emalembeni manharhu lama nga hundza, naswona vo tala va vona va lava ndzetelo leswaku va ta va lava humelelaka swinene entirhweni wa ku chumayela. I vamani lava nga tirhisiwaka ku endla sweswo?
5 Maphayona ya nkarhi hinkwawo ma nga pfuna. Nhlengeletano ya Yehovha yi va nyika ndzayo ni ndzetelo lowukulu. Maphayona ma kume ndzetelo lowu fambisanaka ni swilaveko swa wona eXikolweni xa Ntirho wa Maphayona xa mavhiki mambirhi. Ma tlhela ma vuyeriwa hi ku hlangana ni valanguteri va xifundzha ni va muganga, kun’we ni hi ndzetelo lowu humaka eka vakulu. Hambileswi ku nga riki maphayona hinkwawo lama nga ni ntokoto hilaha Pawulo na Barnaba a va ri hakona, va kume ndzetelo lowunene lowu va tsakelaka ku wu avela van’wana.
6 I Vamani Lava Nga Ta Vuyeriwa? Xana lava pfuniwaka hi nongonoko lowu i vahuweleri lavantshwa kumbe lava ha ku khuvuriwaka? Nikatsongo! Ku ni lavatsongo ni lavakulu lava tiveke ntiyiso malembe yo tala lava nga tsakelaka ku pfuniwa eka swiyenge swo karhi swa vutirheli. Van’wana va endla ntirho lowunene ngopfu eku fambiseni ka tibuku kambe swa va nonon’hwela ku endla maendzo yo vuyela kumbe ku sungula tidyondzo ta le kaya ta Bibele. Van’wana va nga ha sungula tidyondzo ta Bibele hi ku olova swinene kambe va kuma leswaku swichudeni swa vona a swi endli nhluvuko. I yini lexi va hlulaka? Maphayona lama nga ni ntokoto ma nga ha komberiwa ku ya pfuneta etimhakeni leti. Maphayona man’wana ma humelela swinene eku hlakuleleni ka ku tsakela ka vanhu, eku sunguleni ka tidyondzo ta Bibele ni le ku kongomiseni ka swichudeni leswintshwa enhlengeletanweni. Ntokoto wa vona wu ta pfuna swinene eka nongonoko lowu.
7 Xana u tala ku kuma leswaku xiyimiso xa wena a xi ku pfumeleli ku seketela minhlangano ya vandlha ya nkarhi na nkarhi ya ntirho wa nsimu hilaha a wu swi lava hakona? Phayona ri nga ha kota ku tirha na wena minkarhi yin’wana loko vahuweleri lavan’wana va nga ri kona.
8 Ntirhisano Lowunene Wa Laveka: Kambirhi hi lembe, vakulu va ta endla malunghiselelo ya leswaku vahuweleri lava tsakelaka ku pfuniwa va hlanganyela eka nongonoko wa Maphayona Ma Pfuna Van’wana. Loko u tsakela ku amukela mpfuno wo tano, tihlanganise ni muhuweleri la nga phayona la averiweke ku ku pfuna, endla xiyimiso lexi faneleke xa ntirho wa nsimu, ivi u xi namarhela. Hlayisa ntwanano wun’wana ni wun’wana. Loko mi ri karhi mi tirha swin’we, xiyisisa tindlela letinene ta ku twarisa mahungu lamanene. Xiyisisa xivangelo xa ku humelela ka swingheniso swo karhi. Tirhisa swiringanyeto leswi muhuweleri la nga phayona a nga ha swi nyikelaka leswaku u antswisa swingheniso swa wena. Loko u swi tirhisa swilo leswi u swi dyondzeke, nhluvuko wa wena evutirhelini wu ta vonaka, eka wena ni le ka van’wana. (Vona 1 Timotiya 4:15.) Tirhani swin’we hi xitalo hilaha swi nga kotekaka hakona, mi hlanganyela eka swiyenge hinkwaswo swa vutirheli, ku katsa ni ku nyikela vumbhoni hi xitshuketa kambe yisani nyingiso eka xiyimo xo karhi lexi u lavaka ku pfuniwa ngopfu eka xona.
9 Mulanguteri wa ntirho u ta tsakela ku tiva nhluvuko lowu endliwaka. Nkarhi na nkarhi, u ta vonana ni mufambisi wa Dyondzo ya Buku ya Vandlha ku vona ndlela leyi u vuyeriwaka ha yona eka nongonoko lowu. Mulanguteri wa xifundzha hilaha ku fanaka u ta ku pfuna loko a endzela vandlha.
10 Yehovha u lava leswaku vanhu vakwe va leteriwa ni ku “hlomisiwa hi ku helela eka ntirho wun’wana ni wun’wana lowunene.” (2 Tim. 3:17) Languta lunghiselelo ra Maphayona Ma Pfuna Van’wana tanihi lunghiselelo ra ku pfuna lava lavaka ku antswisa vuswikoti bya vona bya ku chumayela rito. Loko ku ri lunghelo ra wena ku hlanganyela eka wona, endla tano hi ku tlangela, hi ku titsongahata ni hi ntsako.