Tindlela To Endla Leswi Engetelekeke Entirhweni Wo Chumayela

LOKO nkarhi wu fikile wa leswaku Yesu a rhuma vadyondzisiwa vakwe va ya chumayela hi Mfumo, u te eka vona: “Ntshovelo i wukulu, kambe vatirhi a hi vangani.” Leswi ntirho lowu a wu fanele wu endliwa a wu ri wukulu, u tlhele a ku: “Kombelani N’wini wa ntshovelo leswaku a rhumela vatirhi entshovelweni wakwe.” (Mat. 9:37, 38) Yesu u byele vadyondzisiwa vakwe ndlela leyi va faneleke va chumayela ha yona. Marito yakwe ma swi veke erivaleni leswaku ntirho lowu wu fanele wu endliwa hi xihatla, u te: “N’wana wa munhu u ta fika mi nga si heta ku rhendzeleka ni miti ya Israyele.”—Mat. 10:23.

² Ninamuntlha, ku ni xilaveko lexikulu entirhweni wo chumayela. Mahungu lawa lamanene ya Mfumo ma fanele ma chumayeriwa makumu ma nga si fika naswona nkarhi a wa ha ri kona! (Mar. 13:10) Leswi misava yi nga nsimu, hi langutane ni xiyimo lexi fanaka ngopfu ni lexi vadyondzisiwa va Yesu a va langutane na xona, kambe ntirho wa hina i wukulu ngopfu. A hi talanga loko hi pimanisiwa ni tibiliyoni ta vanhu leti nga laha misaveni, kambe ha tiyiseka leswaku Yehovha u ta hi pfuna. Mahungu lamanene ya Mfumo ma ta chumayeriwa emisaveni hinkwayo naswona makumu ma ta fika hi nkarhi lowu Yehovha a wu vekeke. Xana hi ta rhangisa Mfumo wa Xikwembu ku sungula evuton’wini bya hina leswaku hi kota ku wu endla hi ku helela ntirho wa hina wo chumayela? Hi tihi tipakani leti hi nga ti fikelelaka entirhweni wa Yehovha?

³ Loko Yesu a boxa leswi Yehovha a swi lavaka eka malandza Yakwe lama tinyiketeleke, u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Mar. 12:30) Hi fanele hi wu endla hi mbilu hinkwayo ntirho lowu hi wu endlelaka Xikwembu. Leswi swi vula leswaku hi kombisa leswaku ku tinyiketela ka hina ni ku tiyimisela ka hina ku ente ku fikela kwihi hi ku endla leswi nga ematimbeni ya hina entirhweni wa Yehovha. (2 Tim. 2:15) Ku ni mintirho leyi pfulekeleke un’wana ni un’wana wa hina, hi ku ya hi swiyimo ni vuswikoti bya un’wana ni un’wana wa hina. Vona yin’wana ya mintirho leyi, kutani u endla xiboho xa leswaku i pakani yihi ya Mfumo leyi u nga ta tikarhatela ku yi fikelela leswaku u kota ku hetisisa xiavelo xa wena xo chumayela.

KU VA MUHUWELERI WA VANDLHA

⁴ Hinkwavo lava amukeleke ntiyiso va ni lunghelo ra ku twarisa mahungu lamanene. Lowu i ntirho wa xisekelo lowu Yesu a wu nyikeke vadyondzisiwa vakwe leswaku va wu endla. (Mat. 24:14; 28:19, 20) Hi ntolovelo, mudyondzisiwa wa Yesu Kreste u sungula ku vulavula ni van’wana hi mahungu lamanene loko a sungula ku ma twa. Leswi hi swona leswi Andriya, Filipi, Korneliyo ni van’wana va swi endleke. (Yoh. 1:40, 41, 43-45; Mint. 10:1, 2, 24; 16:14, 15, 25-34) Xana leswi swi vula leswaku munhu a nga sungula ku byela van’wana mahungu lamanene hambiloko a nga si khuvuriwa? Ina! Loko munhu a kala a faneleka ku va muhuweleri la nga khuvuriwangiki evandlheni, u va se a pfulekeriwe hi lunghelo ro chumayela hi yindlu na yindlu. Nakambe hi ku ya hi vuswikoti ni swiyimo swakwe, a nga ha hlanganyela ensin’wini.

⁵ Endzhaku ka loko muhuweleri a khuvuriwile, a swi kanakanisi leswaku wa swi tsakela ku endla hinkwaswo leswi a nga swi kotaka leswaku a pfuna van’wana va twa mahungu lamanene. Vavanuna ni vavasati va ni lunghelo ro hlanganyela entirhweni wo chumayela. Hi ni lunghelo ro pfuneta ku yisa ntirho wa Mfumo wa Xikwembu emahlweni. Mani na mani la nga ndlandlamuxaka ntirho wakwe leswaku a kuma malunghelo lama engetelekeke yo hlawuleka, u ta tsaka hakunene.

KU TIRHA LAHA KU NGA NI XILAVEKO LEXIKULU

⁶ Kumbexana u le vandlheni leri nsimu ya rona yi tirhiwaka hi ku phindha-phindha naswona ntirho wo chumayela wu famba kahle. Loko swi ri tano, u nga ha vona swi antswa leswaku u ndlandlamuxa ntirho wa wena hi ku rhurhela endhawini yin’wana laha ku nga ni xilaveko lexikulu ensin’wini ya kona. (Mint. 16:9) Loko sweswi u ri nkulu kumbe nandza wa vutirheli ku nga ha va ku ri ni vandlha rin’wana leri nga tlangelaka mpfuno wa wena. Mulanguteri wa muganga a nga ha ringanyeta ndlela leyi u nga pfunaka ha yona evandlheni rin’wana leri nga eka muganga wa ka n’wina. Loko u tsakela ku ya tirha endhawini yin’wana etikweni rero, rhavi ri nga ku nyika vuxokoxoko lebyi pfunaka.

⁷ Xana u nga tsakela ku ya pfuna etikweni rimbe? Loko swi ri tano, u fanele u rhanga u anakanyisisa hi ta ku rhurha ka wena. Ha yini u nga buli ni vakulu va vandlha ra ka n’wina hi mhaka leyi? Ku rhurha ko tano ku ta khumba wena swin’we na mani na mani loyi a nga ta rhurha na wena. (Luka 14:28) Hambiswiritano, loko u nga kunguhati ku ya tshama nkarhi wo leha, swi nga antswa ngopfu loko wo anakanya hi ku ya endla ntirho wa Mfumo endhawini yin’wana ya kwala tikweni ra rikwenu.

⁸ Ematikweni man’wana, vamakwerhu lava tirhisiwaka ku rhangela va ha ku nghena entiyisweni. Vamakwerhu va kwalaho lava titsongahataka va tiyimisele ku pfumelela vakulu lava nga ni ntokoto lava rhurheleke evandlheni rero leswaku va rhangela. Loko u ri nkulu naswona u anakanyisisa hi ku rhurhela etikweni ro tano, tsundzuka leswaku xikongomelo xa wena a hi ku tekela vamakwerhu va kwalaho mintirho ya vona. Ematshan’weni ya sweswo tirha na vona. Va khutaze leswaku va tirha hi matimba leswaku va fanelekela ku amukela vutihlamuleri evandlheni. (1 Tim. 3:1) Lehisa mbilu loko swilo swin’wana swi nga endliwi hi ndlela leyi swi endliwaka ha yona etikweni ra rikwenu. Tirhisa ntokoto wa wena tanihi nkulu leswaku u pfuna vamakwerhu. Kutani, loko swo endleka leswaku u tlhelela etikweni ra rikwenu, vakulu va kwalaho va ta swi kota ku khathalela vandlha.

⁹ Leswaku rhavi ri ta kota ku ku nyika mavito ya mavandlha lama nga ta vuyeriwa hi mpfuno wa wena, Komiti ya Ntirho ya Vandlha yi fanele yi rhanga yi rhumela papila ra xibumabumelo. Papila leri ra laveka hambiloko u ri nkulu, nandza wa vutirheli, phayona kumbe muhuweleri. Komiti ya ntirho yi ta rhumela papila ra xibumabumelo swin’we ni xikombelo xa wena hi ku kongoma erhavini ra tiko leri u navelaka ku ya tirha eka rona.

KU CHUMAYELA HI RIRIMI RIN’WANA

¹⁰ Leswaku u kota ku ndlandlamuxa vutirheli bya wena, u nga ha tsakela ku dyondza ririmi rin’wana, ku katsa ni ririmi ra mavoko. Loko u tivekele pakani yo dyondza ku chumayela hi ririmi rin’wana, ha yini u nga vulavuli ni vakulu swin’we ni mulanguteri wa muganga? Va nga ku nyika swiringanyeto ni swikhutazo leswi lavekaka. Hi ku landza nkongomiso wa rhavi, miganga yin’wana yi hlele titlilasi to dyondzisa vahuweleri lava nga ni vuswikoti ni maphayona leswaku va chumayela hi ririmi rin’wana.

NTIRHO WA VUPHAYONA

¹¹ Vahuweleri hinkwavo va fanele va tiva hinkwaswo leswi lavekaka leswaku va nghenela ntirho wa vuphayona bya nkarhinyana, bya nkarhi hinkwawo ni byo hlawuleka kun’we ni mintirho yin’wana leyi fambelanaka ni ntirho wa nkarhi hinkwawo. Phayona ri fanele ri va Mukreste la khuvuriweke la nga xikombiso lexinene, loyi swiyimo swakwe swi n’wi pfumelelaka ku heta nhlayo yo karhi ya tiawara a ri karhi a chumayela mahungu lamanene. Komiti ya Ntirho ya Vandlha hi yona yi hlawulaka vahuweleri leswaku va va maphayona ya nkarhinyana, kasi maphayona ya nkarhi hinkwawo ni yo hlawuleka ma hlawuriwa hi rhavi.

¹² Maphayona ya nkarhinyana ma nga phayona nkarhi wo sukela eka n’hweti yin’we, ku ringana tin’hweti to tala leti tlhandlamanaka hilaha ma nga kotaka hakona, kumbe ma phayona tin’hweti leti nga pimiwangiki, hi ku ya hi swiyimo swa wona. Vahuweleri vo tala va Mfumo va tiphina hi ku va maphayona ya nkarhinyana hi minkarhi yo hlawuleka, yo tanihi nkarhi wa Xitsundzuxo kumbe hi n’hweti leyi mulanguteri wa muganga a endzeleke vandlha ha yona. Van’wana va phayona hi tin’hweti to wisa entirhweni. Vahuweleri lava khuvuriweke lava nghenaka xikolo va nga ha tsakela ku va maphayona ya nkarhinyana loko xikolo xi pfarile. Vahuweleri va nga hlawula ku va maphayona ya nkarhinyana lawa ma tirhaka tiawara leti hungutiweke hi March na April swin’we ni hi n’hweti leyi mulanguteri wa muganga a endzeke ha yona. Ku nga khathariseki leswaku swiyimo swa wena swi njhani, loko u ri ni mahanyelo lamanene ni mikhuva leyinene u nga hlela ku tirha nsimu u fikelela tiawara leti lavekaka naswona tiyiseka leswaku u nga va phayona ra nkarhinyana ku ringana n’hweti kumbe tin’hweti to hlayanyana, vakulu va vandlha va ta tsakela ku vona xikombelo xa wena xa ku endla ntirho lowu wo hlawuleka.

¹³ Leswaku u faneleka ku va phayona ra nkarhi hinkwawo, u fanele sweswi u kota ku tirha nsimu u fikelela tiawara leti lavekaka hi lembe. Tanihi phayona ra nkarhi hinkwawo, u fanele u tirhisana swinene ni vandlha leri u hlanganyelaka eka rona. Ku va ni maphayona lama hisekaka evandlheni i nkateko, ma chela moya wo hisekela nsimu hambi ku ri ku khutaza van’wana leswaku na vona va nghenela ntirho wa vuphayona. Hambiswiritano, loko u nga si endla xikombelo xa leswaku u va phayona ra nkarhi hinkwawo, u fanele u va se u ri na tin’hweti ta tsevu.

¹⁴ Maphayona yo hlawuleka hi ntolovelo ma hlawuriwa exikarhi ka maphayona ya nkarhi hinkwawo lawa swi nga erivaleni leswaku ma hiseka ensin’wini. Ma fanele ma swi kota ku ya tirha laha rhavi ri lavaka ku ma avela kona. Hakanyingi, ma averiwa endhawini leyi nga riki na vandlha, laha ma nga ta fika ma chumayela ivi ma simeka mavandlha lamantshwa. Minkarhi yin’wana, maphayona yo hlawuleka ma averiwa emavandlheni lama lavaka ku pfuniwa ku hlanganisa nsimu ya wona. Maphayona man’wana yo hlawuleka lawa ma nga vakulu ma averiwa ku ya pfuna emavandlheni lamatsongo, hambiloko ku nga ri na xilaveko xa vatirhi vo tala ensin’wini ya kona. Maphayona yo hlawuleka ma kuma malinyana yo karhi leswaku ma kota ku tihanyisa ha yona. Van’wana va hlawuriwa leswaku va va maphayona yo hlawuleka swa xinkarhana.

NTIRHO WA VURHUMIWA

¹⁵ Komiti ya Ntirho ya Huvo leyi Fumaka hi yona yi hlawulaka varhumiwa, kutani va averiwa hi Komiti ya Rhavi ya laha va tshamaka kona leswaku va ya tirha etindhawini leti nga ni vanhu vo tala swinene. Va hetisisa swo tala eku yiseni ka ntirho wo chumayela emahlweni ni mintirho ya mavandlha. Hakanyingi, varhumiwa va kume ndzetelo eka Xikolo xa Vachumayeri va Mfumo. Va nyikiwa ndhawu yo tshama swin’we ni swimalana leswaku va ta kota ku tihanyisa ha swona.

NTIRHO WA VALANGUTERI VA MIGANGA

¹⁶ Lava hlawuriwaka ku va valanguteri va miganga hi Huvo leyi Fumaka va kuma ndzetelo ni ntokoto hi ku rhanga va tirha tanihi valanguteri va miganga lava khomelaka. Vamakwerhu lava va rhandza nsimu swin’we ni vamakwerhu. I maphayona lama hisekaka, swichudeni swa Bibele leswi hisekaka tlhelo swivulavuri ni vadyondzisi lava hisekaka. Va ti kombisa kahle timfanelo ta moya lowo kwetsima naswona va ringanisela, va anakanyela ni ku tlhela va va lava twisisaka. Loko makwerhu a tekile, nsati wakwe la nga phayona u fanele a va xikombiso lexinene loko swi ta emhakeni ya ku tikhoma ni loko a tirhisana ni van’wana. U fanele a va muchumayeri loyi a hisekaka. Nakambe u twisisa ntirho wakwe wo va wansati wa Mukreste loyi a titsongahataka, a nga fanelanga a nghenelela eka timhaka leti faneleke ti vuriwa hi nuna wakwe kumbe ku va yena loyi a vulavulaka ngopfu ku tlula nuna wakwe. Valanguteri va muganga ni vasati va vona va tshama va khomekile swinene, kutani lava tikarhatelaka ku fikelela ntirho lowu va fanele va va ni rihanyo lerinene. Maphayona a ma endli xikombelo xo va valanguteri va muganga. Ematshan’weni ya sweswo, va kombisa valanguteri va muganga leswaku va wu navela ntirho wolowo, lava nga ta va nyika swiringanyeto swa leswaku va nga wu fikelela njhani.

SWIKOLO LESWI KONGOMISIWAKA HI XIKWEMBU

¹⁷ Xikolo xa Vachumayeri va Mfumo: Ku ni xilaveko xa vachumayeri lava engetelekeke va Mfumo leswaku va hlanganisa nsimu leyi nga tirhiwiki ngopfu ni ku seketela mavandlha hi tlhelo ra moya. Hikokwalaho, vamakwerhu va xinuna ni va xisati lava nga nghenelangiki vukati swin’we ni mimpatswa va nga endla xikombelo xo kuma ndzetelo wo hlawuleka eka Xikolo xa Vachumayeri va Mfumo. Endzhaku ko ya exikolweni, mathwasana ma ta rhumeriwa leswaku ma ya va maphayona ya nkarhi hinkwawo endhawini leyi ku nga ni xilaveko lexikulu etikweni ra rikwavo. Hambiswiritano, lava swiyimo swa vona swi va pfumelelaka va nga ha nyikiwa swiavelo swin’wana etikweni ra rikwavo kumbe etikweni rin’wana. Ku nga ha rhumeriwa va nga ri vangani leswaku va ya va maphayona yo hlawuleka ya xinkarhana kumbe ya nkarhi hinkwawo. Maphayona lama swi tsakelaka ku ya exikolweni lexi ma nga ha twa leswi lavekaka enhlanganweni lowu hleleriweke xikongomelo lexi enhlengeletanweni ya xifundzha.

¹⁸ Xikolo xa Bibele xa Giliyadi xa Watchtower: Vamakwerhu va xinuna ni va xisati lava nga nghenelangiki vukati ni vatekani lava hlawuriwaka ku ya eka xikolo lexi va fanele va kota ku vulavula Xinghezi naswona va ri eka ntirho wo hlawuleka wa nkarhi hinkwawo. Va nga pfuna swinene ensin’wini ni le rhavini. Ana se va swi kombisile leswaku va swi tsakela ku tirhela vamakwavo ni ku pfuna van’wana hi ndlela ya rirhandzu leswaku va dyondza ni ku namarhela nkongomiso wa Matsalwa. Komiti ya Rhavi ya kwalaho yi rhamba swichudeni leswi hisekaka leswaku swi tata tifomo. Mathwasana ya xikolo lexi ma rhumeriwa ensin’wini kumbe erhavini ra le tikweni rin’wana kumbe ra rikwavo.

NTIRHO WA BETHELE

¹⁹ Ku tirha eBethele i nkateko lowukulu. Vito leri nge Bethele ri vula “Yindlu ya Xikwembu” naswona vito rero ri ti fanela ngopfu tindhawu leti ta ntirho lowu kongomisiwaka hi Xikwembu. Vamakwerhu va xinuna ni va xisati lava nga entirhweni wa Bethele va endla ntirho wa risima lowu fambisanaka ni ku kandziyisa, ku hundzuluxela ni ku rhumela minkandziyiso leyi sekeriweke eBibeleni. Ntirho wa vona i wa risima eka Huvo leyi Fumaka leyi langutelaka mavandlha emisaveni hinkwayo yi tlhela yi ma nyika nkongomiso. Vamakwerhu vo tala va le Bethele lava nga vahundzuluxeri va tshama ni ku tirha etindhawini ta le nsin’wini ya rhavi leti eka tona ku vulavuriwaka ririmi leri va ri hundzuluxelaka. Leswi swi endla leswaku va kota ku twa ririmi leri ku vulavuriwaka rona siku ni siku. Nakambe va kota ku swi vona loko vanhu va twisisa ririmi leri, tanihi leswi minkandziyiso yi hundzuluxeriweke ha rona.

²⁰ Yo tala ya mintirho leyi endliwaka eBethele yi lava matimba. Hikwalaho ka sweswo, lava vitaniwaka eBethele hakanyingi i vamakwerhu lava ha riki vantshwa lava tinyiketeleke, lava khuvuriweke, lava nga ni rihanyo lerinene ni matimba. Loko ku ri ni xilaveko erhavini leri langutelaka tiko ra ka n’wina naswona u tsakela ku tirha eBethele, u nga vutisa vakulu va vandlha ra ka n’wina mayelana ni swilaveko swa kona.

NTIRHO WO AKA

²¹ Ku aka miako ya nhlengeletano i ntirho wo kwetsima, lowu fanaka ni ntirho wo aka tempele ya Solomoni. (1 Tih. 8:13-18) Vamakwerhu vo tala va xinuna ni va xisati va kombisa leswaku va hiseka hi ku nyikela hi nkarhi wa vona swin’we ni rifuwo ra vona, leswaku va seketela entirhweni lowu.

²² Xana u nga swi kota ku pfuna entirhweni lowu? Loko u ri muhuweleri la khuvuriweke naswona u swi lava ku hlanganyela entirhweni lowu, vamakwerhu lava langutelaka ntirho wo aka endhawini ya ka n’wina va ta wu tlangela ngopfu mpfuno wa wena naswona va tiyimiserile ku ku letela loko u nga ri na vutshila. Ha yini u nga byeli vakulu va vandlha ra ka n’wina leswaku wa swi tsakela ku pfuna? Vahuweleri van’wana lava khuvuriweke lava fanelekaka, va swi kotile ku va vatirhi vo tirhandzela lava endlaka ntirho wo aka miako ya nhlengeletano ematikweni man’wana.

²³ Loko u tirha eka ntirho wo aka u ta pfulekeriwa hi malunghelo yo tala. Vamakwerhu lava khuvuriweke lava nga swikombiso leswinene lava nga ni vutshila lava nga pfunetaka eka matsima lama nga ekusuhi ni laha va tshamaka kona va nga tirha tanihi vatirhi va ku tirhandzela vo Pulana ni ku Aka eTikweni ra ka vona. Van’wana va nga swi kota ku pfuneta eka matsima ya le kule ku ringana nkarhi wo karhi naswona va hlawuriwa hi rhavi leswaku va tirha tanihi vatirhi vo aka va ku tirhandzela ku ringana mavhiki mambirhi ku ya eka tin’hweti tinharhu. Lava averiweke leswaku va tirha nkarhi wo leha va vitaniwa vatirhi vo aka. Mutirhi wo aka loyi a averiweke ku ya tirha etikweni rin’wana u vitaniwa mutirhi wo aka wo huma etikweni rimbe. Ntlawa wo Aka wu vumbiwa hi vatirhi va ku tirhandzela lava rhangelaka eka tsima ha rin’we naswona wu pfuniwa hi vatirhi va ku tirhandzela vo Pulana ni ku Aka va le Tikweni rero ni vahuweleri va le vandlheni. Mintlawa yo Aka yi famba yi aka etindhawini leti languteriwaka hi rhavi.

HI TIHI TIPAKANI TA WENA TA MOYA?

²⁴ Loko se u tinyiketerile eka Yehovha, u swi veke erivaleni leswaku u navela ku tirhela Yehovha hilaha ku nga heriki. Kambe, xana hi tihi tipakani ta wena ta moya? Ku tivekela tipakani ta moya swi ta ku pfuna leswaku u tirhisa matimba ya wena ni rifuwo ra wena hi vutlhari. (1 Kor. 9:26) Ku tivekela tipakani to tano swi ta endla leswaku u kula emoyeni nileswaku u kota ku papalata mintirho leyi nga pfuniki nchumu loko u ri karhi u ringeta ku fanelekela malunghelo lama engetelekeke.—Filp. 1:10; 1 Tim. 4:15, 16.

²⁵ Muapostola Pawulo u hi vekele xikombiso lexi hi nga xi landzelaka entirhweni wa Xikwembu. (1 Kor. 11:1) Pawulo a a tinyiketele hi ku helela leswaku a tirhela Yehovha. A a swi xiya leswaku Yehovha u n’wi nyika malunghelo yo tala. Pawulo u tsalele vamakwerhu va le Korinto a ku: “Ndzi pfulekeriwe hi nyangwa leyikulu leyi yisaka entirhweni.” Xana a swi tano ni le ka hina? Ina, hi pfulekeriwe hi tindlela to tala to tirhela Yehovha loko hi tirhisana ni vandlha, ngopfu-ngopfu eku chumayeleni ka mahungu lamanene ya Mfumo. Kambe ku fana na Pawulo, hi fanele hi tsundzuka leswaku ku nghena hi “nyangwa [yoleyo] leyikulu” swi vula ku lwa ni “vakaneti vo tala.” (1 Kor. 16:9) Pawulo a a tiyimisele ku titsona swo karhi. Xiya leswi a swi vuleke, u te: “Ndzi ba miri wa mina, ndzi wu kongomisa tanihi hlonga.” (1 Kor. 9:24-27) Xana na hina hi endla hilaha ku fanaka?

²⁶ Un’wana ni un’wana wa hina u khutaziwa ku fikelela tipakani ta moya hi ku ya hi swiyimo swakwe. Namuntlha vanhu vo tala va le ka ntirho wa nkarhi hinkwawo hikwalaho ka leswi va tivekeleke tipakani teto ku sukela loko va ha ri vatsongo. Ku sukela loko va ha ri vatsongo, vatswari va vona swin’we ni van’wana va va khutaze ku endla tano. Kutani va tiphina hi ku tirhela Yehovha—handle ko tisola. (Swiv. 10:22) Hi nga tivekela tipakani to va kona ensin’wini vhiki rin’wana ni rin’wana, hi sungula ni ku tlhela hi fambisa dyondzo ya Bibele ya le kaya kumbe hi tinyika nkarhi lowu engetelekeke wo lunghiselela leswi hi nga ta swi dyondza etinhlengeletanweni ta vandlha. Nchumu wa nkoka hi leswaku hi yima hi tiyile naswona hi endla ntirho wa hina wo chumayela hi xitalo. Loko hi endla tano, hi ta dzunisa Yehovha ivi hi fikelela pakani-nkulu ya hina, ku nga ku n’wi tirhela hilaha ku nga heriki.—Luka 13:24; 1 Tim. 4:7b, 8.