Xana U Nga Endla Leswi Engetelekeke Leswaku U Xixima Yehovha?

¹ Xexo i xivutiso xa nkoka lexi hinkwerhu hi faneleke hi anakanya ha xona. Tanihi vatekeleri vo tshembeka va N’wini wa hina, Yesu Kreste, hi xixima Xikwembu xa hina namuntlha hi ku twarisa vito ra xona erivaleni. Lebyi i vutihlamuleri lebyi hi faneleke hi byi rhwala leswaku hi ta amukeriwa hi Xikwembu. (Mar. 13:​10; Lk. 4:​18; Mint. 4:​20; Hev. 13:​15) Mawaku lunghelo leri nga hlamuselekiki​​—⁠⁠ina, i ku dzuneka⁠​—⁠​ku yisa mahungu lawa lamanene eka “tinyimpfu” leti saleke leti hangalakeke leti ti nga ha vaka xiphemu xa ntlhambi wa Yehovha wa vuako hinkwabyo!​​—⁠⁠Yoh. 10:⁠16.

² Xana wena ni vana va wena mi nga endla leswi engetelekeke leswaku mi xixima Yehovha hi ku engetela ntirho wa n’wina evutirhelini? Hi tinhlayo leti yaka ti andza, vamakwenu va xinuna ni va xisati va nghenela ntirho wa vuphayona. En’hwetini ya April 1992, 12 555 a va ri entirhweni wa vuphayona byo hlawuleka, bya nkarhi hinkwawo kumbe bya nkarhinyana eAfrika Dzonga. Xana wena hi wexe u tshama u anakanyisisa hi vuphayona? Xana wa va khutaza vana va wena leswaku va nghenela ntirho-vutomi wa vutirheli bya nkarhi hinkwawo?

³ Hikwalaho ka yini u nga kambi ndlela leyi u titwaka ha yona malunghana ni ntirho wa vuphayona? Loko ku vulavuriwa ha byona, xana u hatlisela ku tibyela leswaku swiyimo swa wena a swi ku pfumeleli ku va phayona? I ntiyiso leswaku vuphayona a byi koteki eka van’wana. Vutihlamuleri bya Matsalwa ni swipimelo swin’wana swi endla vo tala va nga swi koti ku tirha nkarhi hinkwawo. (1 Tim. 5:⁠8) Xana wa ha ku khongela ha yona mhaka leyi? Xana mi tshame mi bula hi mhaka leyi tanihi ndyangu, ku vona loko xirho xin’we xi ta swi kota ku phayona? Nkandziyiso wa Xihondzo xo Rindza xa June 1, 1983, a wu ri ni mhaka leyi tlhontlhaka mianakanyo eka tluka 16: “Hakunene, mutirheli un’wana ni un’wana wa Vukreste u fanele ku lavisisa hi xikhongelo ku vona loko a nga kota ku phayona kumbe e-e. Vatekani vambirhi va Afrika Dzonga lava phayoneke malembe ya khume-ntlhanu va te: ‘Hikwalaho ka yini hi phayona ke? Xana hi nga swi kota ku tiyimelela eka Yehovha loko hi nga phayoni?’ Vo tala lava nga riki maphayona va nga ti vutisa xivutiso lexi yelanaka na lexi: ‘Xana hakunene ndzi nga swi kota ku hlamusela Yehovha leswaku hikwalaho ka yini ndzi nga ri phayona ke?’”

⁴ Xihloko xin’wana xa Xihondzo xo Rindza emhakeni leyi xi ve ni nhlamuselo leyi yo kongoma: “Un’wana ni un’wana u fanele a titshemba. Xana wa vula u ku, ‘Moya wa swi lava, kambe nyama yi tsanile’? Kambe xana moya wa swi lava hakunene? Hi nga tshuki hi vula leswaku moya a wu swi lavi hi mhaka ya leswi nyama yi tsaneke.”​​—⁠⁠w78 8/15 tl. 23.

⁵ Vatswari Lava Lavaka Vana Va Vona Va Humelela: Swivuriso 15:​20 ya hi tiyisa: “Ṅwana l’a yingisaka o ṭakisa tata wa yena, kambe šihunguki ši dyisa mana wa [xo]na e mbiṭi.” A swi kanakanisi leswaku vatswari lava chavaka Xikwembu va tsaka loko majaha ni vanhwana va vona va hanya vutomi bya ku tinyiketela ku tirhela Yehovha. Hambi swi ri tano, vana va wena a va nge pfuketani va teka ndlela ya vutlharhi. Vuxisi bya misava leyi byi ni matimba lamakulu. Vatswari, mahanyelo ya vana va n’wina ngopfu-ngopfu ma vumbiwa hi ya n’wina. Loko nkarhi hinkwawo mi bumabumela ntirho wa nkarhi hinkwawo, loko mi khutaza vana va n’wina leswaku va kuma vanghana va maphayona lama tinyiketeleke, loko mi tiyiseka leswaku vutirheli bya nkarhi hinkwawo i ntirho-vutomi lowu xiximekaka swinene lowu vana va n’wina va nga wu nghenelaka, swi le rivaleni leswaku langutelo rero lerinene ri ta va khumba swinene vana va n’wina. Va pfuneni va vona nkoka wa ku tiendlela vito lerinene na Yehovha ematshan’wini yo ri endla ni vanhu.

⁶ Vantshwa, Swivuriso 22:⁠1 yi kombisa nhlawulo lowu mi faneleke ku wu endla: “V̌ito le’rinene ri tlula rifuwo le’rikulu, ku nkhensiwa, na kona, ku tlula silver ni nsuku.” Xana i vito ra njhani leri u nga ta tiendlela rona? Anakanya hi vavanuna ni vavasati lava hi hlayaka ha vona eBibeleni lava tiendleleke vito eka Xikwembu hi ntirho wo tinyiketela. A ku ri na Luka, dokodela la rhandzekaka na Enoko, loyi a nga famba swin’we ni Xikwembu xa ntiyiso. Samuwele u kume dyondzo leyinene eka hinkwato, u sungule ku tirhela Yehovha etempeleni a ha ri muntshwa. Xana u vona onge malandza lawa yo tshembeka ma tisorile hi nhlawulo lowu ma wu endleke? A va ta tisolela yini? Hinkwavo ka vona a va hanya vutomi lebyi tsakisaka, lebyi humelelaka ni lebyi nyanyulaka. Naswona va tsakeriwe hi Yehovha hi laha ku nga heriki!​​—⁠⁠Ps. 110:⁠3; 148:​12, 13; Swiv. 20:​29a; 1 Tim. 4:8b.

⁷ Loko vana va humelela evuton’wini, vatswari va vona va tinyungubyisa. Matimba ya vona yo letela, yo laya ni ya ku dyondzisa “nḍaka ya Yehova” ma hakeriwa minkarhi yo tala. (Ps. 127:⁠3) I yini lexi xi nga endlaka mutswari a tinyungubyisa ku tlula jaha kumbe nhwanyana loyi a tikarhatelaka ku xixima Yehovha? Vantshwa vo tala eminkarhini ya sweswi va landza minkondzo ya Luka, Enoko na Samuwele, hi laha papila rin’wana ri hlamuselaka ha kona: “Ndzi ni malembe ya 16. Ndzi sungule vuphayona bya nkarhi hinkwawo . . . endzhaku ka tin’hweti ta kaye ta loko ndzi khuvuriwile, naswona ku sukela enkarhini wolowo Yehovha wa ndzi katekisa. . . . Vuphayona nakambe bya pfuna exikolweni. Emahlweni ka sweswo, vadyondzi-kulorhi a va ndzi hlekula hi mhaka ya leswi ndzi nga Mbhoni. Sweswi, leswi ndzi vaka ni dyondzo ya munhu hi xiyexe, ndza swi kota ku ‘hlamula loyi a ndzi xanisaka.’”

⁸ Dyondzo Ya Ku Ku Hlomisa eVutirhelini: Sweswi hi nga ha langutisisa mhaka ya dyondzo ya tiko. Lowu i nchumu lowu langutelo leri ringaniseriweke ri lavekaka swinene eka wona. Xihondzo xo Rindza xa November 1, 1992, a xi ri ni xihloko lexi nge “Dyondzo Leyi Nga Ni Xikongomelo.” Ehansi ka xihlokwana lexi nge “Dyondzo Leyi Ringaneke,” ku boxiwe yinhla leyi: “Vakreste va fanele va kota ku tihlayisa, hambi loko va ri vatirheli va maphayona ya nkarhi hinkwawo. (2 Vatesalonika 3:​10-12) . . . Xana i dyondzo yo fikela kwihi leyi muntshwa la nga Mukreste a faneleke a va na yona leswaku a ta xixima misinya leyi ya milawu ya Bibele ni ku fikelela mindzhwalo yakwe ya Vukreste? . . . Hi [w]ihi [muholo lowu] nga vuriwaka [lowu] ‘ringaneke’ . . . eka lava lavaka ku va vatirheli va maphayona va mahungu lamanene? Hakanyingi, volavo va lava ntirho wa le tlhelweni leswaku va nga ‘tikiseli’ vamakwavo kumbe mindyangu ya vona.​​—⁠⁠1 Vatesalonika 2:⁠9.”

⁹ Loko dyondzo ya le tlhelweni yi vonaka yi laveka eka loyi a lavaka ku va phayona leswaku yi n’wi pfuna ku khomelela eka ntirho wa nkarhi hinkwawo, Xihondzo xo Rindza xa November 1, 1992 xi ri: “Loko swi koteka, Mbhoni leyitsongo yi ta va yi endla kahle, loko yi dyondza yi ri ekaya, xisweswo yi kota ku hlayisa mikhuva leyinene ya Vukreste yo dyondza, ku va kona eminhlaganweni ni le ntirhweni wo chumayela.”

¹⁰ Ku ni ntokoto lowu humaka hi le Afrika wa muntshwa wa malembe ya 22 hi vukhale loyi a a fanele ku ya exikolweni xo dyondzela ntirho, hambi leswi mbilu yakwe a yi ri entirhweni wa vuphayona. Loko a ha ri exikolweni xo dyondzela ntirho, u tsarise ku va phayona ra nkarhinyana. Tintangha ti n’wi endle xihlekiso, ti vula leswaku a nge humeleli eswikambelweni. Nkarhi hinkwawo a a va hlamula a ku: “Lava Mfumo wa Xikwembu ku sungula ni ku lulama ka xona.” Hi ku hlela kakwe, a a pfuka ka ha ri mpundzu swinene ivi a lunghiselela swa le tlilasini ku ringana tiawara timbirhi kutani a ya entirhweni wa nsimu ni nhlikanhi loko tlilasi yi huma. Xikolo hinkwaxo a xi hlamarile loko muntshwa loyi a ri wa vunharhu eka xikambelo xo hlawuleka loko ku hlawuriwa swichudeni swinharhu swi kuma sagwadi ro hlawuleka ro swi pfuna ku dyondza. Xichudeni xa vumbirhi a ku ri munhu la tsakelaka loyi makwerhu wa hina la nga phayona a a dyondza na yena Bibele exikolweni. Xichudeni xo sungula a ku ri muntshwa un’wana wa Mbhoni la hisekaka exikolweni.

¹¹ Vakulu Va Endla Xiphemu Xa Vona: Vakulu va vandlha, lava tinyungubyisaka hi ntirho lowu endliwaka hi maphayona, va nyika xikhutazo lexikulu eka vatirheli lava hisekaka. Vakulu va swi tsakela ku endla leswi hikuva va swi tiva leswaku maphayona lama tirhaka hi matimba, lama humelelaka i nkateko eka vandlha rin’wana ni rin’wana. Endzhaku ko heta kwalomu ka lembe entirhweni wa vuphayona, vona va kota ku leteriwa hi laha ku engetelekeke eXikolweni xa Ntirho wa Vuphayona. Khoso leyi yi tikombe yi ri xitirho xa nkoka eku antswiseni ka ku humelela ka maphayona. Hambi leswi maphayona ma nga emahlweni entirhweni lowu, na vona va lava xikhutazo xa rirhandzu naswona vakulu va fanele va xalamukela ku eneta xilaveko lexi.​​—⁠⁠1 Pet. 5:​1-⁠3.

¹² Xana vakulu va nga wu pfurhetela njhani ntirho wa vuphayona? Masungulo lamanene ma nga ha va ku hamba va languta lava va nga ha kotaka ku kuma lunghelo leri. Vakulu va nga ha tshinelela vanhu lava vonakaka va ri exiyin’weni lexinene xo phayona, ku katsa ni vo tala lava tshamelaka ku phayona nkarhinyana, vanhu lava holaka mudende, vavasati va miti ni swichudeni. Hambi leswi ku nga riki na munhu loyi a faneleke a titwa a boheka ku tsarisa, lava swi navelaka kambe va ri ni ku kanakana, hi ku khutaziwanyana kahle, va nga ha vona leswaku va nga swi kota ku phayona.

¹³ Loko va khutaza lava lavaka ku endla xikombelo, vakulu va fanele va tsundzuka leswaku a swi bohi leswaku loyi a kombelaka a rhanga hi ku heta tin’hwetinyana entirhweni wo phayona nkarhinyana a nga si tsarisa vuphayona bya nkarhi hinkwawo. (kmTS 8/86 xiengetelo tindz. 24-26) I ntiyiso leswaku vakulu va fanele va tiyiseka kahle leswaku loyi a endlaka xikombelo u ta swi kota ku fikelela xilaveko xa tiawara.

¹⁴ Endzhaku ka loko xikombelo xi langutisiwe hi Komiti ya Ntirho ya Vandlha ni ku kambisisiwa hi matsalana a vona leswaku swivutiso hinkwaswo swi hlamuriwile, xi fanele xi rhumeriwa eka Sosayiti hi ku hatlisa.

¹⁵ Matsalana u fanele a tivisa vakulu hi swiphiqo swihi ni swihi leswi maphayona ma vaka na swona. Leswi i swa nkoka swinene emavandlheni lama nga ni maphayona yo tala. Ku tlhandlekela eku kambisiseni ka ntirho wa maphayona eku heleni ka lembe ra ntirho, hi laha swi lavekaka ha kona eka Congregation Analysis Report (S-⁠10), matsalana u fanele a rhamba mulanguteri wa ntirho leswaku va hlangana eku sunguleni ka March va vona leswaku i vamani lava hlulekaka ku fikelela xilaveko xa tiawara ni loko va lava ku pfuniwa. (Vona Vutirheli Bya Hina Bya Mfumo bya February 1992, Switiviso.) Loko mpfuno wu hatla wu nyikeriwa, phayona ri nga ha swi kota ku heta lembe ra ntirho hi laha ku humelelaka.

¹⁶ Maphayona yo tala lamantshwa i matsongo hi malembe naswona a hi khale va ri entiyisweni. Moya wa vona wo swi rhandza wa hi tsakisa hakunene! Kambe vanhu lava lavantshwa va ha lava ku leteriwa leswaku va antswisa vuswikoti bya vona entirhweni wa yindlu na yindlu, leswaku va endla maendzo yo vuyela lama humelelaka ni ku dyondzisa tidyondzo ta Bibele. Loko va nga leteriwi, va nga ha hela matimba endzhaku ka lembe kumbe ku tlula ivi eku heteleleni va tshika ntirho wa vuphayona hikwalaho ko ka va nga kumi vuyelo lebyinene evutirhelini. Vakulu lava xiyaxiyaka va nga ha kota ku vona swiphiqo switsongo kumbe ku ya ehansi ka ntirho. Loko ku hatla ku langutiwa xiyimo ni loko phayona ri pfuniwa eka xiphiqo xa rona, ri nga ha tiphina hi malembe yo tala ya ntirho lowu vekaka mihandzu.

¹⁷ Xana U Nga Phasa Tinhlampfi eMatini Ya Le Kule? Vadyondzisiwa van’wana va Yesu a va ri vaphasi. Minkarhi yin’wana, endzhaku ko phasa vusiku hinkwabyo, tinkoka ta vona a ti nga si khoma nchumu. (Yoh. 21:⁠3) Eswiphen’wini swa tiko leri, lomu ‘ku phasiwa ka vanhu’ ku endliweke malembe yo tala, maphayona man’wana ma nga ha vona onge ku sele “tinhlampfi” titsongo ‘ematini’ ya vandlha ra vona. (Mt. 4:​19) Ku hambana ni sweswo, xana a hi tsaki loko hi twa swiviko leswi humaka eka tindhawu tin’wana lomu vahuweleri ni maphayona va fambisaka kona tidyondzo to tala ta Bibele? Ntsako lowu kumiwaka hi maphayona ni varhumiwa eka matiko lawa wu le rivaleni. (wTS92 9/1 tl. 20 ndz. 15) Xisweswo, loko maphayona man’wana lama tirhaka hi matimba ma kota ku rhurhela eka tiko leri nga ni xilaveko lexikulu, va fanele va byela hofisi ya vona ya rhavi va nga si rhurhela kona.

¹⁸ Kambe tsundzuka leswaku lava navelaka ku ya eka matiko man’wana va ya endla ntirho wa nkarhi hinkwawo va fanele va va ni rihanyo lerinene, va tiyile emoyeni, va va ni moya wa ntirhisano, moya wa swa mfumo ni ku faneleka tanihi vahuweleri va Mfumo. Nakambe va fanele va va ni xiviko lexinene xa le vandlheni leri va tirhaka ka rona sweswi. Ku engetela kwalaho, va fanele va kota ku tiwundla hi mali naswona va nga languteli ku pfuniwa hi vamakwavo va le ka ndhawu leyi va yaka ka yona. Va fanele va rhanga hi ku bula ni vakulu hi makungu ya vona evandlheni ra vona kutani va twa swibumabumelo swa vona. Loko vakulu va nga tiyiseki hi mhaka yin’wana leyi khumbanaka ni munhu yoloye leswaku a ya tirha kun’wana, va fanela va vulavula ni mulanguteri wa xifundzha kumbe va tsalela hofisi ya rhavi leswaku va kuma vuxokoxoko byin’wa⁠na.

¹⁹ Eku sunguleni, van’wana va nga ha va va sungule vuphayona hikwalaho ka leswi ku nga nchumu lowunene kambe a va tivutisa loko va ta humelela. Swi nga ha endleka va endle xikombelo va ri karhi va kanakana, va nga titshembi. Loko va ha sungula swi nga ha endleka leswaku vuyelo bya vona bya nsimu a byi ri byitsongo. Hambi swi ri tano, hi ku famba ka nkarhi, vutshila bya vona byi kurile, naswona ntirho wa vona a wu vonaka wu katekisiwa hi Yehovha. Eku heteleleni ntsako ni xivindzi xa vona swi kurile. Eka van’wana, vuphayona byi ve xitepisi xo nghenela ntirho wa le Bethele, Xikolo xa Ndzetelo wa Vutirheli ni ntirho wo famba-famba.

²⁰ Swi nga ha endleka u nga swi koti ku rhurhela eka tiko rin’wana kumbe u nghenela Xikolo xa Ndzetelo wa Vutirheli, kambe u nga ha swi kota ku ya phasa eka mati man’wana ya tiko leri loko nsimu leyi u nga ka yona yi nga humesi mihandzu. Hi kombela u tivisa Sosayiti loko u tsakela ku tirha lomu xilaveko xi nga xikulu kona eAfrika Dzonga kumbe eka rin’wana ra matiko lawa hi vandzakaneke na wona. Ku rhurha koloko ku nga ha lava ku hundzula mahanyelo ya wena, kambe tihakelo ta moya ti ta va tikulu hakunene.​​—⁠⁠Mt. 6:​19-⁠21.

²¹ Kumbe loko swiyimo swa wena swi ku pfumelela, u nga ha kota ku pfuna vandlha ra le kusuhi eka xifundzha xa n’wina. Loko u faneleka, mulanguteri wa xifundzha u ta swi tsakela ku ku nyika swiringanyeto malunghana ni mavandlha lawa ma nga pfunekaka loko mo kuma phayona rin’wana exifundzheni xexo.

²² Maphayona ni vahuweleri van’wana va swi kotile ku khathalela swilaveko swa ndhawu ya ka vona loko va ri ekaya. Va nga ha tiva ririmi rin’wana. Xana u kuma leswaku ensin’wini ya ka n’wina xiphemu lexikulu xa vaaki xi vulavula ririmi rin’wana? Xana va kona vanhu lava lavaka ku amukela rungula ra Mfumo eka un’wana la tirhisaka ririmi ra mavoko? Lava tivaka ririmi rin’wana va nga pfuna swinene eku fikeleleni ka vanhu va tinxaka hinkwato hi rungula ra Mfumo. Hambi leswi swi nga ha tikaka, swi nga ha tlhela swi vuyerisa.​​—⁠⁠1 Tim. 2:⁠4; Tito 2:⁠11.

²³ Loko sweswi u tikarhatela ku xixima Yehovha, tiphine hi malunghelo ya wena ya sweswi ya ntirho. Loko u vona leswaku u nga endla leswi engetelekeke, byela Yehovha mhaka leyi hi xikhongelo. Kambisisa kahle leswaku swiyimo swa wena swi nga ku pfumelela ku endla mindzulamiso yihi. Vulavula hi makungu ya wena eka nkulu la nga ni moya wa vuphayona kumbe mulanguteri wa xifundzha. Loko u endle xiboho hi xikhongelo lexi tirhaka, hatlisa u sungula, u tiyiseka hi xitshembiso xa Yehovha xa leswaku u ta xixima lava n’wi xiximaka.​​—⁠⁠Hev. 13:​5, 6; 1 Sam. 2:⁠30.